Aydın Xan Əbilov: “Bu qurum Azərbaycana bir tərəfdaş kimi çox böyük etimad göstərir və etibar edir”
Azərbaycan dövləti müxtəlif beynəlxalq qurumlarla əməkdaşlıq edir. Ölkəmizin humanitar sahədə qarşılıqlı əlaqələrə malik olduğu qurumlardan biri UNESCO-dur ki, Azərbaycanla bu təşkilat arasında kifayət qədər səmərəli əməkdaşlıq mövcuddur. Ölkəmiz bu qurumun həyata keçirdiyi bir sıra layihələrin gerçəkləşməsinə dəstək verib, o cümlədən də bizə aid maddi və qeyri maddi-mədəni irs nümunələrinin UNESCO-ya daxil edilməsi istiqamətində addımlar atıb.
Bilirik ki, ölkəmiz ilk dəfə 2010-2014-cü illərdə 4 il müddətinə UNESCO-nun Ümumdünya İrs Komitəsinə evsahibliyi edib və 2019-cu ildə də bu komitəyə növbəti dəfə evsahibliyi etməyə hazırlaşır.
Parisdə Azərbaycanın sədrliyi ilə UNESCO-nun mənzil-qərargahında Ümumdünya İrs Komitəsinin xüsusi işçi qrupunun ilk iclası keçirilib. İclasda ölkəmizin Ümumdünya İrs Komitəsinə uğurla evsahibliyi edəcəyinə əminlik ifadə edilib.
Rəsmi qurumlardan verilən məlumata görə, Ümumdünya İrs Komitəsinin 2019-cu ildə Bakıda keçiriləcək 43-cü sessiyasına hazırlıq məqsədilə xüsusi işçi qrup təsis edilib. Xüsusi işçi qrup öz fəaliyyətini komitə iclasına qədər davam etdirəcək.
Məlumat üçün bildirək ki, xüsusi işçi qrupun yaradılması haqqında qərar İrs Komitəsinin Bəhreyndə keçirilmiş sonuncu sessiyası zamanı qəbul edilib. Bu qrupun mandatına 1972-ci il UNESCO Konvensiyasının səmərəli şəkildə icra edilməsi və nominasiya prosesləri sahəsində islahatlarla bağlı məsələlər daxildir.
Kulturoloq Aydın Xan Əbilov hesab edir ki, Azərbaycan çox etibarlı tərəfdaş kimi UNESCO qarşısında böyük nüfuza malikdir. O vurğuladı ki, ölkəmizlə UNESCO arasında olduqca səmərəli əməkdaşlıq qurulub. “Azərbaycan, Bakı dünyanın intellektual, kreativ, kulturoloji beyin mərkəzlərindən birinə çevrilməkdədir. Buna görə də Azərbaycan əməkdaşlıq etdiyi bütün beynəlxalq qurumların, o cümlədən də UNESCO-nun komitələrində rəhbər vəzifələrdə təmsil olunur. Bu da sözsüz ki, ölkəmizə göstərilən çox böyük humanitar, qlobal etimadın nümunəsidir. Azərbaycan UNESCO ilə çox sıx münasibətdədir. Demək olar ki, bu qurumun istər elmlə, istər təhsillə, istər mədəniyyətlə, istərsə də maddi və qeyri-maddi mədəni irsin qorunması ilə bağlı proqramlarının həyata keçirilməsində çox aktiv şəkildə iştirak edir. Yəni həm mənəvi, həm mədəni, həm də intellektual baxımdan özünü göstərməkdədir. Azərbaycan İtaliyada, Fransada və digər ölkələrdə muzeylərin, sinaqoqların, kilsələrin, eləcə də tarixi əhəmiyyətli bir çox maddi-mədəni abidənin bərpasında geniş işlər görür. Bu mənada, ölkəmizin Birinci vitse-prezidenti Mehriban xanım Əliyevanın gördüyü işlər göz qabağındadır. Azərbaycan həyata keçirdiyi bütün bu işlərlə UNESCO-da çox böyük nüfuz qazanıb. Bilirsiniz, ölkəmiz həm Şərqin, həm Qərbin, həm İslam dünyasının, həm də xristianlığın dəyərlərini özündə birləşdirən bir sivilizasiya məkanıdır. Mədəniyyətlərarası, dinlərarası dialoq forumlarının təşkilində Azərbaycanın rolu çox böyükdür və bu da UNESCO tərəfindən yüksək qiymətləndirilir” - deyə bildirən A.X.Əbilov hesab edir ki, bu gün Şərq aləmi ilə bağlı UNESCO-nun və digər beynəlxalq təsisatlarla əlaqədar verilən qərarlarda Azərbaycanın rəyi önəmlidir. Azərbaycanın bir sıra qeyri-maddi irs nümunələri UNESCO-nun siyahılarına daxil edilib. O hesab edir ki, 2019-cu ildə ölkəmizin evsahibliyi ilə keçiriləcək Ümumdünya İrs Komitəsinin 43-cü sessiyasında Azərbaycan bir sıra nümunələrimizin də UNESCO-ya daxil edilməsi məsələsini irəli sürməlidir. Azərbaycan mətbəxinin unikal bişmişləri də UNESCO-da yer almalıdır. “Bizdə həsirçilik sənəti var. Həsirçilik də UNESCO-ya daxil edilməlidir. Azərbaycanın UNESCO-nun aparıcı komitələrindən birinin 43-cü ssesiyasına evsahibliyi etməsi bizə imkan yaradır ki, özümüzün bir çox maddi və qeyri-maddi irs nümunələrimizin də bu quruma daxil edilməsinə nail olaq. Bu qurum Azərbaycana bir tərəfdaş kimi çox böyük etimad göstərir və etibar edir. Bu da ölkəmizin dünya ölkələri arasında daha ciddi nüfuza malik olan bir ölkə olmasından irəli gəlir. Azərbaycanın indiyə qədər evsahibliyi ilə keçirilən bütün beynəlxalq tədbirlər nəinki özümüzə, eləcə də bütün dünyaya səmərə verib”. A.X.Əbilov hesab edir ki, 2019-cu ildə belə bir mühüm tədbirin Azərbaycanda keçirilməsi ilə bağlı işçi qrupunun yaradılması və o işçi qrupunun UNESCO-nun mənzil-qərərgahında iclas keçirməsi, tədbirlə bağlı müzakirələr aparması çox əhəmiyyətlidir: “UNESCO-nun mənzil-qərargahında ölkəmizin sədrliyi ilə Ümumdünya İrs Komitəsinin ilk iclasının keçirilməsi artıq bir daha dünyaya onu göstərir ki, Azərbaycan bu tədbirə də uğurla evsahibliyi etməyə hazırdır. Ölkəmiz gələn ildən etibarən 4 il müddətinə bu komitəyə evsahibliyi edəcək”.
İradə SARIYEVA
