Ermənistan ordusunun bu zərbədən sonra özünə gələ biləcəyinin mümkünlüyü - Prezidentin çıxışından çıxan sual...

Rasim İsgəndərov: “Ermənistan aldığı yaradan bir müddət özünə gələ bilməyəcək”

img

“Müharibə dövründə Ermənistan ordusunu, demək olar ki, məhv etdik. Mən müharibə dövründə müntəzəm olaraq düşmənin hərbi texnikasının məhv edilməsi ilə bağlı Azərbaycan xalqına məlumat verirdim. Artıq müharibə başa çatıb və bölgədə yeni dövr başlayır".

Bu sözləri dövlət başçısı İlham Əliyev dekabrın 1-də xalqa müraciəti zamanı deyib. Prezident qeyd edib ki, 44 günlük müharibə zamanı Ermənistan ordusunun çoxlu sayda texnikası qənimət kimi götürülüb. Qalanları isə məhv edilib: “Bunlar deməyə əsas verir ki, Ermənistan ordusu yoxdur, məhv etmişik. Bu ordu onilliklər ərzində yaradılırdı. Otuz il ərzində yığdıqları texnikanı 44 gün ərzində məhv etdik. Yoxdur Ermənistan ordusu, yoxdur. İndi onlar canlı qüvvəsinin də məhv edilməsi ilə bağlı saxta rəqəmlər verirlər. Bizdə məlumat var. Lazım olanda biz o məlumatı səsləndirəcəyik, işğalçı dövlət nə qədər canlı qüvvə itirib. Biz məhv etmişik Ermənistan ordusunu. Məhz buna görə məcbur olub, diz çöküb bizim qabağımızda və kapitulyasiya aktına imza atıb. Hər kəs üçün bu, dərs olmalıdır".

Ümumiyyətlə, işğalçı ölkə məlum zərbədən sonra bir daha özünə gələ biləcəkmi?

  • “…çox böyük problemlərə yol açacaq”

Hərbi ekspert Rasim İsgəndərov bildirdi ki, Azərbaycan Ordusunun 44 gün ərzində Ermənistan üzərində parlaq qələbə qazanmasının səbəblərindən biri hərbi texnikanın daha müasir olmasıdır: “Son bir neçə ildə Azərbaycanın dövlət büdcəsindən irihəcmli vəsaitlər məhz ordunun inkişafına, onun təchizatının yüksəlməsinə ayrılıb. Uğurun başqa bir sirri odur ki, Azərbaycan bu müharibəyə daha hazırlıqlı idi. Texnika məsələni həll etmir, texnikanı idarə edən əsgər və zabitlərimizdir. Bu baxımdan, Azərbaycan əsgəri daha peşəkar tərpəndi və bu peşəkarlıq nəticəsində də qələbəni əldə edə bildik. Azərbaycan Ordusu ən çətin döyüş tapşırıqlarını çox böyük rəşadətlə yerinə yetirdi

Azərbaycan, sözün həqiqi mənasında, bu müharibə ilə tarix yazdı. Ölkəmiz Ermənistanı diz çökdürdü. Ermənistan aldığı yaradan bir müddət özünə gələ bilməyəcək, bəlkə də heç vaxt güclənə bilməyəcək.

Nəzərə almaq lazımdır ki, daxili və siyasi arenada gərginliklər artıq başlayıb, uzun müddət davam edəcək. Müharibənin vurduğu sosial və iqtisadi problemlər var. Bu problemlər milyardlarla dollarla ölçülür. Təbii ki, bu problemlərin aradan qaldırılması Ermənistan kimi kasıb dövlətə heç də rahat başa gəlməyəcək. Çünki Ermənistan ordusunun xeyli sayda canlı qüvvəsi məhv edilib. Həmin hərbçilərin ailələrinə kompensasiya ödənilməsi məsələsi də var. Eyni zamanda, ordunun məhv olunmuş hərbi texniki bazasının yenidən bərpa edilməsi və digər məsələlər çox böyük problemlərə yol açacaq. Hesab edirəm ki, siyasi iqtidardan asılı olmayaraq, Ermənistan 5-10 il özünə gələ bilməyəcək”.

Günel CƏLİLOVA

Son xəbərlər