03/12/2020 13:52
728 x 90

Erməni lobbisi ABŞ-da yəhudiləri görünməmiş şəkildə təhqir etdi - Hitlerlə müqayisə yəhudiləri ayağa qaldırdı...

Qasım Hacıyev: “Bu da faktdır ki, Ermənistanın “milli qəhrəman”a çevirdiyi Njde, Dro kimi faşist əlaltıları Hitler Almaniyasının yəhudi xalqına qarşı törətdiyi kütləvi qətliamlarda aktiv iştirak ediblər”

img

Terrorçu Ermənistan dövlətinin nasizmi, faşizmi, njdeizmi real dövlət siyasətinə çevirdiyi məlumdur. Xarici ölkələrdə fəaliyyət göstərən erməni lobbi təşkilatları da işğalçı dövlətin bütün xəstə ideyalarını yaymaq, davam etdirmək yolunu tutublar.

 

Faşist Hitlerin əlaltıları və nasizmin qulları olan Njde və digərlərinin faşistlər tərəfindən İkinci Dünya Müharibəsində yəhudi xalqına qarşı törədilən soyqırımda, kütləvi qırğınlarda xüsusi canfəşanlıq göstərdiyi məlumdur. Faşizm ideologiyasına qulluq edən erməni lobbisi Azərbaycana yaxından dəstək olan, bizim haqq-ədalət işimizi dəstəkləyən İsrail dövlətinə qarşı əsassız ittihamlar irəli sürür. Belə ki, Los Ancelesdəki erməni lobbisi İsraili nasist Almaniyası ilə eyniləşdirib.

 

Los Ancelesdə erməni lobbisinin İsraili nasist Almaniyası ilə eyniləşdirməsi ilə bağlı Bakı Şəhəri Dağ Yəhudiləri İcmasının rəhbəri Milix Yevdayevin yazdığı məqalə 22 oktyabr tarixində ABŞ-ın ən böyük yəhudi qəzetlərindən olan, Los Ancelesdə nəşr edilən “Jewish Journal” qəzetində dərc olunub.

Qeyd olunur ki, İsrailin Azərbaycana dəstəyinə etiraz olaraq Los Ancelesdəki erməni lobbisi ötən həftə İsrail Baş Konsulluğu qarşısında mitinq keçirib. Həmin mitinqdə İsrailə ünvanlı “Sizin nasist Almaniyasından heç bir fərqiniz yoxdur” şüarı nümayiş etdirilib.

M.Yevdayev Ermənistandakı antisemitizmin baş alıb getdiyini, nüfuzlu “Anti-Defamation League” yəhudi təşkilatının araşdırmasına əsasən, Ermənistanın Avropada ikinci, dünyada isə Yaxın Şərq və Şimali Afrika xaricində üçüncü ən antisemit ölkə olduğunu dilə gətirir.

Müəllif bundan başqa Ermənistanın İkinci Dünya Müharibəsi illərində nasist Almaniyası ilə əməkdaşlıq etmiş erməni general Qaregin Njdeni milli qəhrəman səviyyəsinə qaldırdığını, ona Yerevanda heykəl ucaltdığını və nasistlərə xidmət etmiş digər bir erməni general Drastamat Kanayanın adının da dövlət səviyyəsində əbədiləşdirildiyini qeyd edir. Los Ancelesdə qeyd olunan aksiyanı keçirən Erməni Gənclər Federasiyası (Armenian Youth Federation) təşkilatının da vaxtilə məhz Q.Njde tərəfindən yaradıldığını diqqətə çatdırır.

M.Yevdayev, eyni zamanda, bir neçə gün öncə Ermənistanın Almaniyanın “Almaniya üçün Alternativ” (Alternative für Deutschland) partiyasının neonasist üzvlərini Azərbaycanın işğal olunmuş ərazilərinə dəvət etdiyini bildirir.

M.Yevdayev Ermənistanın bütün bu qanunsuz və insanlıqdan kənar hərəkətlərinin fonunda yəhudi, müsəlman və xristianların çiyin-çiyinə birgə xidmət göstərdikləri Azərbaycan Silahlı Qüvvələrinin mülki əhalimizi qorumaq və Ermənistan tərəfindən işğal olunmuş torpaqlarımızı azad etmək yolunda inamla irəlilədiyini vurğulayır.

ABŞ-ın ən böyük yəhudi təşkilatlarından olan və 400 min insanı özündə birləşdirən Simon Vizental Mərkəzi (Simon Wiesenthal Center) Milix Yevdayevin məqaləsini öz “Twitter” hesabından paylaşaraq, radikal erməni lobbisinin İsraili nasist Almaniyası ilə eyniləşdirmək cəhdini iyrənc adlandırıb və Azərbaycan əhalisinin əksəriyyətinin müsəlman olmasına baxmayaraq, ölkə ərazisində xristian və yəhudilərin hüquqlarının qorunduğunu və İsraillə yaxşı münasibətlər qurulduğunu qeyd edib.

“Xaricdəki erməni lobbisinin İsrailə qarşı əsassız ittihamlar irəli sürməsi yalnız yəhudi xalqını deyil, bizi də çox hiddətləndirir”

Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev bizimlə söhbətində bildirdi ki, nasist Ermənistanın öz adını nasizmlə tarixdə heç bir əlaqəsi olmayan bir ölkəyə qoyması gülüncdür. Ermənistanın öz cinayətkar, təcavüzkar əməllərinə cəlb edə bilmədiyi bütün dövlətləri və xalqları müxtəlif üsullarla ləkələməyə cəhd göstərdiyini deyən Q.Hacıyevin sözlərinə görə, amma düşmən ölkə buna heç cür nail olmur, onun qarşısına elə faktlar çıxarılır ki, geri çəkilməyə məcbur olur. Q.Hacıyevin sözlərinə görə, İsrail dövlətinin və yəhudi xalqının, yəhudi təşkilatlarının, birmənalı olaraq, Azərbaycanın ədalətli mövqeyini dəstəkləməsindən ciddi sarsıntı keçirən Ermənistanın və onun xaricdəki separatçı lobbisinin İsrail dövlətinə qarşı əsassız ittihamlar irəli sürməsi və bu dövlətə “Sizin nasist Almaniyasından heç bir fərqiniz yoxdur” şüarını ünvanlaması yolverilməzdir, Azərbaycan xalqı da, elm adamları da bunu narazılıqla qarşılayır. “Xaricdəki erməni lobbisinin İsrailə qarşı əsassız ittihamlar irəli sürməsi yalnız yəhudi xalqını deyil, bizi də çox hiddətləndirir. Bütün dünya bilir ki, İsrail dövlətinin, yəhudi xalqının nasizmlə, faşizmlə heç bir əlaqəsi yoxdur. İkinci Dünya Müharibəsi illərində Hitler Almaniyası, faşistlər yəhudi xalqına qarşı soyqırım törədiblər. Bu faktdır. Bu da faktdır ki, Ermənistanın “milli qəhrəman”a çevirdiyi Njde, Dro kimi faşist əlaltıları Hitler Almaniyasının yəhudi xalqına qarşı törətdiyi kütləvi qətliamlarda aktiv iştirak ediblər. Ermənilərin özləri tarixdə yəhudilərə, Azərbaycan xalqına qarşı qətliamlar, soyqırımlar törədiblər. Los Ancelesdəki erməni lobbisi tərəfindən İsrail dövlətinin, yəhudi xalqının nasistlərlə eyniləşdirilməsi qəbuledilməzdir. Ermənilər XX əsrin əvvəllərində Azərbaycanın müxtəlif yerlərində soyqırımlar törədərkən daşnakların qətlə yetirdiyi insanlar arasında milliyyətcə yəhudi olanlar da vardı. Ermənilər niyə bu cinayətlərindən danışmırlar?

Bu gün İsrail dövləti Azərbaycana dəstək verir, ölkəmiz öz pulu ilə müxtəlif dövlətlərdən, o cümlədən də İsraildən silah alır. Bəli, İsrail dövləti Ermənistana silah satmır, bəyan ediblər ki, biz Azərbaycanla müharibə aparan, Azərbaycan torpaqlarına təcavüz edən dövlətə silah satmırıq. Bu da Ermənistanı ciddi şəkildə narahat edir və bu səbəbdən İsrailə qarşı həqiqətə uyğun olmayan ittihamlar səsləndirir. Ermənilər həm də bununla onlardan imtina etmiş İranın diqqətini, dəstəyini yenidən özlərinə cəlb etmək istəyirlər ki, baxın, biz sizin tərəfinizi tutub İsrailə qarşı ittiham irəli sürmüşük, siz də bizə silah ianə edin. Dilənçi xislətli Ermənistan və erməni lobbisi öz adlarını başqasına qoymaq istəsələr də, bu heç vaxt alınmır”.

Q.Hacıyev vurğuladı ki, erməni lobbisi İsraili nasist Almaniyası ilə eyniləşdirməklə, əslində, nasizmi dövlət siyasətinə çevirən təcavüzkar Ermənistanı ifşa edib. Q.Hacıyevin sözlərinə görə, bu gün dünyada faşist, nasist Almaniyasının bütün eybəcərlikləri Ermənistan dövlətinin timsalında özünü əks etdirir: “Faşist Almaniyası haqqında heç bir təsəvvürü olmayan adamların Ermənistana baxması kifayət edər ki, onlar faşizmin, nasizmin necə olduğunu gözləri ilə görsünlər. İsrail xalqı, yəhudilər faşizmdən əziyyət çəkən xalq olub, faşizmi dəstəkləyən isə həmişə ermənilər olub. Yəhudi və Azərbaycan xalqlarının dostluq, əmin-amanlıq şəraitində çiyin-çiyinə yaşadığı bütün dünyaya məlumdur. Nəinki yəhudilərlə azərbaycanlılar, eləcə də ölkəmizdə yaşayan bütün xalqlar dinclik və əmin-amanlıq içində yaşayırlar. Bu gün Azərbaycan torpaqlarının terrorçu Ermənistanın işğalından azad edilməsi üçün ölkəmizdəki bütün xalqların nümayəndələri birləşib, onlar Vətən müharibəsində vətənimizi müdafiə edirlər. Əlbəttə, bu real faktlar da düşmən Ermənistanı ciddi narahat edir. Bu baxımdan da xaricdəki erməni lobbisinin əli ilə belə təxribatlara əl atırlar. Amma bunların heç biri fayda verməyəcək. Məsələ burasındadır ki, ermənilər tarixdə heç zaman baş verməyən, uydurduqları saxta “erməni soyqırımı” ilə yəhudilərin həqiqi soyqırımını eyniləşdirməyə cəhdlər edirlər. Bu da əsassızdır. Yəhudi xalqı faşistlər tərəfindən soyqırıma məruz qalıb, bu faktdır, amma ermənilərə qarşı heç bir soyqırım olmayıb. Ermənilər İsrailin Azərbaycana verdiyi dəstəkdən o qədər qeyzləniblər ki, hətta Ermənistanda nə vaxtsa qoyulan Holokost abidəsinin üzərini qırmızı rəngdə boyayıblar. Bu da növbəti erməni təxribatıdır. Erməni lobbisi nə qədər çalışsa da, İsraillə Azərbaycanın, yəhudi və azərbaycanlıların dostluq münasibətlərini zərrə qədər də sarsıda bilməyəcək”.

İradə SARIYEVA

Son xəbərlər