Arzu Tağıyev: “Bakı Beynəlxalq Kitab Sərgi-Yarmarkasının Azərbaycan nəşriyyatlarının, mətbəələrinin, poliqrafçılarının işinin tanıdılması...” Qiymət Məhərrəmli: “Bu tədbir çərçivəsində Azərbaycan nəşriyyatları və xarici nəşriyyatlar arasında əməkdaşlıq əlaqələri yaranar” İbrahim İlyaslı: “Azərbaycanda nəşr olunmuş kitablardan xarici naşirlərin diqqətini cəlb edənlər...”
Azərbaycanda nəşriyyat sisteminin yenidən qurulması, müasir tələblərə cavab verən nəşriyyat və mətbəələrin yaradılması bu sahədə qarşıya qoyulan əsas istiqamətlərdən biri olub. İllər əvvələ qədər bu sahədə ciddi problemlərin mövcudluğu hər bir naşiri narahat edirdi. O vaxt Azərbaycan nəşriyyatlarının çap etdiyi kitabların keyfiyyətinin aşağı olması diqqəti cəlb edirdisə, bu gün fərqli bir mənzərə yaranıb. Bu sahədə həqiqətən də uğurlu işlər görülür.
Azərbaycan nəşriyyatlarının çap etdiyi kitablar artıq dünyanın bir sıra ölkələrində keçirilən beynəlxalq kitab sərgilərində Azərbaycan kitabını təmsil edir. Sözsüz ki, Azərbaycan nəşriyyatları tərəfindən çap edilən kitabların xarici ölkələrdə satılması, müxtəlif kitabxanalarda, şəxsi evlərdə olması, ödüllər alması kitabımızın uğurudur.
Azərbyacanın nəşriyyat sənayesinin inkişafını şərh edən mütəxəssislər bildirir ki, beynəlxalq kitab satış-sərgilərinin keçirilməsi nəşriyyatların, naşirlərin işinə ciddi təkan verir.
Son illər ənənəvi olaraq Mədəniyyət və Turizm Nazirliyinin təşkilatçılığı ilə V Bakı Beynəlxalq Kitab Sərgi-Yarmarkası keçirilir. Dünyanın bir sıra ölkələrinin nəşriyyatlarının qatıldığı kitab sərgi-yarmarkası bir sıra əhəmiyyətli göstəricilərinə görə diqqəti çəkir. Sentyabrın 28-də açılışı olan və Bakı İdman Sarayında təşkil olunan ənənəvi sərgi-yarmarkada 40 ölkəni təmsil edən kitabxana, nəşriyyat və poliqrafiya müəssisələrinin təmsilçiləri iştirak edir.
Qeyd edək ki, mədəniyyət və turizm naziri Əbülfəs Qarayev builki sərgi-yarmarkaya da böyük marağın olduğunu bildirərək vurğulayıb ki, son vaxtlar Azərbaycanda beynəlxalq tədbirlər mütəmadi olaraq keçirilir. Nazir onu da deyib ki, sərgi-yarmarkada poliqrafiya müəssisələri öz məhsulları ilə təmsil olunur: “Əsas məqsəd kitab nəşri sahəsində ən müasir texnologiyaların ölkəmizə gətirilməsinə nail olmaq, kitabın təbliği və yayılması, dərsliklərin, lüğətlərin, tərcümə və elmi ədəbiyyatların işıq üzü görməsinə yönəlmiş qərar və göstərişlərin icrasını vaxtında təmin etmək, gənc nəslin kitaba maraq və sevgisini daha da artırmaq, Azərbaycan oxucusunu dünyanın aparıcı nəşriyyatlarının məhsulları ilə tanış etməkdir”.
Onu da vurğulayaq ki, son illər latın qrafikalı nəşrlər hesabına kitabxanaların zənginləşdirilməsi istiqamətində xeyli iş görülüb. Həyata keçirilən tədbirlər Prezident İlham Əliyevin Azərbaycan dilində latın qrafikası ilə kütləvi nəşrlərin həyata keçirilməsi və dünya ədəbiyyatının Azərbaycan dilində çap edilməsi haqqında imzaladığı müvafiq sərəncamlara uyğun olaraq reallaşdırılır.
Ekspertlər bizimlə söhbətində bildirdilər ki, Bakı Beynəlxalq Kitab Sərgi-Yarmarkasının keçirilməsi Azərbaycan naşirlərinə, poliqrafçılarına böyük təkan verir.
Nəşriyyatlardan birində çalışan Arzu Tağıyev bizimlə söhbətində bildirdi ki, 5-ci dəfədir keçirilən Bakı Beynəlxalq Kitab Sərgi-Yarmarkası ilbəil daha da təkmilləşir. Onun bildirdiyinə görə, son illərdə ölkəmizdə poliqrafiya sənətinin inkişafı diqqətdi cəlb edir: “Bakı Beynəlxalq Kitab Sərgi-Yarmarkasının Azərbaycan nəşriyyatlarının, mətbəələrinin, poliqrafçılarının işinin tanıdılması, Azərbaycan kitabının təbliğ edilməsi baxımından əhəmiyyəti böyükdür. Vaxt var idi ki, bizim nəşriyyat sistemi bərbad gündə idi, çap olunan kitabların keyfiyyəti o qədər aşağı idi ki, onları nəinki beynəlxalq kitab sərgilərinə, hətta nazirlik tərəfindən kitabxanalarda təşkil edilən sərgilərə belə çıxarmağa adam utanırdı. Amma bu gün dövlətin nəşriyyatlara göstərdiyi dəstək sayəsində Azərbaycanda nəşriyyat-poliqrafiya sistemi yenidən qurulub və müasir poliqrafiya tələblərinə cavab verən kitablar nəşr edilir. Nəfis şəkildə çap olunan kitablar ən qabaqcıl mətbəə avadanlıqları ilə ərsəyə gətirilir. Bu gün Azərbaycan nəşriyyatları müasir çap avadanlıqları ilə təmin olunub. Özəl nəşriyyatlar bir-birilə rəqabətlilik formasında çalışırlar. Bu gün yaxşı haldır ki, Azərbaycan nəşriyyatlarının çap etdiyi kitablar beynəlxalq sərgilərə qatılır, Azərbaycanı təmsil edir, kitablarımız ən yüksək mükafatlara layiq görülür. Beynəlxalq kitab sərgilərinə təqdim olunan məhsullar arasında həm dövlət, həm özəl nəşriyyatların, eləcə də Heydər Əliyev Fondunun nəşrləri yer alır. Heydər Əliyev Fondu tərəfindən bir sıra kitabların çap edilməsi xüsusi əhəmiyyət daşıyır”.
Qeyd edək ki, sentyabrın 30-da başa çatacaq V Bakı Beynəlxalq Kitab Sərgi-Yarmarkasında ölkəmizi “Təhsil”, “Şərq-Qərb”, “Adiloğlu”, “Yazıçı”, “Əli və Nino”, “Apostrof”, “Alatoran”, “Letterpress” və digər nəşriyyat-poliqrafiya müəssisələri təmsil edir.
Filologiya üzrə fəlsəfə doktoru, şairə Qiymət Məhərrəmli bizimlə söhbətində qeyd etdi ki, V Bakı Beynəlxalq Kitab Sərgi-Yarmarkasının keçirilməsi yalnız Azərbaycanın kitab sənayesinin dünyada tanıdılmasına xidmət etmir, bu həm də nəşriyyatlar, poliqrafçılar arasında yeni əməkdaşlığın yaranmasına böyük şərait yaradır: “Azərbaycan nəşriyyatları həqiqi mənada son illər xeyli inkişaf edib. Bu da dövlətin bu sahəyə göstərdiyi qayğı nəticəsində baş verib. Bundan əlavə, əvvəl bu sahəyə sırf gəlir yeri, biznes məqsədilə baxırdılarsa, bu gün ona münasibət fərqlidir. İndi nəşriyyat və mətbəələrdə əsasən peşəkarlar çalışır. Peşəkar da ortaya səviyyəli çap məhsulu qoyur. Təbii ki, gəlir də götürür. Amma bu gəliri keyfiyyətli iş müqabilində əldə edir. Nazirliyin təşkilatçılığı ilə keçirilən V Bakı Beynəlxalq Kitab Sərgi-Yarmarkasının əhəmiyyəti həm də ondadır ki, bu tədbir çərçivəsində Azərbaycan nəşriyyatları və xarici nəşriyyatlar arasında əməkdaşlıq əlaqələri yaranar. Nəşriyyatlarımızın xarici nəşriyyatlarla əməkdaşlığı nəticəsində isə olduqca maraqlı layihələr həyata keçirilə, yeni nəşrlər meydana çıxa bilər. Nəşriyyatlar müştərək kitablar da çap edə bilər. Bu olduqca vacib bir işdir. Bu gün Azərbaycan nəşriyyatları da ayağa durub özlərini göstərə bilirlər. Yerli bazarda Azərbaycan nəşriyyatlarının məhsulları öz keyfiyyətinə görə seçilir”.
Ə.Kərim adına Sumqayıt Poeziya Evinin rəhbəri, şair İbrahim İlyaslının sözlərinə görə də bu tədbirin keçirilməsi əhəmiyyətlidir: “Mənim bildiyim qədər, yarmarkada xarici nəşriyyatlar da iştirak edirlər. Onların iştirakı Azərbaycanda nəşr olunan kitablara maraq yarada bilər, azərbaycanlı naşirlərlə anlaşmalar yapa bilərlər. Beləliklə, Azərbaycanda nəşr olunmuş kitablardan xarici naşirlərin diqqətini cəlb edənlər, xaricdəki kitab bazarlarının tələblərini ödəyənlər o ölkələrdə nəşr edilə bilər”.
İradə SARIYEVA
