Qoşulmama Hərəkatının sədri, Prezident İlham Əliyevin təşəbbüsü ilə qurumun Təmas Qrupu formatında videokonfrans vasitəsilə koronavirusla mübarizəyə həsr olunmuş "COVİD-19-a qarşı birlikdəyik" mövzusunda Zirvə görüşü keçirilən zaman ölkə başçısı Azərbaycanın sədrlik dönəmi üçün fəaliyyət qrafikinin olduğunu bildirdi:"Əlbəttə, bu formatda bir görüş digər təşkilatlar - BMT, ÜST tərəfindən diqqətdən kənarda qala bilməzdi. Çünki Qoşulmama Hərəkatının üzvləri onların əsas üzvlərindəndir. Ona görə də, bu təşkilatların görüşdə iştirak etməsi onlar üçün çox vacib idi”.
Tədbirin əhəmiyyətli olmasının digər səbəbi isə onun fövqəladə tədbir olmasında idi. Təşkilatın tarixində ilk dəfə olaraq bu tədbir onlayn və böhranlı vəziyyətin müzakirəsi ətrafında keçirilirdi. Tərəflər də Azərbaycanın bu təşəbbüsünə dərhal cavab verdilər. Cənab Prezidentin də qeyd etdiyi kimi, baxmayaraq ki, Azərbaycan həmin təşkilata sədrlik etdiyi zaman başqa tədbirlərin keçirilməsi nəzərdə tutuluraq, müəyyən qrafik tərtib olunub. Lakin pandemiya dünyadakı vəziyyəti və dünya reallıqlarını dəyişib. Azərbaycan dərhal təşkilatın gündəliyində dəyişiklik edib və həmin bu görüşü keçirib. Bu tədbirin keçirilməsinə də hərəkata üzv ölkələr dəstək nümayiş etdiriblər. Bu isə onu göstərir ki, Azərbaycanın təşəbbüsü yerində idi və böyük əhəmiyyət kəsb edir.
Prezident Administrasiyasının Xarici əlaqələr şöbəsinin rəhbəri, Prezidentin köməkçisi Hikmət Hacıyev artıq bu istiqamətdə işlərə start verildiyini bildirib:"Qoşulmama Hərəkatı çərçivəsində Prezident İlham Əliyevin təşəbbüsü ilə İşçi Qrup yaradılıb. Bu İşçi Qrupun qarşısında bir neçə vəzifə var. Birinci vəzifə Qoşulmama Hərəkatına üzv ölkələrin səhiyyə nazirlərinin toplantısının keçirilməsidir". PA rəsmisi bildirib ki, artıq səhiyyə sahəsində əməkdaşlığa, müxtəlif tibbi protokol və alqoritmlərin bölüşülməsinə, təcrübə mübadiləsinə ehtiyac vardı:"Qarşıdan gələn dövr ərzində, Ümumdünya Səhiyyə Təşkilatının (ÜST) tərkib hissəsi olaraq, Dünya Səhiyyə Assambleyası baş tutacaq. O çərçivədə, Prezident İlham Əliyevin tapşırığından irəli gələrək, Azərbaycan aidiyyəti üzrə səhiyyə nazirlərinin toplantısını keçirəcək. Bu istiqamətdə real işlər gedir, Qoşulmama Hərəkatı daxilində prosedurlardan çıxış edilərək dövlətlərlə razılaşdırılır".
Bu prosesi ölkə başçısının xüsusi qrafikimizin olması ilə bağlı səsləndirdiyi fikrin təsdiqi saymaq olarmı? Əvvəla bu, Azərbaycanın artan nüfuzundan xəbər verir və pandemiya ilə bağlı ilk zirvə görüşü deyil. Qoşulmama Hərəkatının 40-a yaxın üzvünün dövlət və hökumət başçılarının bu zirvə görüşündə iştirakı göstərir ki, Azərbaycan dünyada söz sahibidir. Azərbaycan artıq milli və regional mövqedən yox, dünyada qəbul edilən bir dövlət kimi öz sözünü deyir. Azərbaycan Qoşulmama Hərəkatına sədrlik müddətində təşkilatın prinsiplərinə sadiq qalaraq, qurumun beynəlxalq münasibətlər sistemində rolunun daha da artması, o cümlədən Azərbaycanla üzv ölkələr arasında əlaqələrin daha da inkişaf etdirilməsi, milli maraqlarının təmin olunması istiqamətində ciddi addımlar atır. Təbii ki ölkəmizin BMT-dən sonra dünyanın ən böyük ikinci beynəlxalq təşkilatına sədrlik etməsi ölkəmizin beynəlxalq münasibətlər sistemindəki mövqeyinin möhkəmlənməsinə xidmət edir. Zirvə görüşündə Qoşulmama Hərəkatının sədri kimi Azərbaycan Respublikasının Prezidenti İlham Əliyev bir daha diqqətə çatdırdı ki, Azərbaycan Qoşulmama Hərəkatının sədr ölkəsi kimi, hərəkatın qəbul olunmuş sənədindən çıxış edərək koronavirusa qarşı mübarizə üzrə Təmas Qrupunun yaradılması və bu formatda Zirvə görüşünün keçirilməsi təşəbbüsünü irəli sürüb. Qoşulmama Hərəkatının bütün üzv dövlətləri də bu təşəbbüsü yekdilliklə dəstəkləyiblər. Bu Zirvə görüşündə cənab İlham Əliyev Azərbaycanda koronavirus xəstəliyinin yayılmasının qarşısının alınması üçün vaxtında həyata keçirilən çevik və zəruri qabaqlayıcı tədbirlər barədə məlumat verərək vurğuladı ki, pandemiya dövründə əsas məsələ insanların sağlamlığı və onların sosial müdafiəsinin təmin edilməsidir. Azərbaycan koronavirus xəstələrinin müalicəsi sahəsində öz təcrübəsini Qoşulmama Hərəkatının digər üzv dövlətləri ilə bölüşməyə və bu sahədə əməkdaşlığa hazır olduğunu bəyan etdi. Beləliklə, Prezident İlham Əliyevin rəhbərliyi ilə ölkəmiz Qoşulmama Hərəkatında növbəti dəfə ciddi uğurlara imza atdı. Artıq görünən budur ki, Azərbaycanın görüşdə anonsunu verdiyi qrafikə uyğun tədbirlərin həyata keçirilməsinə start verilib. Səhiyyə nazirlərinin iştirakı ilə görüşün keçirilməsi ilə bağlı əldə olunan razılaşma ölkəmizin verdiyi vədlərə ciddi əməl etdiyinə dair daha bir sübut sayıla bilər.
Məhəmmədəli QƏRİBLİ
