Arzuxan Əlizadə: “Erməni cəmiyyətində yaranan qorxunun nəticəsidir ki, fərarilərin sayı sürətlə artır”
Prezident İlham Əliyevin möhtəşəm çıxışından sonra Ermənistanın Baş naziri Paşinyanın müraciətini erməni əhali böyük maraqla gözləyirdi. Çıxışdan əvvəl müxtəlif şərhlər vardı ki, guya Paşinyan önəmli açıqlamalarla çıxış edəcək.
Belə düşünənlər vardı ki, o hətta qondarma qurumu tanıyacaqlarını açıqlayacaq. Bəziləri isə məğlubiyyətini etiraf edib postundan istefa verəcəyini düşünürdülər. Ancaq bütün bunların heç biri olmadı. O, xalqı təhlükədə olduğuna və utanmadan qələbə çalacaqlarına inandırmağa çalışdı. Bununla səviyyəsizliyini bir daha ortaya qoymuş oldu. Məsələ ondadır ki, Paşinyan nəyin hesabına qələbə çalacaqlarını əsaslandıra bilməyib.
Bütün bunlara baxmayaraq, Paşinyan son müraciətində Qarabağda ərazi itkilərini etiraf edib. O, həmçinin, vuruşmayanları hədələyərək “əmrə tabe olmayanlar sərt şəkildə cəzalandırılacaq” ifadəsini səsləndirib. Erməni cəmiyyətində Azərbaycan Ordusunun hücumlarından kəskin qorxu hissinin yarandığını bilən Paşinyan xalqa müraciətdə “gəlin razılaşaq ki, heç nədən qorxmayacağıq” deyib.
Bu çıxış Ermənistanın işğalçı qüvvələrinin ağır itkilərə məruz qaldığını və Paşinyanın artıq kömək üçün müraciət edəcək yerinin olmadığını bir daha təsdiqlədi. Ən başlıcası isə Paşinyan çıxışı ilə bu və ya digər dərəcədə erməni cəmiyyətinin müharibədən qorxduğunu etiraf etmiş oldu. Görünən odur ki, ermənilər Azərbaycan Ordusu ilə döyüşməkdən qorxurlar.
- “Onlar internet üzərindən ordumuzun qarşı tərəfə necə zərbələr endirdiyini yaxşı görür və boş yerə ölmək istəmirlər”
Sözügedən məsələ ilə bağlı fikirlərini “Bakı-Xəbər”lə bölüşən AMİP sədri Arzuxan Əlizadənin fikrincə, Ermənistan cəmiyyətində Azərbaycanla müharibə etməyin təhlükəli olması ilə bağlı qorxu get-gedə artır: “Bununla bağlı çoxsaylı misal göstərmək olar. Əvvəla neçə müddətdir erməni cəmiyyəti ordumuzun gücünə bələddir. Onlar yaxşı bilirlər ki, Azərbaycan Ordusu 90-cı illərin ordusu deyil. Xüsusən də 2016-cı ildə baş verən 4 günlük Aprel döyüşləri erməniləri ciddi qorxuya saldı. Bundan başqa, ordumuzun müasir silahlarla təchiz edilməsi, keçirilən çoxsaylı hərbi təlim Silahlı Qüvvələrimizin döyüş qabiliyyətini xeyli artırdı. Sentyabrın 27-dən başlanan uğurlu döyüş əməliyyatları, praktiki olaraq, bunu bir daha sübut etdi. Bu müddər ərzində 4 rayon mərkəzi və çoxsaylı kənd işğaldan azad edilib. Düşmənin çoxsaylı canlı qüvvəsi və döyüş texnikası məhv edilib. Erməni cəmiyyətində yaranan qorxunun nəticəsidir ki, fərarilərin sayı sürətlə artır. Bununla bağlı çoxsaylı cinayət işi açılsa da, praktiki olaraq, ordudan yayınmanın qarşısını almaq mümkün olmur. Ermənilər internet üzərindən ordumuzun qarşı tərəfə necə zərbələr endirdiyini yaxşı görür və boş yerə ölmək istəmirlər. Ona görə də Qarabağda vuruşmaq istəmirlər. Belə olmasaydı, o zaman rüşvət müqabilində ordudan yayınmazdılar. Son günlər erməni valideyinlər övladlarını ordudan yayındırmaq üçün onların koronavirusa yoluxduqları barədə saxta arayışlar təqdim edirlər. Ermənistanın uzunmüddətli müharibə aparmaq üçün yetərli resursları yoxdur”.
Partiya sədrinin fikrincə, Paşinyan nə qədər pafoslu danışsa da, bu sahədə dönüş yarada bilməyəcək.
Vidadi ORDAHALLI
