Ermənistanın birinci prezidenti Levon Ter-Petrosyan baş nazir Nikol Paşinyanı “ümummilli bəla” adlandırıb. Erməni KİV-i xəbər verir ki, Ter-Petrosyan bu qiymətləndirməni Paşinyanın son açıqlamalarına cavab olaraq verib. Paşinyan bildirmişdi ki, Qarabağda müharibə gedəndə həqiqətən eks-prezidentlər Levon Ter-Petrosyan və Robert Köçəryan Moskvaya, Putinlə görüşə getmək istəyirdi. Amma onların “xüsusi nümayəndə” statusunda Putinlə görüşməsi şərti irəli sürüldüyü üçün buna razı olmayıb.
Buna cavab olaraq, Ter-Petrosyan özünün mətbuat katibi Arman Musinyan vasitəsilə Paşinyanı “ümummilli bəla” adlandırıb. Bildirib ki, nə deməyindən asılı olmayaraq, onun özünə bəraət qazandırmaq şansı yoxdur və erməni xalqı heç vaxt onu bağışlamayacaq:
“Prezident Ter-Petrosyan milləti məhvə aparan bu “ümummilli bəla”nın xəstə təxəyyüllərini şərh etməyi mənasız sayır. Qoy nə istəyir desin. İstənilən halda özünə bəraət qazandırmaq şansı yoxdur. Erməni xalqı heç vaxt onu bağışlamayacaq”.
Qeyd edək ki, 2000-ci illərdə Paşinyan Ter-Petrosyanın yaxın tərəfdaşlarından biri idi və onu özünün müəllimi adlandırırdı. Ermənistanda hətta ən yaxın adamlarının belə Paşinyandan imtina etməsinin səbəbi nə ilə bağlıdır?
“O bilir ki, indiki halda Paşinyanın yanında olmaq öz üzərindən də xətt çəkmək anlamına gəlir”
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, bunların bir səbəbi də Paşinyanın daxili və xarici auditoriya üçün etdiyi davranışlarla bağlıdır: “Fikir verirsinizsə, Paşinyan hər vəchlə yaranmış vəziyyətlə bağlı məsuliyyəti tam olaraq öz üzərinə götürmək istəmir. Ortada məğlub olmuş Ermənistan var. Müxalifət bunun səbəbini Paşinyanda görür. Paşinyan isə bu ağır məsuliyyəti tam bölüşmür. Hesab edir ki, hərbi uğursuzluğun kökü daha dərinlərə gedir. O, açıqlamalarında da bildirir ki, özündən əvvəlki korrupsioner hakimiyyətlər ordu quruculuğu əvəzinə rüşvət yığmaqla məşğul olublar. Xüsusilə də müharibənin gedişi ilə bağlı qəbul edilən qərarların geçikməsini tərəflər bir-birinin üzərinə atır. Artıq Ermənistan müxalifəti də Paşinyanı müharibəni zamanında dayandırmamaqda ittiham edir. Əvvəl isə onlar müharibəni niyə dayandırdığına görə onu tənqid edirdilər. İstənilən halda, bu uğursuzluq Paşinyanın dönəmində yaşanıb və buna görə də onun məsuliyyət payı daha çoxdur. Ter-Petrosyan təcrübəli siyasətçidir. O bilir ki, indiki halda Paşinyanın yanında olmaq öz üzərindən də xətt çəkmək anlamına gəlir. Bundan əlavə, Paşinyan onları ən ağır dönəmdə səlahiyyət istəməkdə ittiham edir. Paşinyanın üzərinə getməklə Ter-Petrosyan həm də özünü müdafiə etmiş olur. Düşünürəm ki, Ter-Petrosyanla Paşinyanın ziddiyyətinin kökü bir az da əvvələ təsadüf edir. Eks-prezident güzəştin tərəfdarı olub, hətta bununla bağlı onun məşhur bir yanaşması da var. Ancaq Qarabağ klanından olan eks-prezidentlər onun dediklərini nəzərə almayıblar. Paşinyan hakimiyyətə gələndə, görünür, Ter-Petrosyan ondan ağıllı addımlar atacağını gözləyib, ancaq bunu görməyib. Faktiki olaraq, Paşinyan güzəştə gedib. Paşinyan belə bir rəy formalaşdırırdı ki, güya ölkə daxilində onu ancaq Rusiyanın adamları istəmir. Ter-Petrosyan Qərbmeyilli siyasətçi kimi tanınır. Onun bu mövqeyi göstərir ki, Paşinyanı heç həmin dairələr də istəmir. Bu da indiki Ermənistan hakimiyyətinin çox acınacaqlı vəziyyətdə olmasından xəbər verir. Yəqin ki, yaxın zamanlarda müxtəlif qütblərdən ibarət anti-Paşinyan koalisiyası formalaşacaq”.
Ekspertin sözlərinə görə, belə siyasi münasibətlər sistemində Paşinyanın çox duruş gətirə biləcəyi inandırıcı görünmür.
Məhəmmədəli QƏRİBLİ
