Ermənistanın işğalçılıq siyasətini, təcavüzkarlığını, terrorçu dövlətin Azərbaycanın dinc əhalisinə qarşı təxribatlarını, terror aktlarını ifşa edən, Azərbaycanın ədalətli mövqeyini işıqlandıran xarici media orqanları erməni lobbisi tərəfindən hədəfə alınır, onlar ölümlə təhdid edilir. Bu gün Ermənistana hərtərəfli dəstək verən Fransada obyektiv jurnalistlər terror təhlükəsi ilə üzləşirlər.
Məlum olduğu kimi, Fransada Dağlıq Qarabağ münaqişəsi haqqında reportajın müəllifi olan jurnalist kəskin tənqidlərə, erməni təhdidlərinə məruz qalıb. İş o yerə çatıb ki, artıq “Sərhədsiz reportyorlar”ın dili “açılıb”.
“Sərhədsiz reportyorlar” TF 1 televiziyasının jurnalistinin Dağlıq Qarabağ münaqişəsi haqqında hazırladığı reportajın yayımından sonra ona qarşı internet üzərindən sərt hücumların olduğunu, yalnız işini görən bir peşəkarın nifrət dolu mesajlarla ittiham edildiyini bəyan edir.
22 oktyabr tarixində TF 1 kanalında “saat 20” verilişində Azərbaycanın cəbhə xəttindən, Dağlıq Qarabağ regionunda döyüşlərin yenidən başlanmasından bəhs edən reportajın yayımından sonra jurnalist və böyük reportyor Liseron Budul Fransanın erməni icması tərəfindən “Facebook” və “Twitter” sosial şəbəkələri üzərindən güclü nifrət dolu saysız mesajın hədəfinə çevrilib və onu “genosid törədənlərin fahişəsi” kimi qələmə veriblər. Eyni zamanda, jurnalistin telefon nömrəsi əldə edildikdən sonra “WhatsApp” üzərindən də təzyiqə məruz qaldığı deyilir. Televiziya kanalı da, həmçinin, sistematik olaraq, sosial şəbəkələr, elektron poçt ünvanı və telefon zəngləri ilə narahat edilib.
Oktyabrın əvvəli digər iki fransız jurnalisti də Dağlıq Qarabağ münaqişəsi haqqında dərc etdikləri məqalələrdən sonra internet üzərindən erməni icmasının təhdidləri ilə üzləşib.
“Sərhədsiz reportyorlar”ın AI və Balkanlar bürosunun rəhbəri Pavol Szalai Liseron Budul və TF 1 -ə qarşı olan təzyiqləri qətiyyətlə pisləyir. “Münaqişə və cəbhə xəttindən yerindəcə reportaj hazırlamış hər hansı bir jurnalistin və medianın bununla bağlı narahat edilməsi qəbuledilməzdir. Bundan başqa, Fransa erməni təşkilatlarının koordinasiyası şurasının həmsədri Frank Papazyanı mətbuat azadlığına qarşı işlənmiş kobud hücuma qarşı eyhamlı danışıqları pisləməyə çağırırıq” - deyə məlum bəyanatda bildirilir.
Məlumatlara görə, “Facebook” üzərindən yayımlanan reportaj haqqında “dezinformasiyaya bənzəyir” fikri yayımlanıb. Digər şərhlərdə isə belə mesajlarla qarşılaşırıq: “Ola bilər ki, TF 1-in bir neçə işçisinin başı kəsildikdən sonra daha yaxşı və aydın düşünər”. Ertəsi gün reportajın yayımından sonra Fransada yaşayan erməni icması münaqişədə inad göstərən tərəf kimi kanalın binası qarşısında etiraz aksiyası keçirib.
TF 1 bir neçə gün öncə erməni cəbhəsindən iki ölkə arasındakı münaqişədən bəhs edən reportaj hazırlamışdı. Nəhayət, kanal gərginliyi azaltmaq üçün Liseron Budulun reportajını öz saytından silib.
Fransanın TF 1 kanalının əməkdaşı Liseron Budula qarşı təşkil olunan hücumların “Sərhədsiz reportyorlar” təşkilatı tərəfindən pislənməsi faktı artıq dünyanın diqqətini obyektiv jurnalistə qarşı gözlənilən erməni terror təhlükəsinə yönəldib.
Ekspertlər hesab edirlər ki, “Şarl Ebdo” nəşri ilə bağlı baş vermiş hadisə zamanı dünya müsəlmanlarının çoxsaylı etirazına məhəl qoymayaraq, demokratik azadlıqların müdafiəsinə qalxan Fransa hökumətindən analoji mövqe nümayiş etdirilməsi gözlənir. Ekspertlərin fikrincə, Fransa hökuməti erməni terrorunun qarşısının alınması istiqamətində işlər görməlidir.
Bəzi ölkələrdə, o cümlədən də Fransada erməni terror təşkilatlarının, ifrat erməni radikal dəstələrinin Dağlıq Qarabağda baş verənlərlə bağlı obyektiv mövqe nümayiş etdirən jurnalistlərə, ictimai-siyasi xadimlərə qarşı təhqir və hədə-qorxu addımları ciddi narahatlığa səbəb olur.
Bu gün erməni terror təşkilatlarının dünyanın müxtəlif ölkələrində, o cümlədən də Fransada obyektiv yazan, obyektiv mövqe işıqlandıran jurnalistləri terrorla hədələməsinin həqiqəti deyən jurnalistləri susdurmaq məqsədi güddüyünü deyən ekspertlər hesab edirlər ki, məsələ ilə bağlı Fransa hökuməti adekvat tədbir görməlidir.
“Fransalı jurnalistə qarşı erməni terrorçularının beynəlxalq konvensiyalara, söz azadlığına zidd olan hədələrinin, təhdidlərinin “Sərhədsiz reportyorlar” tərəfindən pislənməsi...”
Azərbaycan Mətbuat Şurasının sədr müavini, media üzrə tanınmış ekspert Müşfiq Ələsgərli “Bakı-Xəbər”ə şərhində bildirdi ki, Azərbaycan uzun illərdir müxtəlif beynəlxalq media təşkilatları ilə işləyir. “Əvvəllər də Azərbaycanda və Ermənistanda söz azadlığı ilə bağlı müqayisələr ediləndə görürdük ki, beynəlxalq təşkilatlar həmişə Ermənistanın tərəfini tuturlar. Çünki bunun da səbəbi var. Bu da onunla bağlıdır ki, bu təşkilatlar daim xaricdəki erməni terror təşkilatlarının təsiri altındadır. Onlar bizimlə qeyri-rəsmi görüşlərində deyirdilər ki, biz Azərbaycanın xeyrinə, Ermənistanın əleyhinə bir söz yazanda ciddi şəkildə basqılara məruz qalırıq. Onlar beynəlxalq media qurumlarına şirnikləndirici vədlər verirlər, bu alınmayanda təhdid edir, hədə-qorxu gəlirlər. Əslində, Ermənistanın özündə də daim söz azadlığı basqı altındadır. Erməni terror şəbəkəsinin təsiri altında olan ölkələrdə də Azərbaycanın xeyrinə yazan jurnalistlərə, mətbuat orqanlarına qarşı basqılar edilir. Uzun illərdir bu proses gedir. “Sərhədsiz reportyorlar”ın barəsində bəyanat yaydığı fransalı jurnalistə qarşı erməni terror təşkilatlarının hədə-qorxusu, təhdidləri də onu deməyə əsas verir ki, Fransa kimi dövlətdə də ermənilər jurnalistlərə qarşı terror əməlləri törətməyə əl atırlar. Bu baxımdan, fransalı jurnalistə qarşı erməni terrorçularının beynəlxalq konvensiyalara, söz azadlığına zidd olan hədələrinin, təhdidlərinin “Sərhədsiz reportyorlar” tərəfindən pislənməsi diqqəti çəkir. Bununla da “Sərhədsiz reportyorlar” erməni terrorunun növbəti bir jurnalisti də hədəfə aldığından narahat olduğunu göstərmək istəyir. Burada maraq doğuran bir məqam var. Fransa kimi bir dövlət öz ərazisində bu kimi halların yaşanmasına yol verməməlidir. Məsələnin kökü ondadır ki, doğrudanmı Fransa bu qədər zəif dövlətdir, bu ölkənin hüquq-mühafizə, xüsusi xidmət orqanları o qədər acizdir ki, bir televiziyanın və onun əməkdaşının təhlükəsizliyini təmin edə bilmir. Başqa bir ölkədə söz və ifadə azadlığı ilə bağlı kiçik bir problem olanda həmin dəqiqə Fransadakı qondarma söz azadlığı maşını işə düşür, dərhal bəyanatlar verilir, amma öz ölkəsində, öz ərazisində bir televiziya jurnalisti erməni terrorçuları tərəfindən təhdid olunur, ölümlə hədələnir, amma Fransa dövlətindən bir hərəkət yoxdur. Fransa dövləti bu faktla bağlı tədbir görməlidir. Amma baxaq görək, Fransa hökuməti TF 1 kanalının müdafiə olunması, jurnalistin təhlükəsizliyinin, haqqının qorunması üçün hansı addımları atıb? Burada iki məsələ ortaya çıxır. Ya Fransa dövləti çox çarəsiz, aciz durumdadır, doğrudan da erməni lobbisinin, erməni terror şəbəkəsinin girovuna çevrilib, onun təsiri altındadır və bu səbəbdən də hadisəyə reaksiya vermir. Ya da məsələ belədir ki, Fransa bu fakta ikili yanaşma sərgiləyir. Yəni Fransanın burada öz marağı var, həmin reportajda Azərbaycanın ədalətli mövqeyi, haqq işi təqdim edildiyinə görə bu ölkə jurnalistini müdafiə etməkdə maraqlı deyil”.
M.Ələsgərlinin fikrincə, işin gedişatı onu göstərir ki, Fransada hər iki hal mövcuddur. Onun sözlərinə görə, bu məsələnin kökündə həm ikili münasibət, təzad, həm də Fransanın hüquq-mühafizə və xüsusi xidmət orqanlarının aciz durumda olması dayanır. “Çünki bu, Fransada mətbuata qarşı baş verən birinci və sonuncu terror hadisəsi deyil. Xatırlayırsınızsa, 2015-ci ildə “Charlie Hebdo” satirik nəşrinə qarşı böyük terror aktı baş verdi və 15 nəfərə yaxın media təmsilçisi öz həyatını itirdi. Fransa hüquq-mühafizə orqanları törədiləcəyi əvvəlcədən bildirilən bu terrorun qarşısını ala bilmədilər. Bu onu göstərir ki, burada Fransanın siyasi qurumları Azərbaycan və Türkiyə ilə bağlı ədalətli fikrin, həqiqətlərin təqdim edilməsini qətiyyən istəmirlər. Ona görə də bəlkə də onlar erməni terror şəbəkəsinin bu əməllərinə göz yumurlar. Amma, bununla belə, bu hadisə bu ölkənin erməni terror şəbəkəsi qarşısında acizliyini göstərir. Bu da yüz illər boyu formalaşmış, özünə demokratik ölkə kimi ad qazanmış Fransanın imicinə zərər gətirir. Hesab edirik ki, Fransa bu barədə düşünməli və terrorçulara adekvat cavab verməlidir” - deyə M.Ələsgərli vurğuladı.
İradə SARIYEVA
