“Borcalı” İctimai Birliyinin təşəbbüsü və təkilatçılığı ilə Azərbaycanda Atatürk Mərkəzində Qarabağ müharibəsi veteranı, ehtiyatda olan polkovnik-leytenant, şair Hüseyn Faxralının “Dağlardan gəlmişəm” və “Borçalıdan gələn var” adlı kitablarının təqdimatı keçirilib. Bu barədə baki-xeber.com-a “Borçalı” İB-nin Mətbuat xidmətindən məlumat veriib.
Borcalı” İctimai Birliyinin İdarə Heyətinin sədri, şair-publisist Dəyanət Osmanlı Hüseyn Faxralının Vətənin müdafiəsində hərbçi fəaliyyətindən, habelə poeziya yaradıcılığına xas olan əlamətlərdən danışaraq onun bir vətəndaş-yazar kimi müraciət etdiyi mövzuların ictimai məzmun daşıdığını - vətənpərvərlik, millilik, doğma yurda bağlılıq ruhunda qələmə alındığını vurğulayıb.
Tədbirdə ziyalılar, müharibə veteranları, yazarlar və QHT nümayəndələri Hüseyn Faxralının ictimai, ədəbi fəaliyyətinin əsas cəhətləri haqqında fikirlərini bölüşüblər. Ehtiyatda olan mayor-jurnalist Rəşid Faxralı, jurnalist Paşa Babakərli, veteran Ramin Məmmədov, Əmirxan Babaşov, Yaşar Kamaloğlu, Fərman Bədəlov, Rəşad Saraçlı, Bayram Aşıqlı, Sədi Yaradanqulu, Məmmədəli Babaşlı və digər çıxışçılar Hüseyn Faxralı ictimai, milli-mənəvi məsələlərdə də fəallıq göstərdiyini qeyd edərək, müəllifə ədəbi yaradıcılığında uğurlar arzulayıblar. İstedadlı aşıq Fikrət Borçalı, klassik saz havaları üzərində şairin şeirlərindən nümunələr səsləndirib.
Sonda “Borçalı” İctimai Birliyi adından Hüseyn Faxralıya “Borçalının vətənpərvər şairi” Diplomu təqdim olunub. Müəllif tədbirin təşkilatçılarına və iştirakçılarına diqqətə, xoş sözlərə görə təşəkkürünü bildirib, yaradıcılıq planlarından bəhs edib.
İradə SARIYEVA
