Qiymət Məhərrəmli: “Klassik Azərbaycan şairi Nəsimi milli düşüncəmizin formalaşmasında, anadilli poeziyamızın inkişafında çox mühüm rol oynayıb”
Azərbaycan dövləti xalqımızın dahi şair və mütəfəkkirlərinin şəxsiyyətinə, ədəbi irsinə zaman-zaman qayğı siyasəti həyata keçirib. Dünya ədəbiyyatının görkəmli simalarından biri olan İmadəddin Nəsiminin ədəbi-fəlsəfi irsinə böyük dövlət qayğısı var.
Prezident İlham Əliyev dahi Azərbaycan şairi İmadəddin Nəsiminin 650 illik yubileyinin qeyd edilməsi haqqında Sərəncam imzalayıb. Sənəddə vurğulanır ki, 2019-cu ildə böyük Azərbaycan şairi və mütəfəkkiri İmadəddin Nəsiminin anadan olmasının 650 illiyi tamam olur.
“İmadəddin Nəsimi Azərbaycan xalqının ümumbəşər mədəniyyətinə bəxş etdiyi qüdrətli söz ustalarındandır. O, Şərqin zəngin mədəni-mənəvi sərvətləri üzərində ucalmış və bədii söz sənətinin son dərəcə qiymətli incilərini meydana gətirmişdir. Mütəfəkkir şairin dərin poetik fikirlərlə fəlsəfi görüşlərin vəhdətində olub, dövrün elmi-fəlsəfi düşüncəsinin aydın ifadəçisinə çevrilmiş müstəsna əhəmiyyətli ədəbi irsi qədim köklərə və çoxəsrlik ənənələrə malik Azərbaycan ədəbiyyatı tarixində xüsusi mərhələ təşkil edir.
Nəsimi dünya poeziyasının ən kamil nümunələri sırasında diqqətəlayiq yer tutan əsərlərində daim insanın əzəmətini, insani məhəbbəti və şəxsiyyətin azadlığını tərənnüm etmişdir. Anadilli şeirin humanist ideyalarla, yeni məzmun, deyim tərzi və bədii lövhələrlə daha da zənginləşməsində unudulmaz şairin misilsiz xidmətləri var. Nəsiminin mənbəyini xalq ruhundan almış parlaq üslubu orta əsrlər Azərbaycan dilinin məna imkanlarını bütün dolğunluğu və rəngarəngliyi ilə əks etdirir. Sənətkarın yaradıcılığı bir sıra xalqların bədii-ictimai fikrinin inkişafına qüvvətli təsir göstərmişdir”. Bu fikirlər Prezident Sərəncamında deyilir.
Filologiya üzrə fəlsəfə doktoru, tədqiqatçı-alim Qiymət Məhərrəmli bizimlə söhbətində bildirdi ki, İmadəddin Nəsimi irsinə qayğı ənənəsinin əsası dövlətçiliyimizin memarı Heydər Əliyev tərəfindən qoyulub. Q.Məhərrəmli qeyd etdi ki, H.Əliyevin tarixi, mədəni irsimizə böyük qayğı, diqqətlə yanaşması nəticəsində bir sıra Azərbaycan şairlərinin, mütəfəkkirlərinin tarixi haqqı özünə qaytarılıb. Bu şəxsiyyətlərdən, ədiblərdən birinin Nəsimi olduğunu deyən Q.Məhərrəmli hesab edir ki, H.Əliyevin təşəbbüsü ilə Nəsiminin 600 illik yubileyinin YUNESCO tərəfindən qeyd edilməsi böyük tarixi-ədəbi hadisə kimi tarixdə qalıb. “Klassik Azərbaycan şairi Nəsimi milli düşüncəmizin formalaşmasında, anadilli poeziyamızın inkişafında çox mühüm rol oynayıb. Öz dövründə dilimiz, milli məfkurəmiz uğrunda mübarizələr aparıb. Bu gün poeziyada ədalətdən, haqq sözündən danışanda ən çox xatırladığımız Nəsimi olur. Nəsimi irsinə, şəxsiyyətinə ən böyük dəyəri Heydər Əliyev verib və onun Nəsimi poeziyasına bəslədiyi sonsuz sevgi nəticəsində Nəsimin adı hər yerdə duyulub. Məhz İsa Muğannanın ssenarisi əsasında Həsən Seyidbəylinin çəkdiyi “Nəsimi” filminin meydana gəlməsində Heydər Əliyevin böyük rolu olub. Bu gün Bakının mərkəzində Nəsiminin heykəli ucalıb, paytaxtın iri rayonlarından biri məhz onun adını daşıyır, “Nəsimi” metrostansiyası fəaliyyət göstərir. Bundan başqa, Azərbaycan Milli Elmlər Akademiyasının Dilçilik İnstitutu Nəsiminin adını daşıyır.
2017-ci ilin may ayında Parisdə UNESCO-nun baş qərargahında Nəsiminin 600 illiyi qeyd edildi və 2018-ci ilin sentyabr ayında ölkəmizdə Nəsimi şeir, incəsənət və mənəviyyat festivalı təntənəli şəkildə keçirildi.
Bu ilin noyabr ayının 15-də cənab Prezidentin Nəsiminin 650 illik yubileyinin keçirilməsi ilə bağlı imzaladığı Sərəncam Nəsimi irsinə verilən böyük qiymətin təntənəsidir. Nəsimin özü Azərbaycanda dəfn edilməsə də, ruhu hər zaman bizimlədir. Prezidentin Nəsimi ruhuna, Nəsimi poeziyasına, onun bizə miras qoyub getdiyi ruhi-mənəvi azadlığa verdiyi dəyər bütövlükdə Azərbaycanın klassik şairlərinə, ədiblərinə verilən qiymətin təzahürüdür” - deyə Q.Məhərrəmli bildirdi.
İradə SARIYEVA
