Son illər Azərbaycanda siyasi, iqtisadi, ictimai və mədəni həyatın bütün sahələrində köklü islahatlar həyata keçirilir. Artıq sıra media sahəsinə çatıb və bu ildən başlayaraq KİV müstəvisində ciddi addımların atılması, islahatların aparılması planlaşdırılır.
Məlumdur ki, yanvarın 12-də Prezident İlham Əliyev Azərbaycan Respublikasında media sahəsində islahatların dərinləşdirilməsi haqqında Fərman imzaladı. Bu fərman medianın inkişafının dəstəklənməsi, bu sahədə institusional quruculuq işlərinin davam etdirilməsi, yeni informasiya-kommunikasiya texnologiyalarının və innovasiyaların tətbiqinin stimullaşdırılmasında böyük rol oynayacaq.
Qeyd edək ki, nizamnamədə çap mediası məhsullarının abunə və satışının təşkilinə dəstək göstərilməsi istiqamətində tədbirlərin görülməsi də diqqətçəkən məqamdır. Məlum olduğu kimi, qeyd edilən istiqamətdə müəyyən çatışmazlıqlar yaşanır, bu nöqteyi-nəzərdən göstəriləcək istənilən dəstək çap mediasının inkişafına töhfə vermiş olacaq.
Şakir Ağayev: “Çap mediasının satışını Medianın İnkişafı Agentliyi üzərinə götürərsə və bunu kütləvi edərsə, bu, qəzetlərin fəaliyyətinə böyük dəstək olar”
“Novoye vremya" qəzetinin baş redaktoru Şakir Ağayev qeyd etdi ki, bu fərmanın imzalanması medianın, xüsusilə də çap mediasının inkişafına töhfə verəcək: “Kütləvi informasiya vasitələrində yaxşı mənada dəyişiklik edilməsinə ehtiyac var idi. Çap mediasının satışı bu sahənin ağrılı yerlərindən biridir. Çap mediasının satışının təşkili məsələsini media təmsilçiləri dəfələrlə gündəmə gətiriblər. Prezident İlham Əliyevlə görüşən zaman, mətbuat sahəsinə baxan şəxslərlə görüşəndə də bu məsələni qaldırmışdıq. Heç kimə sirr deyil ki, məhsul nə qədər yaxşı olsa da, bazar olmayanda onu satmaq, cəmiyyətə təqdim etmək olmur. Danılmaz faktdır ki, çap mediasını cəmiyyətə təqdim edən bazardır. Çap mediasının satışını Medianın İnkişafı Agentliyi üzərinə götürərsə və bunu kütləvi edərsə, bu, qəzetlərin fəaliyyətinə böyük dəstək olar. Eyni zamanda, bu, çap mediasının iqtisadi baxımdan vəziyyətini yaxşılaşdırar. Onu da qeyd edim ki, hazırkı köşklər yüksək faizlə işləyir. Köşklərdə çalışanların əksəriyyəti qəzetdən, qəzetçilikdən anlayışı olmayan şəxslərdir.
Qəzetlərin satışı metro və digər əhalinin sıx toplaşdığı yerlərdə təşkil olunmalıdır. Həmçinin, bölgələrə qəzetlərin vaxtında çatdırılması fərmanda qeyd olunur. Bu kimi hallar çap mediasının inkişafına səbəb olacaq”.
Hikmət Babaoğlu: “Medianın İnkişafı Agentliyi yeni innovativ əsaslarda və yeni keyfiyyətdə informasiya mühitinin formalaşması işində xüsusi missiya yerinə yetirəcək”
"Yeni Azərbaycan" qəzetinin baş redaktoru, millət vəkili Hikmət Babaoğlu “Bakı-Xəbər”ə açıqlamasında qeyd etdi ki, Medianın İnkişafı Agentliyi yeni innovativ əsaslarda və yeni keyfiyyətdə informasiya mühitinin formalaşması işində mühüm rol oynayacaq: “Azərbaycan Respublikasında Medianın İnkişafı Agentliyinin yaradılması milli mediamızın inkişafı tarixində yeni keyfiyyət mərhələsinin başlanğıcı kimi qiymətləndirilə bilər. Bu qərar müasir media və informasiya münasibətlərinin yeni əsaslarda tənzimlənməsini təmin edəcək. Eyni zamanda, milli informasiya resurslarımızın inkişafı və onların fəaliyyətinin təkmilləşdirilməsinə ciddi töhfələr verəcək. Məsələ ondadır ki, milli informasiya məkanımızda keyfiyyət dəyişiklərinin yaradılması zərurəti hər bir media mənsubu tərəfindən dərk edilən, hətta deyərdim ki arzu edilən bir həqiqət idi. Bunu zəruri edən təkcə klassik medianın ənənəvi problemləri deyildi. Eyni zamanda, hazırda ən müxtəlif internet resurslarında müxtəlif adlarda formalaşan informasiya subyektləri, onların davranış və fəaliyyəti və bunun informasiya təhlükəsizliyi kontekstində tənzimlənməsi məsələsi də günümüzün tələblərindən biri idi. Milli informasiya məkanımızda informasiya istehlakçıları, onların mənbə kimi istifadə etdikləri informasiya subyektlərinin çoxşaxəliliyi və bunun virtual və real ictimai münasibətlər sistemimizə təsiri məsələləri kompleks şəkildə yanaşma tələb etməklə, sadalanan münasibətlərin ictimai və hüquqi tənzimlənməsi məsələlərini aktuallaşdırırdı. Başqa mühüm bir problem isə mediamızın bir şəkildə qlobal informasiya məkanına inteqrasiyası, yaxud bu məkanın imkanlarından milli informasiya məkanımızın lehinə istifadə edilə bilməməsi gerçəkliyi idi . Əgər daha açıq danışmalı olsaq, milli mediamızın qlobal informasiya məkanına çıxışının məhdud olması və burada Azərbaycanın informasiya maraqlarının təmin olunmaması idi.Yəni mövcud informasiya subyektlərimizin transmilli media statusunda keyfiyyətli və milli maraqlarımıza uyğun olan iştirakçılığı arzuedilən səviyyədə deyildi. Bu boşluqdan istifadə edən bəzi yumşaq güc mərkəzləri milli media məkanımızı daim təzyiq altında saxlayır, onun üzərində dominantlıq etməklə, əslində, bizim informasiya gündəmimizi təyin edirdilər. Milli informasiya məkanımızın gündəminin başqaları tərəfindən təyin edilməsi cəhdləri isə milli maraqlarımızla daban-dabana ziddiyyət təşkil edirdi. Çox təəssüf ki, əksər halda nə media ilə bağlı yaradılmış ixtisaslaşmış müxtəlif ictimai qurumlarımız, nə də digər strukturlarımız buna qarşı effektiv müqavimət nümayiş etdirə bilirdilər. Nəticədə milli informasiya məkanımız manipulyasiyaya məruz qalır, beləliklə də milli təhlükəsiziliyimizin əsas komponentlərindən olan informasiya təhlükəsizliyimiz pozulurdu. Ona görə də müxtəlif vaxtlarda bu problemləri həll etmək üçün müəyyən cəhdlər olsa da, effektif nəticə əldə etmək mümkün olmadı. Çünki problemin həlli kompleks və əsaslı yanaşma tələb etdiyi halda, kosmetik və pərakəndə yanaşma tətbiq etməklə həll edilməyə cəhd göstərilirdi. Hazırda yeni təsis edilən Medianın İnkişfı Agentliyi isə məhz bu problemlərin həllinə kompleks yanaşma ilə effektiv həll imkanları yaradır. Bunun üçün yeni yaranmış qurumun nizamnaməsinə nəzər salmaq kifayətdir. Hər şeydən öncə qeyd etmək lazımdır ki, yaradılan yeni qurumun fəaliyyətinin tətbiqi sahəsi, sadəcə, çap mediası ilə məhdudlaşmır, onun imkanlarından digər bütün media subyektlərinin yararlanması şərtləri formalaşır”.
Həmsöhbətimiz hesab edir ki, Medianın İnkişafı Agentliyi yeni innovativ əsaslarda və yeni keyfiyyətdə informasiya mühitinin formalaşması işində xüsusi missiya yerinə yetirəcək.
Sevinc Seyidova: “Hazırda çap mediasının üzləşdiyi əsas problemlər sırasında abunə və satış mühüm yer tutur”
“Həftəiçi” qəzetinin baş redaktoru Sevinc Seyidova bildirdi ki, Prezident İlham Əliyevin müvafiq fərmanı ilə 10 ildən artıq fəaliyyət göstərən KİV-in İnkişafına Dövlət Dəstəyi Fondunun əsasında daha geniş səlahiyyət və imkanlara malik Medianın İnkişafı Agentliyinin yaradılması dövlətimizin mətbuat sahəsinə diqqətinin növbəti əyani təzahürüdür. Agentliyin nizamnaməsində əksini tapan müddəaları mediamızın qarşıdakı illərdə yeni "Yol xəritəsi" də adlandıra bilərik: “Agentliyin fəaliyyət istiqamətləri ilə bağlı print media üçün diqqətçəkən ən vacib məqamlardan biri abunə və satışın təşkilində dəstək məsələsidir. Hazırda çap mediasının üzləşdiyi əsas problemlər sırasında abunə və satış mühüm yer tutur. Artıq dövlət başçısının təsdiqlədiyi fərmana əsasən, bir çox məsələ ilə yanaşı, bu problemlərin həlli istiqamətində də qurum öz dəstəyini göstərəcək. Mətbuatın iqtisadi müstəqilliyinin təmininin təşkili də diqqətəlayiqdir. Yeni yaradılan qurumun həm də onlayn mediaya dəstək verməsinin nəzərdə tutulması bu sahədə mövcud çatışmazlıq və problemlərin həllində də mühüm rol oynayacaq. Hazırda çap mediasının onlayn formatlarının fəaliyyətinin təkmilləşdirilməsinə ciddi ehtiyac var. Müasir trendlərin tətbiqi ilə mətbuat orqanının həm print, həm də onlayn versiyasının qarşılıqlı fəaliyyətdə inkişafı, yeni yanaşmaların tətbiqi, modern innovasiyalardan geniş istifadə imkanlarının yaradılması media sahəsinin yeni inkişaf mərhələsinə qalxmasına təkan verəcək. Medianın İnkişafı Agentliyinin yaradılması ilə bütün bu işlər artıq xaotik deyil, nizamlı və planlı şəkildə müəyyənləşdirilmiş konkret məqsədə doğru addımlamaqla həyata keçiriləcək”.
Günel CƏLİLOVA
