Leyla Məmmədəliyeva: “Nəsimi irsinin, onun əzəmətli, azad poetik ruhunun müasir Rusiyada tanıdılması çox vacibdir”
Heydər Əliyev Fondu yalnız ölkəmizdə deyil, onun hüdudlarından kənarlarda da Azərbaycan mədəniyyəti, ədəbiyyatı, incəsənəti, musiqisi, tarixi ilə bağlı maraqlı tədbirlər keçirir, ölkəmizin mədəni simasını dünyaya təqdim edir.
Bildiyimiz kimi, Prezident İlham Əliyevin sərəncamı ilə 2019-cu ildə 650 illik yubileyi qeyd ediləcək klassik Azərbaycan şairi, mütəfəkkiri İmadəddin Nəsimi irsinə Heydər Əliyev Fondu hər zaman həssaslıqla yanaşır. Elə bunun nəticəsidir ki, Heydər Əliyev Fondunun vitse-prezidenti Leyla Əliyevanın təşəbbüsü ilə sentyabrın 27-30-da Azərbaycanda ilk dəfə olaraq “Nəsimi - şeir, sənət və mənəviyyat Festivalı” təşkil olunub. Layihə çərçivəsində həm şairin doğulduğu Şamaxı şəhərində, həm də Bakıda müxtəlif sənət növləri üzrə sərgilər, musiqi layihələri, tamaşalar, eləcə də mühazirə, simpozium və seminarlar təşkil olunub. Dörd gün davam edən festival Nəsimi yaradıcılığının tərənnümü ilə yanaşı, şeir və sənətin yaşadılması, müxtəlif müstəvilərdə və formatlarda təqdimatları ilə yadda qalıb.
Heydər Əliyev Fondu Nəsimi yaradıcılığının, irsinin təbliğini indi də beynəlxalq aləmdə davam etdirir. Fondun bir sıra tədbirləri kimi, Nəsimi ilə bağlı tədbiri də beynəlxalq ictimaiyyətə təqdim edilir. Belə ki, Fonddan mətbuata bildirilib ki, noyabrın 19-20-də Rusiyanın paytaxtı Moskvada Heydər Əliyev Fondunun təşkilatçılığı ilə “Nəsimi - şeir, sənət və mənəviyyat Festivalı” keçirilir. Layihə Şərqin dahi şair və mütəfəkkirlərindən biri olan İmadəddin Nəsiminin (1369-1417) yaradıcılığının təbliği və iki ölkə arasında mədəni-ədəbi əlaqələrin genişləndirilməsi məqsədi daşıyır.
Festival çərçivəsində Moskva Beynəlxalq Əlaqələr İnstitutunda İmadəddin Nəsiminin büstünün açılış mərasimi nəzərdə tutulur. Açılış zamanı Nəsimi poeziyasından müxtəlif nümunələr də səsləndiriləcək.
Festival zamanı, həmçinin, M.V.Lomonosov adına Moskva Dövlət Universitetinin (MDU) Asiya və Afrika Ölkələri İnstitutunda Nəsimi yaradıcılığına həsr olunan tədbir keçiriləcək. Çıxışlarda İmadəddin Nəsiminin Azərbaycan poeziyasının inkişafında oynadığı roldan, dünya mədəniyyəti və ədəbiyyatına verdiyi töhfədən bəhs olunacaq. Tədbirdə MDU-nun tələbələri Nəsiminin şeirlərini müxtəlif dillərdə səsləndirəcək, həmçinin, Azərbaycandan olan aktyorların ifasında “Mərhəba” musiqili-poetik tamaşası təqdim ediləcək.
Qeyd edilənə görə, festival noyabrın 20-də M.V.Lomonosov adına Moskva Dövlət Universitetinin (MDU) Asiya və Afrika Ölkələri İnstitutunda Nəsimi irsinə həsr olunan konfransla davam edəcək. Tədbirdə “Nəsimi festivalı: ideoloji-mədəni irsin dinamik interpretasiya təcrübəsi”, “Nəsimi və Yan Qus. Şərq və Qərbin mədəni birliyi”, “Nəsiminin dili – dünən, bu gün, sabah” və digər mövzularda məruzələr ediləcək. Konfransda Nəsimi yaradıcılığını, şairin ədəbi-fəlsəfi irsini müxtəlif aspektlərdən təhlil edən çıxışlarla yanaşı, müasir gəncliyin mənəviyyatı, iki ölkənin gəncləri arasında əlaqələrin inkişafına dair müzakirələr də aparılacaq.
Ədəbiyyatşünas Leyla Məmmədəliyeva (Fərhadqızı) bizimlə söhbətində bildirdi ki, İ.Nəsimi yaradıcılığı təkcə Azərbaycanın, Şərqin deyil, bütün dünyanın mədəni, mənəvi dəyərlər sistemində özünə yer tutur. O, həmçinin, vurğuladı ki, Heydər Əliyev Fondu yalnız Nəsiminin deyil, Azərbaycanın bütün klassik şairlərinin, ədiblərinin, mütəfəkkirlərinin irsinə həssaslıqla yanaşır və bu nümunələrin dünyada təbliğ edilməsinə böyük töhfələr verir. Fondun sentyabrda təşkil etdiyi “Nəsimi - şeir, sənət və mənəviyyat Festivalı”nın Azərbaycanda böyük əks-səda yaratdığını deyən ədəbiyyatşünas vurğuladı ki, bu ayın sonlarında eyni adlı festivalın Moskvada keçirilməsi böyük hadisədir: “Fond davamlı olaraq Azərbaycan mədəniyyəti, ədəbiyyatı ilə bağlı xarici ölkələrdə tədbirlər keçirir. Bu sırada Azərbaycan klassiklərinin irsinin dünyada tanıdılması çox əhəmiyyətli yer tutur. Moskvada keçirilən “Nəsimi - şeir, sənət və mənəviyyat Festivalı” Heydər Əliyev Fondunun həyata keçirdiyi əhəmiyyətli beynəlxalq layihələrdən biridir. Nəsimi irsinin, onun əzəmətli, azad poetik ruhunun müasir Rusiyada tanıdılması çox vacibdir. Nəsimi irsində ancaq Azərbaycan deyil, bütün Yer kürəsi əks olunub, burada bütün insanlığın harayı əks olunub. Fondun beynəlxalq miqyasda keçirdiyi bütün tədbirlər, həyata keçirdiyi bütün layihələr xalqımızın, dövlətimizin mənəvi-mədəni irsimizə bəslədiyi tükənməz sevgini təbliğ edir. Dünyanın heç bir ölkəsində mədəniyyətin, ədəbiyyatın təbliğ edilməsi istiqamətində bu qədər işlər görülmür. Bizdə isə bu əsasdır”.
O, həmçinin, hesab edir ki, bu festivalın Moskvada keçirilməsi rusiyalı müasir türkoloqları, şərqşünasları Nəsimi irsinin tədqiqinə cəlb edəcək. Müasir dünya ədəbiyyatşünaslarının Nəsimi irsinə münasibəti olduqca vacibdir.
İradə SARIYEVA
