Akademik Milli Dram Teatrı ətrafında qalmaqallar səngimək bilmir, əksinə, günü-gündən daha da alovlanır. Sanki gözəgörünməz bir əl var və bu əl teatrda sakitliyin təmin olunmasını istəmir.
Bilirik ki, bu il aprelin 4-də Akademik Milli Dram Teatrında keçirilən iclas zamanı bədii rəhbər Mehriban Ələkbərzadə teatrşünas İlham Rəhimlinin Bədii Şuranın üzvlüyündən çıxarıldığını bəyan edib və nəticədə də bəzi aktyorlar arasında qarşıdurma baş verib. Mediada və sosial şəbəkələrdə yayılan iddialara görə, İ.Rəhimlinin Şuradan çıxarılmasına etiraz edən Xalq artisti Əli Nurla Əməkdar artist Füzuli Hüseynov arasında gərginlik baş verib. Hətta o da iddia olunur ki, gərginlik fiziki qarşıdurmaya çevrilib və F.Hüseynov Ə.Nura “əl qaldırıb”. Ə.Nur isə dəfələrlə bu məsələyə sosial şəbəkə hesabında aydınlıq gətirib və deyilənləri təkzib edib, əlbəyaxa dava deyil, mübahisə yaşandığını bildirib.
Qeyd edək ki, mədəniyyət naziri Adil Kərimli aprelin 16-da Azərbaycan Dövlət Akademik Milli Dram Teatrında olub, teatrın kollektivi ilə görüşüb onların şikayətlərini, fikir və təkliflərini dinləyib.
Əksəriyyət ümid edirdi ki, nazirin “Azdramada” görüş keçirməsindən sonra orda sular durulacaq və bütün problemlər, qarşıdurmalar arxada qalacaq, kollektiv yalnız yaradıcılıq uğurları ilə gündəmə gələcək. Təəssüflər olsun ki, nazirin teatra gəlişindən sonra da problem səngimədi, biz mətbuatda əməkdar artist Mehriban Xanlarovanın, Əli Nurun teatrın bədii rəhbəri Merhriban Ələkbərzadəyə qarşı ittiham dolu fikirlərini oxuduq. Bu gün də Ə.Nurla F.Hüseynov arasında qarşıdurmanın mövcud olduğu deyilir.
Son yayılan məlumata görə isə, Xalq artisti Əli Nur Əməkdar artist Füzuli Hüseynovla bağlı hüquq-mühafizə orqanlarına müraciət edib. “Əminəm ki, Füzuli Hüseynov törətdiyi əmələ görə qanun qarşısında layiqli cəzasını alacaq”-deyə Ə.Nur açıqlamasında deyib.
Füzuli Hüseynov: “Mən elə adda adam tanmıram”
Ə.Nurun onunla bağlı hüquq-mühafizə orqanlarına müraciət etməsinə münasibət bildirməsi üçün Əməkdar artist Füzuli Hüseynovla əlaqə saxladıq. F.Hüseynov “Bakı-Xəbər”ə bildirdi ki, məşqdə olduğu üçün danışa bilmir. Əli Nurun onunla bağlı hüquq-mühafizə orqanlarına müraciət etməsinə gəlincə, F.Hüseynov “Mən elə adda bir adam tanmıram”-deyə bildirdi.
Əli Nur: “Bu kobudluğuna, xuliqanlığına görə Füzuli Hüseynov teatrdan xaric olunmalıdır”
Əli Nur isə “Bakı-Xəbər”ə bildirdi ki, nazir teatra gəlib-gedəndən sonra da problem öz həllini tapmadı: “Bu məsələ hələ ki, öz həllini tapmayıb. Əlaqədar qurumlar məsələdən xəbərdardır və mənə deyiblər ki, baş verənlər araşdırılacaq. Hadisə baş verəndən sonra məni rəsmi qurumlara dəvət ediblər, Prezident Administrasiyasında olmuşam. Baxıb görürəm ki, hadisənin üstündən iki ay keçib, amma heç bir ölçü götürülməyib. Heç bir tədbir görülmədiyi üçün hüquq-mühafizə orqanlarına müraciət etdim.
Daxili İşlər Nazirliyindən də mənimlə əlaqə saxlayıb məsələ ilə məşğul olduqlarını dedilər.
Hadisənin səhərisi günü məni Yasamal rayon prokuroru çağırdı ki, bu teatrda nə baş verib?”.
Ə.Nur qeyd etdi ki, F. Hüseynov ona qarşı aqressiv davranış sərgiləyib və nəticədə xoşagəlməz hadisə baş verib: “Hadisə baş verən andan dərhal sonra məsələ ilə bağlı hüquq-mühafizə orqanlarına, prokurorluğa rəsmi şəkildə müraciət etdim. Hazırda Fizuli Hüseynovun törətdiyi cinayət işi ilə bağlı prokurorluqda istintaq gedir.
Teatrımızın nüfuzuna xələl gəlməməsi üçün hadisəni ictimaiyyətə açıqlamadım və mətbuatda inkar etməyə üstünlük verdim. Düşünürdüm ki, teatr rəhbərliyi məsələni obyektiv qiymətləndirəcək və müvafiq intizam tədbirləri görüləcək. Lakin o, sanki heç nə olmamış kimi fəaliyyətini davam etdirir”.
Hadisənin baş verməsi barədə Ə.Nur bunları dedi: “Teatrda Bədii Şuranın iclası idi. Qaydalara görə, Şuranın iclasında da teatrın aktyor və aktrisaları iştirak edir. Həmin iclasda Bədii Şuranın üzvləri olaraq mən, xalq artistləri Sabir Məmmədov, Rafiq Əzimov, Zemfira Nərimanova, ədəbi hissə müdiri Cavid Zeynalov, İlham Əsgərov, Mehriban Ələkbərzadə və Əməkdar artist Füzuli Hüseynov iştirak edib. Ömründə bir kitab, bir qəzet oxumayan, nəzəriyyəni bilməyən, dünya teatrından xəbəri olmayan Əməkdar artist Füzuli Hüseynov da Bədii Şuranın üzvü seçilib. İclasda teatrın perspektivləri haqqında danışmağa başladılar. Mehriban Ələkbərzadə gəlib mənim qarşımda durub “Əli müəllim, dur danış” dedi. Bildirdim ki, danışmaq istəmirəm. Nəsə situasiya mənim xoşuma gəlmədi. Füzuli ayağa durub dedi ki, biz belə edəcəyik, elə edəcəyik. Yenə də Mehriban Ələkbərzadə mənim danışmağımı israr etdi. Rafiq Əzimov danışdı. Samir Məmmədov gördü ki, Mehriban Ələkbərzadə mənim danışmağımı çox israr edir, “Əli müəllim danışmaq istəmir, qoyun mən danışım” dedi. Sabir Məmmədov danışdı. Direktor iclası bağlamaq istəyəndə bu (Füzuli Hüseynov) dedi ki, dur sən də danış, danışmasan getməyəcəyik. Bundan da əvvəl Nurəddin Mehdixanlı mənə demişdi ki, səni iclasda Mehriban Ələkbərzadə Füzuli ilə vuruşduracaq. Mən də dedim ki, mənim Füzuli ilə nə işim var, heç kəslə vuruşan deyiləm. Mən də teatrımızın dünya şöhrətli teatr olmasından, Londonda Kral Sarayında Abbas Mirzə Şərtifzadənin Otello rolunda şəklinin olmasından, bütün SSRİ-nin vaxtilə bu teatrla fəxr etməsindən, bu tetarın şərəfli bir yol keçməsindən və sairdən danışdım. Dedim ki, burda elə rejissorlar işləməlidir, elə tamaşalar hazırlamalıdırlar, o tamaşalar hadisəyə çevrilməlidir, dünyaya çıxmalıdır, o tamaşanı dünya qəbul etməlidir, bura uşaq-muşaq yeri deyil, bura məhəllə teatrı deyil, Akademik Milli Dram Teatrıdır. Bura prezidentin teatrıdır. Ulu öndər Heydər Əliyev deyirdi ki, bu mənim teatrımdır. Burda təsadüfi rejossorlar tamaşa qoymamalıdır. Çünki burda adını çəkmədiyim rejissor bir eybəcər tamaşa qoymuşdu, sonra da bir uşağı dəvət etmişdilər. Mən danışdıqca Füzuli də mənə yerindən söz atırdı. Birdən hirslənib ayağa durdu, söyüş söyə-söyə üstümə hücum etdi ki, səni bu dəqiqə öldürəcəyəm, vuracağam. Tez bunun qabağını kəsib qucaqladılar, sürüyə-sürüyə zaldan çıxarmaq istəyirdilər, bu da məni hədələməyə davam edirdi. Mən də onun qarşısında şax dayanmışdım və öz-özümə deyirdim ki, bu nə özbaşnalıqdır, bu nə cinayətdir? Nazirlə görüşdə də demişdim ki, teatrın 152 illik tarixində belə hadisə olmayıb ki, aktyor aktyoru söyüb üstünə hücum çəksin. Özü də mənim kimi aktyora qarşı bunlar edilib. Mən Xalq artistiyəm, qəhrəman atasıyam. İkincisi də mən nə danışmışam? Teatın estetikasından, yaradıcılıqdan danışmışam. Yəni bu teatrın estetikası başqa teatrların estetikasına bənzəmir, burda yüksək səviyyəli tamaşa qoyulmalıdır, rolları güclü aktyor və aktrisalar oynamalıdır. Rejissor hadisə yaratmalıdır. Nə isə onu zaldan çıxardılar. Direktorun yanına gəldik və direktor dedi ki, bu məsələni ört-basdır edək...Razılaşdım. Bir neçə gün sonra bəzi media orqanları yalan məlumat yaydılar ki, “Azdramada” insident olub və Əli Nuru aktyorlar “döyüb”. Belə bir hadisə baş verməyib axı. Yalan məlumatlar yayıldı, buna da kütlə inandı. Biri ağ yazdı, biri qara yazdı. Axı məni niyə hörmətdən salırsınız? Füzuli kimdir ki, məni döysün? O məni döyə bilməz axı. Mən güləşçiyəm. O mənimlə düşmənçilik etməmişdən əvvəl Xalq aristi Nurəddin Mehdixanlı ilə danışmır, Xalq artistləri Sabir Məmmədovla, Kazım Abdullayevlə, Əməkdar artist Rövşən Kərimduxtla düşməndir. Sən kimin yolu ilə gedirsən? Teatrda aktyor aktyorla da düşmən olar? Bütün xalq artistləri ilə düşməndir. Bunun da hamısının səbəbkarı Mehrbian Ələkbərzadədir. O, aktyoru aktyorla, aktrisanı aktrisa ilə vuruşdurur. O, bədii rəhbər postuna layiq deyil.
Füzulini paxıllıq və hikkə yerindən oynadır...”
Ə.Nur bildirdi ki, F.Hüseynovla bağlı konkret tədbir görülməlidir: “Onunla bağlı nə kimi tədbirlər görüləcəyini hüquq-mühafizə orqanları bilir. Mən onların yerinə heç nə deyə bilmərəm. Mən onu bilirəm ki, bu kobudluğuna, xuliqanlığına görə Füzuli Hüseynov teatrdan xaric olunmalıdır.
Mənim fikrim belədir, ilk dəfədir sizə deyirəm. Füzuli teatrda mövqeyini itirib. Onun yeri çayxanadır, bütün günü orda nərdtaxta oynasın...”
Ə.Nur sonda bildirdi ki, onun barəsində dezinformasiya yayan, yalan məlumatlar tirajlayan media orqanlarını, saytları da məhkəməyə verəcək, hər birindən 50 min manat məbləğində təzminat tələb edəcək...
Leyla QARAXANLI
