Prezidentin Laçın barədə dediyi dəqiq rəqəm bütün köçkün rayonlarımızda əhali artımına diqqət çəkdi - hələ erməni işğalı olmasaydı...

Əhməd Qəşəmoğlu: “...o ailələrə göstərilən dövlət qayğısının təzahürüdür”

img

“... Laçın işğal olunanda bu rayonda təqribən 50 mindən bir qədər çox əhali yaşayırdı. İndi Laçın rayonunun əhalisi 80 min nəfərə çatıb. Əlbəttə ki, laçınlıları qısa müddət ərzində Laçına qaytarmaq bizim əsas vəzifələrimizdən biri olacaqdır. Həmçinin, biz çalışacağıq ki, keçmiş məcburi köçkünləri işğaldan azad edilmiş bütün digər rayonlarımıza qısa müddət ərzində qaytaraq”.

Bunu Prezident İlham Əliyev xalqa müraciətində bildirib. Ümumiyyətlə, keçmiş məcburi köçkün rayonların sakinlərinin sayı 30 ildə əhəmiyyətli dərəcədə artıb.

 

  • “Dünya Bankının nümayəndələri təəccüblə bildirdilər ki, azərbaycanlılar öz torpaqlarından didərgin düşsələr də, çadırlarda yaşasalar da, burada doğumun sayı digər yerlərdən heç də az deyil, çoxdur”

Məcburi köçkün rayonlarının əhali artımının kifayət qədər çox olduğunu deyən tanınmış sosioloq, professor Əhməd Qəşəmoğlu bizimlə söhbətində bildirdi ki, Prezident İlham Əliyevin qeyd etdiyi faktlar tamamilə əsaslıdır. Son 30 ildə öz torpaqlarından didərgin düşən və qaçqın-köçkün həyatı yaşamaq taleyi ilə üzləşən vətəndaşlarımızın sayında kifayət qədər artım olduğunu deyən Ə.Qəşəmoğlu qeyd etdi ki, bu amil, bütün hallarda, bizim xeyrimizədir: “Bizim əhali arasında həmişə artım müşahidə olunur. Təbii ki, indiki dövrdə əhali artımı bizim xeyrimizədir. Çünki artıq torpaqlarımızın 20 faizi işğaldan azad olunub və biz bu torpaqlarda abadlıq-quruculuq işləri aparmalıyıq. Buna görə də bizim əhalinin artması, xüsusən də Ermənistanın təcavüzü nəticəsində öz yer-yurdundan didərgin düşən ailələrdə böyük artımın baş verməsi çox müsbət haldır. Bizdə bir adət-ənənə var. Lap qədimlərdən biz övladsevər xalq olmuşuq, uşaqlara xüsusi rəğbətimiz, sevgimiz olub, uşaq doğulmasına böyük önəm vermişik. Keçən əsrin 60-cı illərində Azərbaycanda doğulan uşaqların sayı daha çox  idi. Orta hesabla bir ailəyə 4-5 uşaq düşürdü. Sonra bütün dünyada əhali artımı, inkişafı ilə bağlı həyata keçirilən siyasətlər, baş verən proseslər bizim ölkədə də əhali artımını müəyyən qədər səngidib. Mənim də həmişə təbliğ etdiyim və bu yöndə sənədlərin də qəbul edilməsində iştirak etdiyim bizim əsas demoqrafiya siyasətimiz belədir ki, biz 3 uşaqlı ailənin tərəfdarıyıq. Yəni bir ailədə üç uşağın olması ölkədə demoqrafik inkişafı təmin edir. Ailədə bir uşaq olanda əhali sürətlə azalır, həmin uşaqda sosiallaşma lazımi dərəcədə getmir, iki uşaq olanda evdə uşaqlar arasında münaqişələr çoxalır, üç uşaq olanda isə vəziyyət normal olur. Bizim ölkədə də kifayət qədər üçuşaqlı ailə var.

Köçkün-qaçqın ailələrinin sayının son 30 ildə artması çox müsbət göstəricidir. Cənab Prezidentin qeyd etdiyi bu məsələ tamamilə əsaslıdır, gözəl bir göstəricidir. Köçkün əhalinin sayının böyük sürətlə artması səbəbsiz deyildi, birincisi, bu bizim xalqımızın övlada bəslədiyi gözəl münasibətin, digər tərəfdən isə o ailələrə göstərilən dövlət qayğısının təzahürüdür.

Özü də belə ailələrdə baş verən artım əsasən gənclərin sayı ilə bağlıdır. Onların əksəriyyəti istehsalatla, quruculuqla məşğul ola biləcək yaşdadırlar. Biz o zaman qaçqın, məcburi köçkünlər üçün salınan çadır şəhərciklərində olarkən hər ailədə yeni doğulan körpələrin olduğunu müşahidə etdik. Hətta yadımdadır, Dünya Bankının əməkdaşları ilə bir layihə üzrə Bərdənin yaxınlığında salınan çadır şəhərciyinə getmişdik. Dünya Bankının nümayəndələri təəccüblə bildirdilər ki, azərbaycanlılar öz torpaqlarından didərgin düşsələr də, çadırlarda yaşasalar da, burada doğumun sayı digər yerlərdən heç də az deyil, çoxdur. Bu o deməkdir ki, bizim xalqımız ən ağır, çətin şəraitə düşəndə də uşaq doğumuna xüsusi diqqət yetirir, ölkənin əhali artımını düşünür, öz uşaqlarına qayğı göstərir. Əlbəttə, qaçqınlıq, köçkünlük əhalimizin artımına əngəl ola bilmədi və biz inkişaf etdik. Övlad dünyaya gətirmək xalqımızın ən gözəl xüsusiyyətlərindən biridir” - deyə Ə.Qəşəmoğlu bildirdi.

İradə SARIYEVA

Son xəbərlər