İqtisadi və sosial tənəzzül içində olan Ermənistan üçün builki qış mövsümünün daha böyük problem və çətinliklərlə müşayiət olunacağı deyilir.
Artıq bildirilir ki, Ermənistanı soyuq və qaranlıq qış gözləyir, bu ölkədə həm istilik, həm də elektrik sahəsində ciddi çətinlik baş verəcək. Bəzi erməni ekspertlərinin özləri belə deyirlər ki, problemin həlli Azərbaycandan keçir.
Məlumatlara görə, işğal dövründə Qarabağdakı su qovşaqlarından Ermənistana 300 MeqaVatt enerji ötürülürmüş ki, bu da olkənin özündə istehsal olunan enerjidən xeyli ucuz başa gəlirmiş.
Cari ildə Ermənistanda elektrik enerjisi istehsalı xeyli azalıb. Ölkənin Milli Statistika Komitəsinin məlumatına görə, avqust ayında Ermənistanda elektrik enerjisi hasilatı ötən illə müqayisədə 12,3%, 2021-ci ilin iyul ayı ilə müqayisədə isə 8,8% aşağı düşüb.
Enerji hasilatının azalmasının bir neçə səbəbi var. Birincisi, Azərbaycan erməni işğalı altında olan torpaqları azad etdikdən sonra Qarabağda olan 36 elektrik stansiyasından 30-u Bakının nəzarətinə keçib. İşğal dövründə bu stansiyalar, nəinki bütün zəbt olunmuş ərazini enerji ilə təmin edib, hətta Ermənistanın da enerji təchizatında iştirak edib.
Ekspertlər deyir ki, Azərbaycan torpaqlarının işğaldan azad edilməsi bu sahədə də Ermənistanın belini qırıb. Ermənistan bu qış ölkə əhalisini yetərincə istilik və işıqla təmin edə bilməyəcək.
“…Sülh müqaviləsi bağlamayana qədər…”
İqtisadçı Natiq Cəfərli bizimlə söhbətində bildirdi ki, Ermənistanın üzləşdiyi bu problem haqda erməni KİV-lərində açıq yazılır. “Ermənistanda elektrik və istilik enerjisi ilə bağlı problemlərin getdikcə artdığı bu ölkənin mətbuatında da etiraf olunur, bu sahədə qışda kifayət qədər ciddi problemlərin olacağı söylənilir. Amma altermativ kimi İrandan daha çox qaz və elektrik enerjisinin alınması göstərilir. Çox güman ki, Ermənistan Azərbaycanla kommunikasiyaları açıb, sərhədləri dəqiqləşdirib və sülh müqaviləsi bağlamayana qədər hansısa kommunikasiyaların açılması, Azərbaycanın hansısa formada bu işdə iştirakı mümkünsüzdür. Əslində, Azərbaycanla sülh müqaviləsi bağlamaq Ermənistan üçün həyati əhəmiyyət kəsb etməlidir. Amma dediyim kimi, alternativ kimi İrana ümid edirlər ki, bu il o ölkədən daha çox qaz və elektrik enerjisi alacaqlar”.
N.Cəfərli dedi ki, son yayılan məlumatlara görə, Ermənistan və İran arasında bu sahədə danışıqlar gedir. Ekspert hesab edir ki, bu müvəqqəti həll yoludur, qalıcı həll yolu Ermənistanın Azərbaycanın ərazi bütövlüyünü tanıması, sərhədlərin dəqiqləşdirilməsi və kommunikasiyaların açılmasıdır: “Bundan sonra isə Ermənistan-Azərbaycan münasibətlərində normallaşma baş verərsə, Azərbaycan da gələcəkdə kommunikasiyalar açıqldıqdan sonra hansısa bir formada Ermənistanın təminatında satıcı kimi iştirak edə bilər”.
İradə SARIYEVA
