Sosial şəbəkələrdə Cəlilabad Rayon İcra Hakimiyyətinin (RİH) binasında əməliyyat keçirildiyi barədə məlumatlar yayılıb. Bir qədər sonra isə bu məlumat ölkənin tanınmış media quruluşları tərəfindən də tirajlanmağa başlayıb. Hələ ki, rəsmi təsdiqini tapmayan bu informasiya rəsmi qurumlar, o cümlədən sözügedən rayonun İcra Hakimiyyəti tərəfindən təkzib edilmir. Belə olan təqdirdə, məlumatın doğruluğuna inanmaq məcburiyyətində qalırıq.
Bildirilir ki, hüquq-mühafizə orqanlarının keçirdiyi əməliyyat nəticəsində saxlananlar sırasında Cəlilabad RİH-nin başçısı Namiq Zeynalov, birinci müavini Mənsur Məmmədov, Ərazi özünüidarəetmə və yerli özünüidarəetmə orqanları ilə iş şöbəsinin müdiri Yaşar Vəliyev var. Xüsusi diqqət çəkən məqamlardan biri budur ki, sözügedən İcra Hakimiyyətinin rəsmiləri bu naqis əməllərini ölkədə müharibənin getdiyi, hətta hərbi vəziyyətin hökm sürdüyü dönəmdə ediblər. Deməli, onlar hüquqi məsuliyyətlə yanaşı, həm də ağır mənəvi məsuliyyət daşımalıdırlar. Müharibə dönəmində öz naqis əməllərini davam etdirən icra başçılarına başqa hansı qiyməti vermək olar?
“Təsəvvür edin ki, bu icra başçısı həm rüşvət alıb, həm də gedib elə müqəddəs mahiyyət daşıyan məclislərdə, şəhid dəfnlərində iştirak edib…”
Sosial Strateji Tədqiqatlar və Analitik Araşdırmalar İctimai Birliyinin sədri İlqar Hüseynli qəzetimizə açıqlamasında bildirdi ki, bu məlumat onu daha dərindən sarsıdıb: “Çünki indiki məqamda belə cinayətin törədilməsi yalnız ölkəyə, dövlətə, qanuna qarşı edilən cinayət deyil, eyni zamanda vətəndaşa edilən xəyanətdir. Azərbaycan cəmiyyətinin və dövlətinin birləşərək apardığı müharibəyə edilən xəyanətdir. Buna çox ad qoymaq olar. Yayılan rəsmi məlumatlardan biz görürük ki, 3 minə yaxın şəhid vermişik. Maraqlısı odur ki, statistikaya görə ən çox şəhid verən rayonlardan biri məhz Cəlilabaddır. Təsəvvür edin ki, bu icra başçısı həm rüşvət alıb, həm də gedib elə müqəddəs mahiyyət daşıyan məclislərdə, şəhid dəfnlərində iştirak edib. Bu təzadı özünüz nəzərdən keçirin. Sizi əmin edirəm ki, bu cür əməllərlə başqa rayonlarda da məşğul olublar. Bəlkə bombalanan rayonların da icra başçıları həmin atəşlərin altında belə cinayətləri tötrədiblər. İcra Hakimiyyətləri adlanan bu struktur tamamilə korrupsiyalaşıb. Fikir verirsinizsə, bu qədər həbslər onlara təsir etmir. Sanki məndən keçdisə, oğurlaya bilərəm prinsipi ilə çalışırlar. Sizinlə əvvəlki müsahibələrimizdən birində təklif vermişdim ki, bu strukturun hamısını istefaya göndərib, barələrində cinayət işləri açılsın. Onların indiyə qədərki əməlləri, yaşayış tərzləri, əldə etdikləri əmlakları araşdırılsa, bilirsiniz nələr ortaya çıxar? Korpus tamamilə istefaya getməlidir. Bizim başqa yolumuz yoxdur. Hətta yeni təyinat alanlarla da bağlı belə tendensiyalar müşahidə olunur. Sanki müharibəni görüb arxayınlaşdılar ki, hamının başı qarışıb. Bu vəziyyətdən başqa çıxış yolu isə strukturun tamamilə ləğvidir. Rayonların idarəçiliyi tamamilə bələdiyyələrə verilməlidir. Yenidən bələdiyyə seçkiləri keçirib, orada xalqın həqiqətən seçdiyi şəxslərin təmsilçiliyinə nail olmalıyıq. Niyə biz rayonun idarə olunmasında iki qurum saxlamalıyıq? Bilirsinizmi icra qurumlarının saxlanmasına nə qədər vəsait gedir? Bu addımları atmasaq, biz eyni əməllərin təkrarını görəcəyik. Ədliyyə Nazirliyinin regional mərkəzləri olduğu kimi, rayonların idarə olunması üçün də belə bir qurumun yaradılmasına ehtiyac var”.
Müsahibimizin sözlərinə görə, belə həssas məqamda da xalqın cibinə girən rəhbər işçilər varsa, deməli, problemin kökü daha dərindədir və mütləq ciddi tədbir görülməlidir.
Məhəmmədəli QƏRİBLİ
