Azərbaycan Cənubi Qafqazda tam yeni siyasi reallıq yaratdı - Prezident Vətən müharibəsinin yekunlarını təhlil etdi…

img

Prezident İlham Əliyev xalqa son müraciətində deyib ki,  biz bölgəmizdə yeni reallıq yaratmışıq: "Azərbaycan yaratdı bu reallığı. Biz düşməni torpaqlarımızdan qovduq. Biz BMT Təhlükəsizlik Şurasının qətnamələrini yerinə yetirdik. Bu qətnamələr 27 il idi ki, kağız üzərində qalırdı. Bu qətnamələr 27 il idi ki, sadəcə olaraq, bir çoxları üçün kağız parçası idi, təkcə Ermənistan üçün yox, başqaları üçün də. Biz deyirdik ki, beynəlxalq hüquq bizim tərəfimizdədir, BMT Təhlükəsizlik Şurasının qətnamələri tələb edir, işğalçı qüvvələr torpaqlarımızdan çıxsın. Amma bunun nəticəsi olmadı. Biz beynəlxalq hüquq praktikasında və bölgəmizdə yeni reallıq yaratdıq. Biz BMT Təhlükəsizlik Şurasının qətnamələrini icra etdik. Biz ərazi bütövlüyümüzü bərpa etdik. Biz işğala son qoyduq. Ümid edirəm ki, biz bölgədə bu gün və gələcək üçün yeni təhlükəsizlik, yeni əməkdaşlıq formatını təşkil etdik. Bu format nədən ibarət olacaq, bunu həyat göstərər. Hər halda biz bu yeni əməkdaşlıq formatının yaradılması üçün lazımi işləri gördük, öz torpaqlarımızdan düşməni qovduq və noyabrın 10-da imzalanmış Bəyanatda göstərilən məsələlər əgər bu gün öz həllini taparsa, onda bölgəmizdə yeni əməkdaşlıq çərçivələri yaradılacaqdır".

Ölkə başçısı “biz  bölgədə yeni reallıq yaratdıq” deyəndə daha hansı amilləri nəzərdə tutur?

 “Bizim Ermənistanı gedən qatara mindirə biləcəyimizlə də bağlı anons verildi” 

Politoloq Qabil Hüseynli “Bakı-Xəbər”ə açıqlamasında bildirdi ki, Prezidentin çıxışı çox əhatəli və əhəmiyyətli notlar üzərində qurulmuşdu: “Ölkə başçısı həm də dedi ki, bəzi Qərb ölkələri bizə deyirdi ki, Ermənistan torpaqları ələ keçirməklə yeni reallıqlar yaradıb və biz bununla barışmalıyıq. Biz erməniləri öz ərazilərimizdən qovub çıxardıq. Əsl siyasi reallığı biz yaratmış olduq. Bu siyasi reallıq odur ki, bögələrdəki qüvvələr nisbətində Azərbaycanın xeyrinə əhəmiyyətli dəyişiklik baş verdi. Bu gün torpaqları geriyə qayıtmış və əraziləri bərpa etməyə başlayan Azərbaycan çox yaxın zamanlarda həmin ərazilərdən ciddi qazanc əldə edəcək. Bununla biz bölgənin iqtisadi cəhətdən daha da zəngin olan regional gücünə çevriləcəyik. Biz sənayenin, kənd təsərrüfatının, turizmin inkişafı sayəsində dünyanın ən diqqətçəkən ölkələrindən birinə çevriləcəyik. Azərbaycan insanının maddi rifah halı durmadan artacaq. Yeni reallıqlar Azərbaycanın dünyadakı proseslərə təsir imkanlarını da artıracaq. Biz onsuz da dünyada fəal aktor idik. Bundan sonra daha dinamik olacağıq”.

Ekspertin sözlərinə görə, burada söhbət Azərbaycanın beynəlxalq münasibətlərə verə biləcəyi əhəmiyyətli təsirlərdən gedir: “Ölkə başçısı vurğuladı ki, biz Ermənistanla dinc yanaşı yaşamaq, yaxın qonşuluq siyasətini reallaşdırmaq istəyirik. Hətta bölgədə  reallaşdırılan bir sıra beynəlxalq layihələr başa çatsa da, bizim Ermənistanı gedən qatara mindirə biləcəyimizlə də bağlı anons verildi. Azərbaycanın əsas hissəsilə  Naxçıvanı birləşdirəcək yeni avtomobil və dəmir yolu da açılacaq. Bununla Ermənistanın da bəzi layihələrdə iştirak etmək imkanları yaranır. Hətta Ermənistanın Bakı-Tiflis-Qars dəmir yoluna da qoşulmaq imkanları var.  Azərbaycan Prezidenti bildirdi ki, qarşıda yeni perspektivlər açılır. Biz TANAP və TAP layihəsini reallaşdırmışıq. Bizim nəzərimizdə başqa layihələr var ki, Ermənistan özünü ağıllı aparsa, biz Ermənistanı digər beynəlxalq əməkdaşlıq layihələrinə qoşa bilərik. Prezident özünün geniş həcmli çıxışında 44 günlük müharibədə Azərbaycan  ordusunun zəfəri barədə də danışdı, bizim bilmədikırimiz bir sıra faktları da açıqladı. Ölkə başçısı xalqı əmin etdi ki, müharibə qurtarsa da, biz ordumuzu daha da gücləndirəcəyik. Bölgədəki siyasətimiz sülh olsa da, bizə qarşı hər hansı təxribat olarsa, dərhal cavabımızı verəcəyik. Azərbaycan Prezidenti yeni, güclü, qüdrətli, xalqın öz rəhbərinin ətrafında sıx birləşdiyi ölkənin konfiqurasiyasından danışdı”.

Ekspertin sözlərinə görə, bu təməllərə söykənən ölkə, müharibədə olduğu kimi, bundan sonrakı fəaliyyətində də bizə uğur nəsib edəcək.

Məhəmmədəli QƏRİBLİ

Son xəbərlər