Rusiya mediası yazır ki, Azərbaycan Ordusu artıq erməni tərəfdən nisbətən təlim keçmiş hərbçiləri məhv edib. Sözügedən məsələ ilə bağlı qeyd edilir ki, əslində, ermənilərin elan etdiyi itkilərin sayı deyildiyindən daha çoxdur.
Bununla bağlı maraqlı müqayisələr də aparılıb: “İtkilər çoxdur və artmaqda davam edir. Ermənistanın sərhəd xidməti 37 ölü, 4 itkin düşən və 243 nəfərin yaralandığını bildirib. Bundan yola çıxaraq asanlıqla hesablaya bilərik ki, bir ölüyə ən azı altı yaralı düşür. Əgər bu gün Ermənistan rəsmi olaraq 1009 nəfərin öldüyünü bildirirsə, deməli, altı min yaralısı var. Yəni bu, cəmi yeddi min itki deməkdir. Bu isə ciddi bir rəqəmdir. Ən çox təlim keçmiş hərbçilər artıq məhv edilib (baxmayaraq ki, bugünkü statistika əsasən 2000-2001-ci illərin göstəricisidir, yəni müharibədən əvvəl çağırılanların hamısı öldürülməyib). Onları ehtiyatdan çağırılan yaşlı, ailəli və harınlamışlar əvəz edir. Bunlar canının qədrini bilən, özünü güllənin altına atmayan “əsgərlərdir”. Nəm səngərlərdə yatmağa və 80 km-lik yürüşə isə sağlamlıqları imkan verməyəcək. Cəbhədən müvafiq videolar boşuna göndərilmir”.
Belə aydın olur ki, ermənilərin cəbhədə verdiyi ciddi itkilər deyildiyindən çox olmaqla yanaşı, yaxın perspektivdə işğalçı ölkə həm də ciddi əsgər çatışmazlığı problemi ilə üzləşəcək.
“Ermənilər hələlik Qarabağda müqavimət göstərsələr də, bir müddət sonra...”
Məsələyə münasibət bildirən hərbi ekspert Azad İsazadənin sözlərinə görə, Ermənistan nə qədər gizlətməyə çalışsa da, qarşı tərəfin itkiləri deyildiyindən daha böyükdür: “Reallıqda həm ölənlərin, həm də yaralananların sayı daha yüksəkdir. Məsələ ondadır ki, ermənilər öz cəsədlərinə sahib çıxmırlar. Nə qədər onların Azərbaycan tərəfdə qalan meyitləri var. Üstəlik, döyüş zamanı itkin düşənlər də var. Ermənistan demoqrafik göstəriciləri aşağı olan bir ölkədir. Bu sahədə böhran yaşayan ölkə üçün bu olduqca böyük rəqəmdir. Bir şeyi də qeyd edim ki, sözügedən itkilər requlyar ordunun itkiləridir. Döyüşə Ermənistandan əlavə könüllülər gəlirlər. Onların içində döyüş qabiliyyəti olmayanlar çoxluq təşkil edir. Bu isə o deməkdir ki, Ermənistan tərəfinin itkiləri daha da artacaq. Ermənistan dinc şəraitdə çağırış planını yerinə yetirə bilmirdi. Orduda en qədər boş yer var idi. Müharibə şəraitində isə bu problem bir qədər də dərinləşəcək. Çünki fərarilik halları artır. Vəziyyət o dərəcədə kritikdir ki, 55 yaşınadək olanları ölkə xaricinə buraxmırlar. Ermənilər hələlik Qarabağda müqavimət göstərsələr də, bir müddət sonra orduda əsgər çatışmazlığı daha kəskin formada özünü göstərə bilər”.
Hərbi ekspertin fikrincə, belə bir ehtimal böyükdür.
Vidadi ORDAHALLI
