Səkinə Baharlı: “Təbii, hər rəssamın borcu xalqımızın qəhrəmanlıq tarixini işıqlandırmaqdır” Şəhla Zamanlı: “Bu əsərlər müxtəlif sərgilərdə nümayiş etdirilib”
Azərbaycanın müasir tarixində böyük qəhrəmanlıq nümunəsi kimi anılan aprel döyüşləri qürur duyduğumuz bir hadisədir. İncəsənətin müxtəlif sahələrində çalışan adamlar xalqımıza fəxr hissi yaşadan bu unudulmaz hadisəyə öz töfhəsini verməlidir. Ümumiyyətlə, qəhrəmanlıq tariximizi yaradan, yaşadan, davam etdirən Vətən oğullarının şücaəti, qəhrəmanlığı sənət əsərlərində əks olunmalıdır.
Azərbaycan rəssamları hər zaman ölkəmizin qəhrəmanlıq tarixinə öz əsərləri ilə münasibət bildiriblər. Qarabağ müharibəsi qəhrəmanları, Vətənimizin müdafiəsi uğrunda canından keçən soydaşlarımızın qəhrəmanlıq dolu ömür yolu tablolarda canlandırılıb. Aprel döyüşləri rəssamların əsərlərində necə ifadə edilir?
Qeyd edək ki, müxtəlif yaradıcılıq mərkəzlərində, rəsm məktəblərində təhsil alan uşaq və yeniyetmələr bu sahədə xüsusi fərqlənirlər. Onu da vurğulayaq ki, rəssam Soltan Soltanovun aprel şəhidlərinə həsr etdiyi əsər İspaniyanın Madrid şəhərində keçirilən müsabiqədə mükafat alıb. O bizimlə söhbətində qeyd etdi ki, müsabiqəyə 4 əsər göndərib və 2016-ci ildəki aprel döyüşlərinə həsr etdiyi rəsm əsəri beynəlxalq müsabiqədə ikinci yeri tutub.
Aprel döyüşləri rəssamların əsərlərində özünü o şəkildə ifadə etməlidir ki, bu qəhrəmanlıq nümunəsi olduğu kimi gənc nəslə çatdırılsın.
Sənətşünas Səkinə Baharlı bizimlə söhbətində qeyd etdi ki, aprel döyüşlərindən sonra Azərbaycan rəssamları da mövzuya müraciət ediblər. Onun sözlərinə görə, bu məsələdə gənc və yeniyetmə rəssamlar daha çox aktivlik göstərir: “Aprel döyüşləri xalqımızın zəfər tarixində özünə böyük yer tutan bir hadisədir. Ona təsviri-incəsənət ustaları da öz münasibətini bildirib. Təbii, hər rəssamın borcu xalqımınzın qəhrəmanlıq tarixini işıqlandırmaqdır. Elə bir rəssam tapılmaz ki, onun yaradıcılığında heç olmasa bir tablo bu mövzuya həsr olunmasın. Bununla bağlı müxtəlif yerlərdə sərgilər də keçirilib. Bölgə rəssamları da bu məsələyə münasibət bildirib. Deyim ki, aprel döyüşlərindən sonra müxtəlif qeyri-hökumət təşkilatlarının dəstəyi ilə də müxtəlif sərgilər keçirilir. Rəsm məktəblərinin, yaradıcılıq mərkəzlərinin şagirdləri bu mövzuda çoxlu əsər çəkiblər. Bizim məqsədimiz aprel döyüşlərinin mahiyyətini, fəlsəfəsini gənc nəslə anlatmaqdır. Buna da nail oluruq. Yaşlı rəssamlar bunu işinin tərkib hissəsi kimi çəkir, amma gənclər bu döyüşün mahiyyətini hiss edib yaşayaraq çəkir”.
S.Baharlı qeyd etdi ki, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə Jurnalist Ekspert Mərkəzi İctimai Birliyinin həyata keçirdiyi (JEM) “Aprel döyüşləri qəhrəmanlarının şücaət anını əks etdirən rəsmlərin yeniyetmə rəssamlar tərəfindən çəkilməsi və sərgilənməsi" layihəsi də bu sahədə atılan addımlardandır. Ekspert qeyd etdi bu layihəyə yeniyetmə rəssamların cəlb edilməsi, sözün əsl mənasında, aprel döyüşləri fəlsəfəsinin yüksək səviyyədə təbliğinə şərait yaradır”.
Gənc rəssam Şəhla Zamanlının sözlərinə görə, gənclərin bu mövzuya maraq göstərməsi onlarda vətənpərvərlik ruhunun güclü olmasından irəli gəlir. O qeyd etdi ki, aprel döyüşləri gənclərin vətənpərvərlik hissinin daha da yüksəlməsinə təkan oldu: “Aprel döyüşlərinə rəssamların əksəriyyəti əsər həsr edib. Bu əsərlər müxtəlif sərgilərdə nümayiş etdirilib. Biz gənclər üçün aprel döyüşləri mövzusunda əsər çəkmək çox mühümdür. Biz həm tariximizi təbliğ edirik, həm də qəhrəmanlığımızı”.
İradə SARIYEVA
