“Bir sıra bölgələrə dəvətlər alırıq, yaxşı tamaşalara tamaşaçı tələbatı var”
İnsanların mədəni maariflənməsində, heç şübhəsiz, teatrın rolu az deyil. Vaxtilə xalqımızın mədəni həyatının daha geniş şəkildə formalaşmasında teatr tamaşalarının müstəsna rol oynadığı məlumdur. Bu gün Azərbaycanda həm paytaxtda, həm də bölgələrdə müxtəlif profilli teatrlar, dram dərnəkləri, teatr studiyaları fəaliyyət göstərir ki, onlar arasında da qarşılıqlı yaradıcılıq əlaqələri qurulub. Bu əlaqələr fonunda teatrlar bir-birilə yaxindan tanış olur və tamaşaçı mübadiləsi həyata keçirirlər. Bu xüsusda son illər paytaxt teatrlarının bölgələrə, bölgə teatrlarının isə Bakıya qastrol səfərlərinin təşkil edilməsi müsbət ənənəyə çevirilməkdədir.
Müsbət haldır ki, həm Bakıda, həm də digər şəhər və rayonlarda fəaliyyət göstərən teatrlara tamaşaçı marağı artıq qayıdır. Müasir tamaşaçıların səhnə əsərlərinə isti yanaşması teatrların üzərinə yeni yaradıcılıq məsuliyyəti, missiyası qoyur. Əlbəttə, tamaşaçı istəyir ki, ona təqdim edilən ədəbi məhsul həm zamanın tələblərinə uyğun olsun, həm də zövqləri təmin etsin.
Paytaxt teatrlarının bölgələrə qastrol səfərlərinin təşkil edilməsini müsbət addım sayan Milli Akademik Dram Teatrının tanınmış və aparıcı aktyorlarından olan, əməkdar artist Abbas Qəhrəmanov hesab edir ki, tamaşaçılar qastrollar çərçivəsində onlara təqdim edilən tamaşalara böyük həvəslə baxır və onu qiymətləndirirlər. “Bizim teatr bu günlərdə Qax, Zaqatala, Balakən rayonlarından qastrol səfərindən qayıdıb. Biz ora Hüseynbala Mirələmovun “Vəsiyyət” tamaşasını aparmışdıq. Üç gün tamaşaçılar qarşısına çıxdıq və onlar bizi çox istiliklə, səmimiyyətlə, böyük sevgi ilə qarşılıadılar. Tamaşanın nümayişi çox gözəl alındı. Mən bu tamaşada baş rolu oynayırdım. Obrazımın adı Dövrandı. İnanın ki, tamaşaçılar tamaşanı o qədər sevdilər ki, bizi səhnədən buraxmaq istəmirdilər. Yaxınlaşıb şəkil çəkdirir, münasibət bildirirdilər. Bizim tamaşaçılar teatrı həmişə sevib. Tamaşadakı aktyorlar yaxşı oyanayanda, obrazlarını yüksək səviyyədə təqdim edəndə, işə can qoyanda həmişə tamaşaçıların alqışını qazanırlar. Bu gün bir sıra bölgələrə dəvətlər alırıq, yaxşı tamaşalara tamaşaçı tələbatı var. Tamaşa estetikası işləyir, yaxşıdır. Camaat tamaşaya baxır. Qastrol zamanı gördüm ki, tamaşaçılar aktyorları populyarlıqlarına görə deyil, peşəkarlıqlarına, yaxşı oyunlarına görə sevib dəyərləndirirlər. Ümumiyyətlə, teatrların Azərbaycanın bölgələrinə, şəhərlərinə qastrol səfərlərinin təşkil edilməsi tendensiyası çox müsbətdir”-deyə A.Qəhrəmanov bildirdi.
İradə SARIYEVA
