03/12/2020 14:08
728 x 90

Təcavüzkar Ermənistan ordusunda “uşaq əsgərlər” - dünya KİV-də geniş əks reaksiyaların kökü...

Rauf Zeyni: “Bütün bu faktorlar Ermənistanın uşaqları orduya cəlb etməsi faktının, bu reallığın dünyaya yayılmasına...”

img

Ermənistanın orduda uşaqlardan geniş istifadə etməsi, azyaşlıları silahlı təlimlərə cəlb edərək sonradan cəbhəyə göndərməsi faktdır. İşğalçı ölkənin uşaqları orduya göndərməsini əks etdirən kifayət qədər foto, videogörüntü var ki, onların əksəriyyəti sosial şəbəkələrdə yayılıb və bu da istifadəçilərin ciddi narahatlığına səbəb olub.

 

Son günlər ictimailəşdirilən bu fakt beynəlxalq aləmin də diqqətini cəlb edib. Artıq Ermənistanın orduda uşaqlardan geniş istifadə etməsi faktına beynəlxalq aləmdə fəal əks reaksiyalar var. Müxtəlif ölkələrin KİV-ində ayrı-ayrı yüksək statuslu, ictimai rəyə təsir edən insanlar Ermənistanın bu hərəkətinə kəskin etirazlarını bildirirlər.

 

Ermənistanın orduda uşaqlardan geniş istifadə etməsi faktına beynəlxalq aləmdən gələn etirazlar nə ilə bağlıdır? Nə baş verib ki, dünyanın müxtəlif ölkələri bu fakta kəskin reaksiya verirlər?

  • “Erməni lobbisi, faktiki olaraq, bunun qarşısını ala bilmədi”

Azərbaycan Milli Qeyri-Hökumət Təşkilatları Forumunun (MQF) prezidenti Rauf Zeyni “Bakı-Xəbər”ə bildirdi ki, Ermənistan tərəfindən bəşəriyyət əleyhinə müharibə cinayətlərinə uşaqların cəlb edilməsinin dünyanın müxtəlif yerlərində etirazla qarşılanmasının səbəbi artıq terrorçu ölkənin əsl mahiyyətinin faş olmasıdır. R.Zeyni qeyd etdi ki, bu fakt qarşısında erməni lobbisinin düşmən ölkə ilə bağlı gördüyü işlər də acizdir və onlar artıq heç kəsin ağzını yuma bilmirlər. “Bu gün bütün dünya Azərbaycanın haqq işini, ədalətli mövqeyini dərk etib, anlayıb. Sosial şəbəkələrdə və xarici KİV-də həm dünya azərbaycanlıları, həm də Azərbaycanın haqq işini dəstəkləyən digər insanların hamısı Ermənistanın bu cinayətlərindən xəbərdar və bunu hər yerdə qeyd edirlər. Təcavüzkar ölkənin orduya uşaqları cəlb etməsi faktı da artıq dünyaya məlumdur. Azərbaycanın ədalətli mövqeyini dəstəkləyən bütün insanlar Ermənistanın bu cinayətlərini kəskin ifşa edirlər, tənqid obyektinə çevirirlər. Ermənistanı silah-sursatla təmin edən dövlətləri çıxmaq şərtilə Qoşulmama Hərəkatına üzv olan dövlətlər və digər ölkələr Azərbaycanın ədalətli mövqeyini dəstəkləyirlər. Dünya KİV-də və sosial şəbəkələrdə Azərbaycanın haqq səsinə səs verənlərin sayı həddən artıq çoxdur. Bütün bu faktorlar Ermənistanın uşaqları orduya cəlb etməsi faktının, bu reallığın dünyaya yayılmasına və bu məsələyə sərt reaksiyalar verilməsinə səbəb olub. Erməni lobbisi Ermənistanın bu cinayətinin dünyaya yayılmasının qarşısını ala bilmədi, çünki ortada təkzibolunmaz faktlar var və həqiqətən də düşmən ölkənin uşaqları müharibədə “əsgər” kimi iştirak edirlər. Erməni lobbisi nə qədər güclü olsa da, öz ölkələrinə nə qədər silah-sursat daşısa da belə, Azərbaycanın haqq səsini boğa bilmədilər, Azərbaycan öz haqq səsini dünya ictimaiyyətinə çatdıra bildi. Erməni lobbisi, faktiki olaraq, bunun qarşısını ala bilmədi”.

R.Zeyni qeyd edir ki, dünya azərbaycanlılarının və Azərbaycanın haqq işini dəstəkləyən insanların apardığı təbliğatın qarşısını erməni lobbisi kəsə bilmədi. Bu səbəbdən də Ermənistanın bəşəriyyətə, insanlığa qarşı törətdiyi müharibə cinayətlərində uşaqların iştirak etməsi faktının bu şəkildə ifşa edildiyini deyən R.Zeyni hesab edir ki, biz informasiya müharibəsində bir an da olsa dayanmamalıyıq və düşmənin cinayətkar əməllərini beynəlxalq ictimaiyyətdə ifşa etməkdə davam etməliyik. “Biz iqtisadi və hərbi cəhətdən güclü olduğumuz kimi, informasiya baxımından da gücümüzü ortaya qoya bildik. Xüsusən də xaricdəki Azərbaycan diasporunun ölkəmizlə, ordumuzla nümayiş etdirdiyi həmrəylik nəticəsində bu işləri gördük və erməni lobbisinin də bizə gücü çatmadı. Biz istər Ermənistanın Gəncədə mülki əhalimizə qarşı həyata keçirdiyi terrorla, istərsə də təcavüzkar ölkənin törətdiyi digər cinayətlərlə, mülki əhalimizi hədəfə alması ilə bağlı səsimizi beynəlxalq aləmə çatdıra bildik. Hesab edirəm ki, bu işdə fəaliyyətimizi daha da gücləndirməliyik və bir an da olsa təbliğatımızı dayandırmamalıyıq” - deyə R.Zeyni vurğuladı.

İradə SARIYEVA

Son xəbərlər