Məlumatlara görə, Bakı Dövlət Universitetinin (BDU) nəzdində “Erməni Araşdırmaları və Təlim Mərkəzi” yaradılıb. Azərbaycanda erməni dilinin öyrənilməsi istiqamətində bir neçə ildir ki, davamlı olaraq işlər görülür. Yeri gəlmişkən bildirək ki, AMEA-nın Qafqazşünaslıq İnstitutunda da ermənişünaslıq şöbəsi var və burada ermənişünas mütəxəssislər çalışır.
BDU-da yaradılan “Erməni Araşdırmaları və Təlim Mərkəzi” nə zaman açılacaq, burada əsasən nələr öyrədiləcək, hansı istiqamətlər araşdırılacaq?
“Yeni yaradılan mərkəz birbaşa...”
Mərkəzin rəhbəri İsmayıl Tanrıverdi “Bakı-Xəbər”ə bildirdi ki, hazırda mərkəzə ayrılan otaqlar təmir edilir və burada onların fəaliyyəti üçün bütün şərait yaradılır. O qeyd etdi ki, indiyə qədər ermənilər Azərbaycan dilində normal danışıblar, maraq göstəriblər, hətta onlar bizim dili öyrənməyə yüz il əvvəl başlayıblar. “Ermənilərin ikinci ana dili türk dili olub. Sonralar onlar rus və başqa dillərə maraq göstərdilər, amma yüz il əvvəl əsas məqsədləri Azərbaycan dilini öyrənmək olub. Bu gün də onlarda Azərbaycan dili mərkəzlərinə maraq güclənib, bu, 44 günlük müharibədən sonra özünü daha güclü şəkildə göstərdi”.
Azərbaycanda erməni dilinin öyrənilməsi ilə bağlı işlər görüldüyünü qeyd edən İ.Tanrıverdi hesab edir ki, “Erməni Araşdırmaları və Təlim Mərkəzi” adlı ayrıca bir qurumun yaradılması görülən işlərin örnəklərindəndir: “Bizdə də artıq bu istiqamətdə tədbirlər görülür. BDU-da “Erməni Araşdırmaları və Təlim Mərkəzi”nin yaradılması buna əyani misaldı. BDU rektorunun əmri ilə həmin mərkəzə direktor təyin edildim. Mərkəzin fəaliyyət göstərməsi üçün bizə üç otaq ayırıblar, hazırda təmir işləri gedir. Təmir işləri başa çatdıqdan sonra biz geniş şəkildə fəaliyyət göstərəcəyik. Belə bir ikinci mərkəz isə Azərbaycan Dillər Universitetində yaradılıb. Biz də ermənilərə qarşı fəaliyyətimizi gücləndiririk. Əlbəttə, ermənilərin bizim dilə hazırkı dövrdə olan marağı müharibədən sonra yarandı”.
İ.Tanrıverdi deyir ki, bu gün ermənilər Azərbaycana qarşı çox çirkin, təxribatçı, yalan təbliğat aparırlar və düşmənə öz dilində cavab vermək üçün belə güclü mərkəzlərin yaradılması bir zərurət olub: “Bizim belə bir devizimiz var: düşmənə qələbə çalmaq üçün onların dillərini öyrənməliyik. Ermənilər bilirlər ki, Azərbaycanda ermənişünaslıq, erməni dili xüsusi öyrədilir. Yeni yaradılan mərkəz birbaşa BDU rektorunun tabeliyində olan müstəqil bir qurumdur.
Ermənilərlə informasiya müharibəsində hər zaman üstünlüyü əldə etmək üçün bu cür mərkəzlər lazım idi. Bilirsiz ki, bizim bu məsələdə uzun illik təcrübəmiz var, mütəxəssislər yetişdirmişik və mərkəz açıldıqdan sonra onların fəaliyyətinin şahidi olacaqsınız”.
İşçi tərkibinə gəlincə, İ.Tanrıverdi bildirdi ki, mərkəzin kadr məsələsi də həll olunub.
İradə SARIYEVA
