Artıq Azərbaycanın dövlətçilik tarixi ilə bağlı bədii və sənədli filmlərin çəkilməsi ənənəsinin əsası qoyulub. Bu il yaranmasının 100 illiyini ölkəmizdə və xarici ölkələrdə qeyd etdiyimiz Azərbaycan Xalq Cümhuriyyətinin tarixi, onun qurucularının fəaliyyəti haqqında bədii və sənədli filmlər yaranmaqdadır.
Bu istiqamətdə Bakı Media Mərkəzinin həyata keçirdiyi layihələri xüsusi vurğulamaq lazımdır. Bakı Media Mərkəzinin Heydər Əliyev Fondunun dəstəyi ilə Cümhuriyyət tarixi ilə bağlı ekranlaşdırdığı filmlər nəinki ölkəmizdə, eləcə də bir sıra xarici ölkələrdə tamaşaçılara təqdim edilib. Mərkəzin 2016-cı ildə Heydər Əliyev Fondunun dəstəyilə çəkdiyi “Əbədi ezamiyyət” sənədli filmi artıq dünyanın bir sıra ölkələrində nümayiş olunub. Bildirək ki, bu film Azərbaycan Xalq Cümhuriyyətinin 1919-cu ilin yanvarında parlament sədri Əlimərdan bəy Topçubaşovun rəhbərliyi ilə Paris Sülh Konfransına ezam etdiyi nümayəndə heyətinin keşməkeşli taleyindən bəhs edir.
Heydər Əliyev Fondunun dəstəyi ilə Bakı Media Mərkəzinin ekranlaşdırdığı maraqlı və əhəmiyyətli filmlərdən biri də “Son iclas” bədii-sənədli filmidir ki, onun da təqdimatı müxtəlif ölkələrdə keçirilib. Azərbaycan Xalq Cümhuriyyətinin 100 illiyinə həsr edilən filmin baş prodüsseri Bakı Media Mərkəzinin prezidenti Arzu Əliyevadır.
Film Azərbaycan Xalq Cümhuriyyətinin keşməkeşli tarixinin son günlərinə işıq salır və hökumətin öz son qərarını hansı çətin şəraitdə verdiyini əks etdirir.
Azərbaycan Xalq Cümhuriyyətinin 100 illiyi münasibətilə dünyanın bir sıra ölkələrində təqdim edilən filmlərin Cümhuriyyət tarixinin beynəlxalq aləmdə təbliğ edilməsi kimi mühüm bir hadisə olduğunu deyən tanınmış kinorejissor Şamil Əliyev hesab edir ki, Bakı Media Mərkəzinin Azərbaycanın dövlətçilik tarixi ilə bağlı lentə aldığı bütün filmlər öz səviyyəsinə görə çox yüksəkdir. “Bakı Media Mərkəzi yarandığı gündən bu cür layihələrə daha çox üstünlük verir. Bu Mərkəzdə Cümhuriyyətimizin tarixi ilə bağlı çox dəyərli, maraqlı filmlər çəkilib və bu filmlər peşəkar heyət tərəfindən lentə alınıb. Bilirsiniz, film çəkmək kifayət deyil, onun təbliğatını da həyata keçirmək çox mühümdür. Bakı Media Mərkəzi həm bu filmləri çəkir, həm də o filmləri beynəlxalq aləmdə yüksək səviyyədə təbliğ edir. Çox müsbət haldır ki, bu filmlər yalnız xarici ölkələrin dövlət və hökumət nümayəndələrinə, parlament üzvlərinə deyil, digər kəsimdən olan tamaşaçılara da təqdim edilir. Bu filmlər olduqca əhəmiyyətli filmlərdir. Bu filmlərin xarici ölkələrdə təqdim edilməsi Cümhuriyyət tarixinin təbliğində çox böyük rol oynayır. Bu filmlər ancaq Cümhuriyyət tarixini deyil, bütövlükdə, Azərbaycan mədəniyyətinin, dövlətçiliyinin bir salnaməsidir ki, dünyaya təqdim edilir. Özü də bu filmlərə çox geniş tamaşaçı auditoriyası tərəfindən böyük maraq var. Hesab edirəm ki, Heydər Əliyev Fondunun dəstəyilə Bakı Media Mərkəzində çəkilən filmlər və o filmlərin beynəlxalq aləmdə təbliği Cümhuriyyətin 100 illiyinə ən əhəmiyyətli töhfədir” - deyə Ş.Əliyev vurğuladı.
Ş.Əliyev, həmçinin, qeyd etdi ki, bu filmlərə baxan xaricilər Cümhuriyyətin nə qədər şərəfli, eyni zamanda da ağır və məşəqqətli yol keçdiyini açıq-aşkar hiss edə bilirlər.
İradə SARIYEVA
