Bir neçə gündür ki, ölkə gündəmini DTX-nın yerlərdəki məmur korpusunda keçirdiyi əməliyyatlar məşğul edib. Artıq son 5 ay ərzində 5 rayonun icra başçısı həbs olunub. Onlardan 4-ü vəzifə başında olub, biri isə sabiq icra başçısıdır.
Həbs edilən icra başçıları ilə bağlı nümayiş olunan əməliyyat çəkilişlərindən görünür ki, həmin şəxslər öz kabinetlərində oturub, mütəmadi rüşvət yığımı ilə məşğul olublar. Həmin şəxslərin tərcümeyi-halında diqqətçəkən vacib bir detal da üzə çıxır. Bəlli olur ki, həbs edilən icra baçılarının böyük əksəriyyəti uzun müddət həmin postu tutanlardı, hətta aralarında elələri var ki, bir neçə rayona rəhbərlik edib. Belə olan təqdirdə maraqlı sual yaranır: onlar fəaliyyətlərinin son dönəmində korrupsionerə çevriliblər, yoxsa etdikləri neqativ əməlləri bu müddət ərzində pərdələməyi bacarıblar?
Əslən icra başçısı son həbs edilən rayondan olan sosial məsələlər üzrə ekspert İlqar Hüseynli “Bakı-Xəbər”ə açıqlamasında bildirdi ki, icra başçısı sistemi avtonom deyil:“Bilirsiniz ki, onlara nəzarət edən ali qurumlar var. Hətta Prezident Administrasiyasında onlara nəzarət edən şöbələr, xüsusi kuratorlar da olur. Mən inanmıram ki, həbs edilən icra başçıları yalnız son dönəmlər rüşvət və korrupsiya ilə məşğul olublar. Media üzərindən axtarış etsəniz üzə çıxacaq ki, həmin icra başıları ilə bağlı jurnalist araşdırmaları ortaya qoyulub. Eyni zamanda rayonla əlaqəsi olan bir adam kimi deyə bilərəm ki, icra başçıları yerlərdəki əhaliyə necə əziyyət verirdi. Onlara nəzarət edən qurumların belə halları indiyə qədər görməməsi mümkünsüzdür. Məntiqlə götürsək, onlar elə vəzifədə işlədikləri dönəmdə belə “qara” işlərlə məşğul olublar. Belə olmasaydı, dəyəri bir neçə milyonlarla ölçülən mülklərə sahib ola bilməzdilər. Qısa müddətdə belə “nailiyyətlərə” imza atmaq mümkün deyil. Həbs edilən və fəaliyyətdə olan bir çox icra başçıları ilə bağlı araşdırma aparanda onların tərcümeyi-halı ilə də bağlı maraqlı detallar üzə çıxır. Xüsusilə də onların ali təhsilləri ilə bağlı. Bəlli olur ki, onlar ciddi universitetlərdə təhsil almayıblar, ya da yaşlarının kifayət qədər ahıl çağında hardansa ilk ali təhsil diplomunu əldə ediblər. Hiss olunur ki, icra başçısı olmaq üçün çatışmayan detal diplom olduğuna görə təcili həmin məsələni həll ediblər. Onların övladları da dövlət qurumlarında yaxşı vəzifələrdə çalışırlar. Müəyyən istisnalar olmaqla deyə bilərəm ki, onlar test edilsə, normal savadlarının olmadığı üzə çıxacaq. Çünki həmin icra başçılarının övladlarının harın həyatı ilə bağlı mediada çoxlu sayda materiallar yerləşdirilib. Hətta elə olurdu ki, onların səsi ölkə kənarlarından belə bizə pis mənada gəlib çatırdı. Həbs edilən Vilyam Hacıyevin fəaliyyəti ilə yaxından tanışam. Əslən o rayondanam, həmin rayondan deputatlığa namizəd olmuşam. Onun müəyyən qanunsuz əməlləri ilə bağlı mən özüm də dəfələrlə çıxışlar etmişəm. Ölkə başçısı dəfələrlə deyib ki, ona yerlərdəki vəziyyətlə bağlı düzgün məlumatlar verməyiblər. Bütün bunlar sübut edir ki, icra başçılarının uzun sürən neqativ fəaliyyətini kimlərsə məqsədli şəkildə ört-basdır edib. Şübhəsiz ki, belə hallara yol verənlər də həmin icra başçıları ilə şərikdirlər. Yəqin ki, istintaq belə adamların da məsuliyyət dairəsini müəyyən edəcək. Bəlli olur ki, bu müddət ərzində onlar külli miqdarda dövlət vəsaitini talan ediblər. 5 rayonla bağlı aparılan tədbirlərlə kifayətlənmək olmaz. Yaxşı olardı ki, hazırda vəzifədə olan bəzi icra başçıları özlərində güc tapıb əməllərini etiraf etdikdən sona istefa ərizəsi yazsınlar. Dövlətdən oğurladıqlarını könüllü geri qaytarsınlar. Həbsxanaya gedənə qədər vəzifədə qalmağı özləri üçün qənimət sayırlar. Hesab edirəm ki, onları bu müddət ərzində himayə edən zənciri də aşkarlamağın vaxtı çatıb”.
Məhəmmədəli QƏRİBLİ
