Bəzi rayonların icra başçıları ətrafında cərəyan edən neqativliklər, onların və ətraflarının həbsi icra başçısı institutu ilə bağlı xeyli suallar ortaya çıxarır. Bəziləri hesab edir ki, belə qurumların səlahiyyəti azaldılmalı və seçki əsasında formalaşan bələdiyyələrə verilməlidir.
Başqa mövqedə olanlar isə hesab edir ki, həmin vəzifələrə uyğun namizədlər təyinat alsa vəziyyət düzələ bilər. Hətta belə təkliflər var ki, ölkədə gedən siyasi dialoqun davamı kimi, bir neçə rayona konstruktiv müxalifətin nümayəndələri icra başçısı təyin edilsinlər. Bəllidir ki, Prezident bir neçə dəfə çıxışlarında siyasi sistemdə islahatın zəruriliyini bildirib. Yeni siyasi konfiqurasiyanın formalaşması istiqamətində atılan bəzi addımları gördük. Parlamentin idarəçiliyinə konstruktiv müxalifətin üzvü olan deputatlar gətirildi. Tanınmış müxalifətçilərin cinayət işlərinə Ali Məhkəmə tərəfindən bəraət verildi, onlara yüksək məbləğdə kompensasiyanın ödənilməsinə dair qərar qəbul olundu. Uzun fasilədən sonra bir neçə siyasi partiya qeydiyyata alındı. Bütün bunların davamı olaraq həbs edilən icra başçılarının yerinə konstruktiv müxalifəti təmsil edən kadrların təyin olunması hansı effekti verə bilər? Maraqlıdır, bu qəbildən olan partiyaların bunun üçün kadr ehtiyatları varmı və həmin siyasi təsisatlar indiyə qədər hakimiyyətə bu yöndə müraciət ediblərmi?
Parlamentdə təmsil olunan konstruktiv müxalifət partiyası olan BAXCP sədrinin müavini Bünyamin Qənbərli qəzetimizə bildirdi ki, hakimiyyətin siyasi əməkdaşlıqla bağlı konkret addımlar atdığını müşahidə edirik:“Bütün siyasi qütblərlə əlaqənin genişlənməsi, xüsusilə də bunun idarəçilikdə sınanması olduqca doğru yoldur. Belə addımlar göstərir ki, ölkə rəhbərliyi özünə və xalqın dəstəyinə güvənir. Hakimiyyətin müəyyən mənada bölüşülməsi dövlətçilik ənənələrini də möhkəmləndirmiş olur. Hakimiyyətin müxalifət fəalları ilə bağlı atdığı bəzi addımlar hüququn ölkədə oturuşduğunu göstərir. Görünən budur ki. hakimiyyət dövlət idarəçiliyinin daha da təkmilləşməsində maraqlıdır. Müxalifətin icra qurumlarında geniş təmsilçiliyində hakimiyyətin özü də maraqlı olmalıdır. Həm məsuliyyəti bölüşür, həm də daim tənqidçi olan müxalifətə bacarığını göztərməyə şərait yaradılır. Bunun adına milli etimad da demək olar. Hakimiyyət bunu mərhələli şəkildə etsə, faydasını görər. Konstruktiv müxalifət partiyası kimi bizim kifayət qədər kadr potensialımız var. Hesab edirəm ki, belə imkanlar digər partiyalarda da mövcuddur. Onlardan bəziləri Elçibəy hakimiyyəti dönəmində vəzifələrdə işləyib, özlərini təsdiqləyiblər. Həmin adamlar ölkənin ictimai-siyasi həyatında bu gün də fəaldırlar. Bizim partiyanın üzvləri bir çox bəldiyyələrdə təmsil olunub və uğurla fəaliyyət göstərib. Yəni bir neçə rayona icra başçısı namizədi irəli sürməyə potensialımız var. Biz konkret olaraq şəxslərin icra başçılığına iddiası ilə bağlı siyahını təqdim etməmişik. Ancaq partiyamız tərəfindən müəyyən sahələrlə bağlı hazırlanan qanun layihələrini təqdim etmişik. Bizm fərqimiz yalnız yerdəyişmə ilə bağlı olmaz. Müxalifət nümayəndəsi həm dövlət məsuliyyətini, həm də cəmiyyətin üzərində olacaq ictimai məsuliyyətini dərk edəcək. Belə adamlara etimadın göstərilməsi uğurlu nəticə verə bilər. Onlar dərk edəcəklər ki, etdikləri neqativliklər yalnız şəxsi adlarına deyil, təmsil etdikləri partiyaların adına yazılacaq”.
Məhəmmədli QƏRİBLİ
