Məlum olduğu kimi, xalq artisti Röya Ayxan 78-ci Kann Film Festivalında iştirak edib. Sənətçi dünya üzrə məşhur tədbirdə 100 ən uğurlu şəxs arasında Azərbaycan musiqisinin mədəniyyət səfiri qismində iştirak edib və “Azərbaycan Musiqisinin Mədəniyyət Səfiri” mükafatını qazanıb.
Ancaq cəmiyyətin müəyyən təbəqəsi dünyaca məşhur kino festivalına bir müğənninin qatılmasının doğru olmadığını düşünür və buna etiraz edir. İlk növbədə, “Azərbaycanfilm” kinostudiyasının baş redaktoru Ayaz Salayev Xalq artisti Röya Ayxanın Kann Film Festivalına qatılmasına irad bildirib. O deyib ki, kim istəsə, qeydiyyatdan keçib, viza alaraq festivala gedə bilər: “Çətin bir şey deyil. Mən ora yüz dəfə getmişəm, amma heç ağlıma da gəlməzdi ki, həmin yerdən keçərkən bunu çəkib sosial şəbəkələrdə paylaşım. Bizdə ictimai savadsızlıq çox yayılıb. Bundan əlavə, ictimai şüur da geridə qalıb. Röya “Azərbaycan Musiqisinin Mədəniyyət Səfiri” mükafatı ilə təltif olunub, ancaq bu mükafatın Kann Film Festivalı ilə heç bir əlaqəsi yoxdur”.
Maraqlıdır, xalq artisti Röya beynəlxalq kino festivalında Azərbaycanı təmsil edə bilərdimi?
Zülfiyyə Eldarqızı: “Azərbaycan adı ilə kimsə hardasa iştirak edirsə, Azərbaycan mədəniyyətini təmsil edirsə buna sevinmək lazımdır, nəinki irad bildirmək”
Aktrisa, qiraətçi Zülfiyyə Eldarqızı “Bakı-Xəbər”ə şərhində bildirdi ki, müğənni Röya məlum festivala iştirakçı kimi qatılmayıb: “Röya Kann Film Festivalına heç bir film aparmayıb, filmlə qatılmayıb. Onun orda olmasında heç bir problem yoxdur. Onu da unutmamaq lazımdır ki, Azərbaycan adı ilə kimsə hardasa iştirak edirsə, Azərbaycan mədəniyyətini təmsil edirsə buna sevinmək lazımdır, nəinki irad bildirmək. Bu məsələ ilə bağlı insanlar iki yerə bölünüb. Kimisi kinoşünas Ayaz Salayevi müdafiə edir, kimisi də Röyanı. Ayaz Salayev yaxşı kino tənqidçisidir, yaxşı olardı ki, o da hər hansı bir Azərbaycan filmi ilə beynəlxalq festivalda iştirak etsin. Röyanın o cür festivalda iştirakını qınamaq lazım deyil”.
Ülviyyə Heydərova: “Röyanın festivalda iştirak etmək imkanı yaranıbsa, niyə də getməsin?”
Yazıçı-dramaturq Ülviyyə Heydərova hesab edir ki, A kateqoriyalı festivalda tamaşaçı və ya sənətçi kimi iştirak etmək mümkündür: “Dünya kino sənətinin diqqət mərkəzində olan bu festivala yüzlərlə, minlərlə biznesmen, model, şou-biznes, sənət adamları gedir. Festivalda müsabiqəyə qatılmaq, yarışmaq, münsiflərin rəyini, qiymətini almaq, yer tutmaq başqadır, iştirak etmək başqadır. Məlumat üçün deyim ki, məşhur türk aktyorları hər il hansısa şirkətin sponsorluğu ilə Kannda iştirak edirlər, poz verirlər, gəlirlər. Amma hər hansı filmi ilə festivala qatılmaq bu ayrı mövzudur. Röyanı niyə qınayırlar? Onun o festivalda iştirak etmək imkanı yaranıbsa, niyə də getməsin? Festivala gedib, iştirak edib, poz verib, zövq alıb. Hamıya olar, ona olmaz?”.
Ilhamə Əhmədova: “Bu festivala mütləq şəkildə Azərbaycanın tanınmış kino xadimləri qatılmalı idi”
Aktrisa İlhamə Əhmədova isə kino festivalına yalnız kino ulduzlarının getməli olduğunu düşünür: “Təəssüflər olsun ki, kino ulduzlarımız bu festivala getməyiblər. Ancaq Röya Ayxanın orada olması məni sevindirir. Çünki Kann Festivalında Azərbaycandan da kimsə iştirak edir. Biz də Kann Kino Festivalında ola bilərik. Röya xanıma uğurlar arzu edirəm. Ancaq bu festivala mütləq şəkildə Azərbaycanın tanınmış kino xadimləri qatılmalı idi”.
Leyla QARAXANLI
