“Rusiyanın Ermənistana xəyanəti üzündən uduzduq” - Ya 6 milyard dollar təzminat, ya Krasnodar, Stavropol, Krım...

Faiq Ələkbərli: “...yenidən Krasnodar və Stavropolda hər hansı bir erməni muxtariyyətinin yaradılması ilə bağlı fikirlərin səsləndirilməsi...”

img

Məğlub Ermənistan və onun kapituliyasiya aktına imza atan baş naziri Nikol Paşinyan yeni “sevdaya” düşüb. “Panorama.pub” saytının məlumatına görə, Paşinyan bəyan edib ki, Ermənistanın düçar olduğu bu məğlubiyyət Rusiya tərəfinin erməni xalqına xəyanəti üzündən baş verib.

Sayt yazır ki, bir neçə gün əvvəl parlamentin qarşısında çıxış edən Paşinyan deyib: “Rusiya da, Ermənistan kimi, KTMT-nin üzvüdür, bizə hərbi və digər yardımlar göstərməli idi. Ruslar əsrlər boyu xalqımıza kömək etdilər, onu xilas etdilər və heç kim onları bu vəzifədən azad etmədi. Buna görə “Artsax”da (?) aldığımız məğlubiyyət birbaşa bizə qarşı xəyanətdir. Və Rusiya bunun əvəzini ödəyəcək”

Saytın bildirdiyinə görə, diplomatik kanallar vasitəsilə Ermənistan Xarici İşlər Nazirliyi artıq Rusiya Xarici İşlər Nazirliyi ilə əlaqə yaradıb və etiraz notası, habelə 2,6 milyard dollarlıq təzminat iddialarını təqdim edib. Hətta bəzi qaynaqların yazdığına görə, Ermənistan Qarabağı itirdiyinə görə Rusiyaya qarşı təzminat davası açmaqla yanaşı, ərazi iddiası irəli sürməyi də planlaşdırır. Saytın yazdığına görə, Ermənistanın Xarici İşlər Nazirliyindən bildirilib ki, söhbət Krasnodar və ya Stavropol diyarlarındakı torpaqlardan və ya Krımın bəzi bölgələrindən gedə bilər.

Ermənistan Qarabağdan qovulduqdan sonra Rusiyaya qarşı ərazi iddialarını yenidən gündəmə gətirir və öz çirkin planlarını açıqlayır.

  • “İstisna edilmir ki, indiki Ermənistan hakimiyyətinin Rusiyaya qarşı bu cür iddialar səsləndirməsində Fransa və ABŞ-ın əli var”

Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru Faiq Ələkbərlinin fikrincə, 2018-ci ildə hakimiyyətə gələn Paşinyanın və onun kabinetinin həyata keçirdiyi siyasət əvvəlkilərdən xeyli dərəcədə fərqlənir: “Mən məhz Robert Köçəryanla Serj Sarkisyanın hakimiyyətini nəzərdə tuturam. Paşinyanın siyasəti əsasən Qərbyönümlüdür. Yəni ona qədərki siyasətdə daha çox Rusiyayönümlülük özünü göstərirdisə, Paşinyan Qərbyönümlü siyasət yürüdürdü. Mənə elə gəlir ki, indiki anlamda baş verənlər və Paşinyan hökumətinin Rusiyaya qarşı yeni iddialarda bulunması, xüsusən də təzminat məsələsini qaldırması, yaxud KTMT-nin onlara nə üçün kömək etməməsini gündəmə gətirməsi təsadüfi deyil. Paşinyan hökuməti ikili oyunlar oynayır. Hesab edirəm ki, burada Qərblə münasibətlərin, xüsusilə də Fransa və ABŞ-ın təsirləri hiss olunur. İstisna edilmir ki, indiki Ermənistan hakimiyyətinin Rusiyaya qarşı bu cür iddialar səsləndirməsində də Fransa və ABŞ-ın əli, təsiri var. Əlbəttə, Ermənistanın Rusiya qarşısında belə bir təzminat iddiasında bulunması, ondan bu şəkildə təzminat tələb etməsi o qədər də təbii görsənmir. Çünki Ermənistan bu cəsarəti hardan ala bilər ki, indiki məqamda Rusiyaya qarşı belə bir təzminat iddiasında olsun. Bunun nə dərəcədə real, yaxud şayiə olduğu əsas deyil. Əsas görünən odur ki, burada söhbət Fransa və ABŞ-ın Ermənistan hökuməti, yəni Paşinyan üzərində təsirindən gedir, Ermənistanı “danışdıran” həmin dövlətlərdir. Burada əsas məqsəd mümkün qədər Rusiyanın Ermənistana təsirini azaltmaqdır. Əslində, Ermənistanda Rusiyanın 102-ci bazası var, Ermənistanla Rusiya arasında hərbi saziş var və Ermənistan bunu hansısa bir anlamda aradan qaldıra, 102-ci bazanı ərazisindən çıxara bilməz. Nə qədər ki, 102-ci baza Ermənistandadır, Ermənistanın Qərblə, Fransa, ABŞ və digər ölkələrlə danışıqlarının üst səviyyəyə keçməsi mümkün deyil. Hesab edirəm ki, Ermənistanın Rusiyaya yönəlik bu cür iddialarının meydana çıxması, təzminat məsələsinin ortaya atılması, eyni zamanda, yenidən Krasnodar və Stavropolda hər hansı bir erməni muxtariyyətinin yaradılması ilə bağlı fikirlərin səsləndirilməsi kimi amillər daha çox Ermənistanın Qərbyönümlü siyasətini davam etdirməyə yönəldilib. Əlbəttə, o zaman belə anlaşılır ki, doğrudan da Ermənistanın özündə cəsarət tapıb Rusiyaya qarşı belə iddia irəli sürməsi, həqiqət, yaxud şayiə olsa belə təsadüfi deyil”.

F.Ələkbərlinin fikrincə, Paşinyan hökuməti yaxşı bilirdi ki, müharibədə qalib ola bilməyəcək, Azərbaycan hərbdə də onu məğlub edəcək. “Ermənistanın Rusiyaya qarşı təzminat və ərazi iddiasının kökündə bu ölkənin Qərbə qovuşmaq, çıxmaq istəyi dayanır. İndiki Ermənistan hökumətinin bu cür təxribatçı təbliğatlar aparmasının arxasında da Qərb ölkələrinin, xüsusən də Fransanın dayandığı istisna olunmur. Rusiya buna qarşı necə addım atacaq, bunu demək hələlik mümkün deyil. Rusiya Ermənistanın onun nəzarətindən çıxmasını qətiyyən istəmir. Bir çoxu da Paşinyanı inandırıb ki, “Rusiyanın gələcəyi yoxdur, Rusiya Federasiyası 5-10 ilə çökəcək, Ermənistan regionda tək qalacaq”. Ermənistan hakimiyyəti də bu ölkənin gələcəyini düşünərək bu addımı atır. Hesab edirəm ki, bu mənada, Paşinyan və onun hökuməti Qərb, xüsusən də Fransa və ABŞ politoloqlarının, ideoloqlarının çox ciddi təsiri altındadır. Paşinyan məhz onlardan “ilham alaraq” bu kimi iddialarla çıxış edir. Ancaq, bütün hallarda, hazırda Ermənistanın Rusiyanın təsiri altında qalması, yaxud Qərbin təsiri altına keçməsi məsələsində bu ölkədə ciddi ziddiyyətlər var. Ancaq Paşinyan hökuməti Qərbə meylli olduğu üçün, görünür, bu cür iddialar da oradan qaynaqlanır” - deyə F.Ələkbərli vurğuladı.

İradə SARIYEVA

Son xəbərlər