“Laçın rayonunun işğal altına düşməsi böyük faciə idi. Mən bir daha demək istəyirəm ki, hər bir rayonun işğal altına düşməsi faciə idi. Amma Laçın rayonunun işğalı imkan verdi ki, artıq Ermənistan ilə Dağlıq Qarabağ arasında yol bağlantısı olsun. 1992-ci ilin may ayında Şuşanın işğalından bir neçə gün sonra Laçının işğal altına düşməsi böyük itkimiz idi. Artıq Ermənistan bu dəhliz vasitəsilə silah-sursat, canlı qüvvə göndərirdi. Əlbəttə ki, bu, böyük itkilərə gətirib çıxardı. Ondan təxminən bir il sonra Kəlbəcər rayonu işğal altına düşdü.
Demək olar ki, bütün bunlar sonrakı işğal üçün zəmin yaratdı. Onu da bir daha demək istəyirəm ki, Laçın rayonu işğala məruz qalanda Bakıda hakimiyyət uğrunda mübarizə gedirdi. Bu mübarizəni aparanlar Laçını, Şuşanı, Kəlbəcəri düşmənə satdılar, demək olar ki, Azərbaycan dövlətçiliyini uçurum kənarına qoydular. Biz bütün bu tarixi yaxşı xatırlayırıq. Bu gün Laçın rayonunu bir güllə atmadan, bir şəhid vermədən işğaldan azad etmək böyük qələbəmizdir”. Bunu Prezident İlham Əliyev xalqa müraciətində bildirib.
“AXC-Müsavat cütlüyü ilə mütəllibovçular arasında gedən hakimiyyət uğrunda mübarizənin predmeti də torpaqlarımızın düşmənə satılması idi”
“Səs” qəzeti və eyni adlı informasiya agentliyinin rəhbəri, politoloq Bəhruz Quliyev bizimlə söhbətində, ilk növbədə, Laçının işğaldan azad edilməsi, yenidən bizə qayıtması münasibətilə Ali Baş Komandanımız İlham Əliyev başda olmaqla bütün Azərbaycan xalqını təbrik etdi. “Ali Baş Komandanımızın rəhbərliyilə şanlı ordumuz torpaqlarımızı işğaldan azad etdi. Bilirik ki, noyabrın 10-da üçtərəfli bəyanat imzalandı və bununla da Ermənistan tərəfi təslimçilik aktına imza atdı. Bundan sonra Kəlbəcər, Ağdam və Laçın rayonlarının bizə qaytarılması prosesi baş verdi. Artıq bu proses başa çatıb. Cənab Prezident öz çıxışında həmin dövrdə Azərbaycanda olan siyasi hakimiyyətin başının Bakıda hakimiyyət çəkişməsinə qarışdığını vurğuladı. O bunu çox dəqiqliyi ilə ifadə etdi. İndiyə qədər xalqa bütün müraciətlərində bu prosesi tam dəqiqliyi ilə xalqa çatdırıb. Bilirsiniz ki, müharibə dövründə cənab Prezident bir neçə gündən bir xalqa müraciət edirdi və müraciətlərində bəzi detallara toxunurdu. Son müraciətlərində o dövrkü siyasi hakimiyyət cənab Prezident tərəfindən ittiham edildi. Hətta bundan öncə Kəlbəcər bizə qaytarıldıqdan sonra cənab Prezident çıxışında keçmişdə hakimiyyətdə olan bugünki müxalifət rəhbərlərini Paşinyanla müqayisə etdi. Bu müqayisə həqiqətən də dəqiq, yerində edilən bir müqayisədir. Çünki o dövrdə torpaqlarımızın əksəriyyəti hakimiyyət uğrunda gedən mübarizənin qurbanı oldu. Bir tərəfdən, torpaqlarımız işğal edilirdi, digər tərəfdən, işğal olunan torpaqlarımız ətrafında manipulyasiya gedirdi, siyasi dividendlər qazınılırdı. AXC-Müsavat cütlüyü özlərindən əvvvəlki hakimiyyəti ittiham edirdi və torpaqlarımızı düşmənə verib hakimiyyətə nail olmaq cəhdləri edirdi. Mütəllibov hakimiyyəti ilə AXC-Müsavat hakimiyyəti arasında hakimiyyət uğrunda mübarizə gedirdi. Hər iki qüvvə torpaqları satmaq, düşmənə vermək yolu ilə hakimiyyətlərini möhkəmləndirmək uğrunda savaşırdı, Qarabağ cəbhəsində isə qanlı döyüşlər gedirdi. AXC-Müsavat cütlüyü ilə mütəllibovçular arasında gedən hakimiyyət uğrunda mübarizənin predmeti də torpaqlarımızın düşmənə satılması idi. Faktiki olaraq, o hakimiyyət tərəfindən 1992-ci ilin may ayının 18-də Laçın rayonunun düşmənə satılması baş verdi. Həmin dövrdə Laçının, Kəlbəcərin düşmənə verilməsi də hakimiyyət uğrunda mübarizənin üzərində quruldu, rayonlarımız AXC-Müsavat cütlüyünün hakimiyyət hərisliyinə qurban getdi. Sözün əsl mənasında, çox qəribədir ki, o dövrkü hakimiyyət siyasi hakimiyyəti xalqın, dövlətin maraq və mənafelərindən, ərazi bütövlüyümüzdən də, suverenliyimizdən də üstün tuturdu. Hakimiyyət hərisliyi onların gözlərini o dərəcədə tutdu ki, hətta ümumdövlət, xalq maraqları arxa plana keçdi. Ən nəhayət, torpaqlarımız bir-birinin ardınca düşmən əlinə keçdi. Cənab Prezident AXC-Müsavat iqtidarının torpaqlarımızı düşmənə satdığını dəqiqliyi ilə ifadə etdi. Gizlin deyil ki, o dövrdəki yarıtmaz iqtidar, təsadüf nəticəsində hakimiyyətə gələnlər torpaqlarımızı düşmənə təslim etdilər, satdılar. Bilirsiniz ki, o dövrdə kadr siyasəti də düzgün qurulmamışdı. Məsələn, hərbidən xəbərsiz bir riyaziyyat müəlliminin müdafiə naziri olması buna nümunədir. Yadınızdadırsa, o deyirdi ki, Şuşa getsə, başıma bir güllə çaxacağam. Amma Şuşa getdi, Rəhim Qazıyev başına bir güllə çaxmadı. Yəni sözümün canı odur ki, düzgün kadr siyasətinin aparılmaması, vəzifəyə qoyulan adamların bilik və bacarığına əhəmiyyət verilmədən siyasi partiya mənsubluğunun əsas götürülməsi və hakimiyyətə gətirilməsi bu cür faciələrə yol açdı. Bilirsiniz ki, o dövrkü siyasi iqtidar insanları vəzifəyə yalnız onun siyasi mövqeyinə görə gətirirdi. Bu da, ümumilikdə, dövlət maraqlarının əksinə idi. Bunun acı nəticələrini xalqımız gördü, bu faciələri yaşadı. Bir tərəfdən qanuna, başqa bir tərəfdən isə ərazi bütövlüyümüzə, suverenliyimizə hörmətsizlik sərgilədilər. Eyni zamanda, düzgün aparılmayan kadr yerləşdirilməsi nəticəsində iqtisadiyyatımız dağıldı, tənəzzülə uğradı.
Bir məqamı da qeyd edim ki, onların hakimiyyəti dövründə cəbhədə qanlı döyüşlər getdiyi vaxtda ordu çox zəif idi, hərəsinin öz ordusu vardı, hər biri də öz ordusunu başına yığıb Bakıya gətirirdi və şəhərdə hakimiyyətin ələ keçirilməsi üçün çevriliş cəhdləri edirdilər. Ordudan öz şəxsi məqsədləri üçün istifadə edərək, ordu vasitəsilə hakimiyyət çevrilişinə cəhd göstərirdilər”.
B.Quliyev bildirdi ki, AXC-Müsavat iqtidarı torpaqlarımızın düşmən əlinə keçməsində birbaşa məsuliyyət daşıyır. “Başı Bakıda hakimiyyət uğrunda mübarizəyə qarışan AXC-Müsavat cütlüyünün düşmənə satdığı torpaqları bu gün cənab Prezident xalqımıza qaytardı. Bu torpaqların düşmən işğalından azad edilməsi ölkə başçımızın böyük sərkərdəlik, diplomatik bacarığı nəticəsində baş verdi. Prezidentin apardığı məqsədyönlü, düşünülmüş, praqmatik siyasət bizi öz torpaqlarımıza qovuşdurdu. Ən əsası odur ki, Azərbaycan xalqının 28-30 illik həsrətinə son qoyulur. Bu gün Azərbaycan xalqı öz Ali Baş Komandanının, Prezidentinin, müzəffər sərkərdəsinin ətrafında sıx birləşərək, Azərbaycanın ərazi bütövlüyünün bərqərar olması istiqamətində vahid cəbhədə birləşə bildi”.
B.Quliyev qeyd etdi ki, keçmiş hakimiyyətin öz hakimiyyətini möhkəmlətmək üçün alver predmetinə çevirdiyi torpaqlarımız ölkə başçısının rəhbərliyilə geri qaytarılıb, amma həmin qüvvələr bizim bu qalibiyyətimizi, uğurumuzu həzm edə bilmirlər: “Bu qüvvələrin düşmənə satdığı torpaqları Ali Baş Komandanımız, şanlı ordumuz işğaldan azad edib. Prezidentin həyata keçirdiyi uğurlu daxili və xarici siyasəti, yüksək diplomatik bacarığı, ölkəmizin iqtisadiyyatını gücləndirməsi, ordu quruculuğunu ən yüksək həddə qurması, nəhayət, xalq və iqtidar birliyi nəticəsində torpaqlarımız işğaldan azad edildi, Dağlıq Qarabağ münaiqşəsi arxada qaldı. Amma bu gün yenə də həmin dövrdə hakimiyyətdə olan qüvvələr hansısa nüansları tənqid etmək yolunu tutublar. Halbuki, onların özlərinin tör-töküntülərini hələ də bu gün tam yığışdırıb qurtara bilmirik. Onların 30 ildə tökdüklərini biz 30 ildə yığıb yığışdıra bilmirik. Amma yenə də görürsünüz, öz əməllərindən qalmırlar, danışmağa üzləri var. Onlar əsassız olaraq bəzi məsələlərin kökünə varmadan, onun nədən qaynaqlandığını bilmədən, bəzi iddialar irəli sürürlər, buna hansısa don geydirməyə cəhdlər göstərirlər. Ağıllı, savadlı, analitik qabiliyyəti olan adamlar isə yaxşı bilirlər ki, cənab Prezident bu münaqişənin həlli istiqamətində konkret addımlar atıb, düşünülmüş siyasət yürüdüb. Çünki nəyin nə zaman olacağını cənab Prezident yaxşı bilir” - deyə B.Quliyev qeyd etdi.
İradə SARIYEVA
