“Media haqqında” yeni qanun hazırlanacaq. Məlum olduğu kimi, bu, Prezident İlham Əliyevin imzaladığı “Azərbaycan Respublikasında media sahəsində islahatların dərinləşdirilməsi haqqında” Fərmanda əksini tapıb.
Belə ki, fərmana əsasən, Azərbaycan Respublikası Prezidentinin Administrasiyasına “Media haqqında” qanunun layihəsini iki ay müddətində hazırlayıb Azərbaycan Respublikasının Prezidentinə təqdim etmək tapşırılıb.
Göünən odur ki, nəhayət, KİV haqqında yeni qanun gerçəkləşir. Çünki belə bir qanuna ölkədə böyük ehtiyac var. Son illər Azərbaycanda siyasi, iqtisadi, ictimai və mədəni həyatın bütün sahələrində köklü islahatlar həyata keçirilir. Artıq sıra media sahəsinə çatıb və bu ildən başlayaraq KİV müstəvisində ciddi addımların atılması, islahatların aparılması planlaşdırılır. O baxımdan, “Media haqqında” yeni qanunun hazırlanmasına ekspertlər necə yanaşırlar?
“Qanunun tətbiqindən sonra mediaya olan güvən artacaq və bu sahədə mövcud olan problemlər öz həllini tapa bilər”
Məsələyə münasibət bildirən Demokratik Jurnalistlər Liqasının rəhbəri, media eksperti Yadigar Məmmədli buna müsbət prizmadan yanaşdı: “Prezidentin məlum fərmanı çox düzgün qərardır. Çünki media ilə bağlı yeni qanunun hazırlanmasına böyük ehtiyac var idi. Neçə il idi bununla bağlı müzakirələr gedirdi. Məsələ ondadır ki, qloballaşan dünyada media da öz inkişaf yolunu tutub və formatını dəyişib. Artıq ənənəvi mediadan çox, onlayn media ortadadır və ictimai rəyə daha çox öz təsirini göstərir. Bununla belə, son illər sosial şəbəkələr də ənənəvi medianı sıxışdırır. Ona görə də müasir dövrün tələblərinə uyğun olaraq, “Media haqqında” yeni qanun hazırlanmalıdır. Bir sıra dəyişikliklər, yeniliklər və bu sahə ilə bağlı olan digər məsələlər orada öz əksini tapmalıdır. Bununla belə, hazırlanacaq yeni qanun zamanın tələblərinə uyğunlaşdırılmalıdır. Bu da çox normal haldır. Düzdür, yeni qanun qəbul olunması o demək deyil ki, bu sahədə bütün problemlər dərhal öz həllini tapacaq. Problemlərin həlli vaxt tələb edir. Ancaq qanunun qəbul olunması bir sıra məsələlərin həllinə zamanla təkan verəcək. Nəzərə almaq lazımdır ki, media ilə bağlı məsələlər çox dərindir. Cəmiyyətimizdə medianın təşəkkül tapması, medianın ictimai rəyə təsiri, nüfuzu və digər məsələlər hər zaman bizi düşündürüb. Hesab edirəm ki, bütün bunlar öz həllini tapmalıdır. Məsələn, sosial şəbəkələrin ictimai rəyə təsiri artıb, amma orada gedən informasiyalar çox zaman həqiqəti əks etdirmir. Sosial şəbəkələrdə zaman-zaman yanlış məlumatlar da verilir. O üzdən, yeni media elə mövqe tutmalıdır ki, insanlar dəqiq və düzgün məlumatları oradan ala bilsinlər. Hesab edirəm ki, qanun hazırlanandan sonra qəbul olunacaq. Qanunun tətbiqindən sonra mediaya olan güvən artacaq və bu sahədə mövcud olan problemlər öz həllini tapa bilər”.
Media ekspertinin fikrincə, bu sahədə mövcud olan bir sıra məsələlər zamanla öz həllini tapacaq.
Vidadi ORDAHALLI
