Aydın Xan Əbilov: “Bizim etirazlarımız sivil formadadır, bu, mədəniyyət tədbirlərinin ləğv edilməsi, ictimai və mədəniyyət xadimlərinin narazılığı şəklində bildirilir”
Rusiyanın Yekaterinburq vilayətində azərbaycanlılara qarşı etnik zəmində törədilən cinayət hadisəsi, beş vətəndaşımızın qətlə yetirilməsi, bir neçəsinin həbs edilməsi, üzərlərində məhkəmə qurulması, onlara qarşı ağır ittihamlar irəli sürülməsi faktları Azərbaycanda ciddi narahatlıqla və narazlıqla qarşılanır.
Rəsmi dövlət qurumlarımız da Rusiyanın davranışlarına adekvat addımlar atırlar.
Bildiyimiz kimi, Azərbaycanın Mədəniyyət Nazirliyi bəyanat yayaraq bildirib ki, Rusiya Federasiyasının Yekaterinburq vilayətində etnik mənsubiyyətinə görə azərbaycanlılara qarşı Rusiyanın hüquq-mühafizə orqanları tərəfindən nümayişkarcasına törədilmiş məqsədli və mühakiməsiz qətl və zorakılıq əməllərini və bütövlükdə son dövrlərdə bu kimi halların sistematik xarakter aldığını nəzərə alaraq, Rusiya ilə dövlət və özəl müəssisələrin xətti ilə Azərbaycanda keçirilməsi nəzərdə tutulan mədəniyyət tədbirləri, o cümlədən konsertlər, festivallar, tamaşalar, sərgilər və s. ləğv edilir.
Azərbaycanın Rusiya ilə bir sıra mədəniyyət tədbirlərini ləğv etməsinin nə kimi təsiri və effekti olacaq?
“Bu elə bir təsir, təzyiq vasitəsidir ki, bununla Rusiyada, eləcə də başqa ölkələrdə soydaşlarımıza qarşı kobud münasibətə, ayrıseçkiliyə, təzyiqə son qoyula bilər”
Yeni Yazarlar və Sənətçilər İctimai Birliyinin sədri, www.kitabxana.net-Mir Cəlal Paşayev adına Milli Virtual-Elektron Kitabxananin təsisçisi, Prezident təqaüdçüsü, yazıçı-kulturoloq Aydın Xan Əbilov "Bakı-Xəbər"ə bildirdi ki, Rusiyada azərbaycanlılara qarşı baş verən məlum faciəvi hadisədən sonra Azərbaycan və Rusiya cəmiyyətlərində iradlar, etirazlar, narazılıqlar yarandı. “Bir çox hallarda bu kimi hadisələr zamanı güzəştlərə gedilirdisə bu dəfə cəmiyyət o güzəştlərə getmək istəmir. Özünü hər zaman Azərbaycanın strateji müttəfi sayan Rusiyada soydaşlarımıza qarşı belə bir hadisə baş verməsindən təəssüflənirik. Ona görə də, həm cəmiyyət, həm ziyalı təbəqəsi, həm mədəniyyət və ictimai təsisiatlarımız bu məsələyə öz etirazlarını bildirməli idilər. Müxtəlif istiqamətdə rəsmi səfərlərdən imtinadan sonra, sözsüz ki, Rusiya ilə dövlət və özəl müəssisələrin xətti ilə Azərbaycanda keçirilməsi nəzərdə tutulan mədəniyyət tədbirlərinin, konsertlərin, festivalların, tamaşaların, sərgilərin və sairin ləğv olunması da gözlənilməz deyildi. Mədəniyyət Nazirliyinin qəbul etdiyi bu qərarı biz normal qarşılayırıq. Biz bunu geosiyasi, geomədəni etiraz, təzyiq vasitəsi kimi qəbul etməliyik. Rusiya dünyanın ən böyük dövlətlərindən biridir, orda bizim soydaşlarımız, digər türkdilli xalqlar və müsəlmanlar da yaşayır. Bizim Rusiyaya olan isti münasibətlərimiz müqabilində onların bizə qarşı etdikləri qəbuledilməzdir. Biz bunu təəssüflə qarşılayırıq. Rusiya dövlət qurumlarında, yaxud başqa bir istiqamətdə işləyən və özünü dövlətin gözündə “işləyən təşkilat” kimi göstərmək istəyən qurumların bu cür hadisələr törətməsi, əlbəttə ki, ədəbi, mədəni, ictimai, sosial, elmi əlaqələrə, dövlətlərarası münasibətlərə sərinlik gətirir. Ona görə də bu hadisələrə etiraz olaraq mədəniyyət tədbirlərinin ləğv olunması qərarı tam yerindədir. Bu elə bir təsir, təzyiq vasitəsidir ki, bununla Rusiyada, eləcə də başqa ölkələrdə soydaşlarımıza qarşı kobud münasibətə, ayrıseçkiliyə, təzyiqə son qoyula bilər.
Bizim ictimai-siyasi xadimlərimiz, yazıçı və şairlərimiz, sənət adamlarımız, dövlət qurumlarımız vətəndaşlarımıza qarşı olan bu tip məsələlərə həmişə öz etirazlarını bildiriblər. Bu dəfə baş verən dəhşətli hadisəyə də biz öz etirazlarımızı bildiririk. Bizim etirazlarımız sivil formadadır, bu, mədəniyyət tədbirlərinin ləğv edilməsi, ictimai və mədəniyyət xadimlərinin narazılığı şəklində bildirilir.
Azərbaycan Mədəniyyət Nazirliyinin bu addımını Rusiya normal qəbul etməlidir. Bu ona görə edilib ki, Rusiya baş verən hadisəyə məntiqli bir cavab versin və soydaşlarımızın, vətəndaşlarımızın narahatlığına son qoyulsun. Hadisə zamanı öldürülən azərbaycanlıların ailələrinə təsəlli olacaq addımlar atılsın, həbs edilənlərlə bağlı ədalətli qərar qəbul edilsin, onlardan və ailələrindən üzr istənilsin, varislərinə təzminat ödənilsin. Bu da bir daha belə bir hadisənin törədilməsinin qarşısını ala bilər”.
A.X.Əbilov qeyd etdi ki, vaxtilə Rusiyanın təyyarəsi səhvən vurulanda Azərbaycan qarşı tərəfdən üzr istədi, bütün müvafiq addımları atdı, amma Rusiya nə mülki təyyarəmizin vurulmasına, nə digər hadisələrə, nə də son baş verənlərə görə məsuliyyətini dərk edib müvafiq addım atmadı.
A.X.Əbilovun sözlərinə görə, biz sivil formada etirazımızı bildirməliyik, lazım gəlsə beynəlxalq sferada, Avropa məhkəməsində də bu məsələ ilə əlaqədar hüquqi addım atılmasına nail olmalıyıq. “Nəinki Rusiyada, hətta başqa ölkələrdə vətəndaşlarımızın başına gələn bu kimi hadisələrə sussaq, etiraz bildirməsək bu silsilə xarakter daşıyacaq və 60 milyonluq dünya azərbaycanlıları dövlətimizə arxayın olmayacaq.
Bu baxımdan, indiki vəziyyətdə nazirliyin, mədəniyyət adamlarının, ictimai-siyasi xadimlərin atdıqları addımlar məntiqlidir. İnanmaq istəyirik ki, nə Rusiyada, nə də başqa ölkələrdə azərbaycanlılara qarşı analoji hadisə bir daha baş verməyəcək”-deyə A.X.Əbilov qeyd etdi.
İradə SARIYEVA
