Prezident İlham Əliyev oktyabrın 26-da İtaliyanın Rai-1 televiziya kanalına müsahibəsində deyib ki, Gümrüdəki bazadan vaxtaşırı olaraq Ermənistan silahlı qüvvələrinə təchizat göndərilir. Dövlət başçısı bildirib:
"Əməliyyatlarda Türkiyə qoşunlarının iştirakına gəldikdə isə, bu da yalandır. Heç bir sübut yoxdur. Türkiyənin F-16 təyyarəsinin Azərbaycan ərazisində olması onun nəticəsi olub ki, münaqişə ərəfəsində bizdə birgə hərbi təlimlər keçirilib. Axı biz demirik ki, Ermənistan ərazisində Rusiyanın neçə MiQ-29, Su-30 təyyarəsi var. Axı biz demirik ki, Ermənistanda, Gümrüdəki bazada Rusiyanın 5 minlik qoşunu var və bizdə olan məlumata görə, oradan vaxtaşırı olaraq Ermənistan silahlı qüvvələrinə təchizat göndərilir və bizim barəmizdə deyilənlərdən fərqli olaraq, bunlar faktdır. Ona görə də bizi ittiham etmək istəyənlərə təklif edirəm ki, yalan informasiyaya əsaslanan bu cür tez-tələsik nəticələr çıxarmazdan əvvəl özlərinə baxsınlar".
Ermənistanın bu şəkildə silahlandırılmasının arxasında kimlər durur?
Politoloq Elşən Mustafayev “Bakı-Xəbər”ə açıqlamasında bildirdi ki, Prezident bu incə detalın üstünə məcburən gəlməli oldu: “Çünki müharibə başlayandan biz ancaq Türkiyənin verdiyi dəstəkdə günahlandırırlar. Nə qədər təəccüblü olsa da, bunu həm Ermənistan bəyan edir, həm də ölkə başçısından müsahibələr götürən əcnəbi jurnalistlər. Ölkə başçısı əcnəbi jurnalistlərin ona bu mövzuda verdiyi suallardan təngə gələrək xalqa müraciətində reallığı açıqladı, ciddi xəbərdarlıq etdi. Söhbət Türkiyəyə məxsus “F-16" qırıcılarının Azərbaycanda olmasından gedir. İ.Əliyev dəfələrlə vurğulayıb ki, həmin qırıcılar hərbi təlimlərə gəlmişdi və indi yerdədir, heç bir halda istifadə edilmir. Amma xarici telekanalların jurnalistlərinin ”F-16" qırıcıları ilə bağlı sualları bitib-tükənmirdi və nəhayət, dövlət başçısı “Əgər bizə qarşı kənardan aqressiya olacaqsa, həmin ”F-16" qırıcılarını qarşılarında görəcəklər", - deyə dünyaya sərt ismarıç yolladı. Prezident dəfələrlə bildirib ki, Rusiya Ermənistanı silahlandırır. Özü də həmin silahları pulsuz verir. İndi isə konkret olaraq Gümrüdəki bazadan Ermənistan ordusuna yardımın edildiyini deyir. Həmin baza Rusiyanındır. Belə faktı ölkə başçısı səsləndirirsə, deməli, söhbət Rusiyanın Ermənistana verdiyi açıq dəstəkdən gedir. Maraqlıdır ki, Azərbaycan cəbhədə uğurlarını artırdıqca Rusiyanın Ermənistana ifadə etdiyi dəstəyin həcmi də artan dinamika ilə gedir. Rusiya münaqişənin tənzimləməsində vasitəçilik missiyasını üzərinə götürüb, yaxşı olar ki, neyrallığını qorusun”
Prezidentin reaksiyasına yenə diqqət edək: “Mənə sual verilir ki, Türkiyənin ”F-16"-ları nə gəzir sizdə? Mən cavab verməkdən yorulmuşam. Gedin açın, peykiniz var, görmürsünüz nə gəzir? Gedin baxın “F-16" neyləyir, havadadır, yerdədir? Hər kəs bilir ki, yerdədir. Özü də təlimlər üçün gəlib və müharibə başlayanda qalıbdır. Türkiyəli qardaşlarımız onları bizə mənəvi dəstək vermək üçün saxlayıblar. Bir də ki, əgər bizə qarşı kənardan təcavüz olarsa, o ”F-16"-ları görəcəklər onlar".
Şübhəsiz ki, Azərbaycanın “F-16" qırıcılarından istifadə etmək niyyəti yoxdur. Bizim hərbi potensialımız kifayət edir ki, erməni silahlı qüvvələrini darmadağın edək. Lakin Prezidentin mesajı kifayət qədər ciddi və düşündürücüdür. Yaxşı olar ki, kənar qüvvələr Azərbaycanın öz ərazisini işğalçılardan təmizləməsi əməliyyatına kobud müdaxilələr etməsin. Rusiyanın Ermənistana verdiyi dəstək isə müharibənin ömrünü daha da uzatmış olur.
Məhəmmədəli QƏRİBLİ
