Aydın Xan Əbilov: “Həm mahnı, həm ifaçılar, həm də texnoloji, estetik çətinliklər finala çıxmağa mane olur”
"Avroviziya 2025" beynəlxalq mahnı müsabiqəsi yekunlaşdı. Bu il ölkəmizi yarışmada "Mamagama" qrupu “Run with you” mahnısı ilə təmsil edib.
Maraqlı məqam ondan ibarətdir ki, bu il ölkəmiz məlum yarışmada 7 xalla sonuncu olub. Ölkəmizə yalnız San-Marino xal verib. Bununla da Azərbaycan həm yarımfinal, həm də ümumi səslərə görə sonuncu olub.
Yarışmanın qalibi isə 436 xalla Avstriya olub. Ölkəni "JJ" ləqəbi ilə tanınan Yohannes Piç adlı müğənni “Wasted love” mahnısı ilə təmsil edib.
Maraqlıdır, məlum yarışmada niyə ölkəmizə səs verilmədi? Müsabiqəyə təqdim edilən mahnımı zəif idi, yoxsa başqa məqamlar var?
“Kiməsə qəribə gələ bilər, ancaq mən əminəm ki, Elza Seyidcahan o yarışmaya qatılsa orda maraqlı yeniliklər edər”
Yeni Yazarlar və Sənətçilər İctimai Birliyinin sədri, www.kitabxana.net – Mir Cəlal Paşayev adına Milli Virtual-Elektron Kitabxananin təsisçisi, Prezident təqaüdçüsü, yazıçı-kulturoloq Aydın Xan Əbilov “Bakı-Xəbər”ə şərhində bildirdi ki, "Avroviziya” beynəlxalq müsabiqəsində iştirak Azərbaycan mədəniyyətinin, incəsənətinin Avropa və dünyaya tanıdılması baxımından unikal bir layihədir: “Ölkəmiz ilk qatıldığı illərdə bu layihədə qalib olub və hətta sırf həmin yarışma üçün saray belə inşa edilib. Ancaq son illər məlum yarışla bağlı problem yaşanır. Belə ki, həm mahnı, həm ifaçılar, həm də texnoloji, estetik çətinliklər finala çıxmağa mane olur. İctimai Televiziyanın məlum layihə ilə bağlı siyasətini heç cür anlamaq olmur. Onlar bir neçə müğənnini ora yığıblar, aralarında istedadlısı da var, olmayanı da. Hətta elələri var ki, yaxşı səsi olsa da, dünyada gedən proseslərdən xəbəri yoxdur. Nəzərə almaq lazımdır ki, "Avroviziya” tək musiqi deyil, həm də kulturoloji, geomədəni yarışmadır, təəssüf ki, hər kəs bunu dərk etmir. “Avroviziya” tək musiqiçi və bəstəkarların yarışması deyil, ölkələrin də yarışmasıdır. Musiqi kreativ silah olaraq bu müsabiqədə istifadə edilir. Onu da deyim ki, yarışmada konkret olaraq tamaşaçıların rəyi, fikri öyrənilmir”.
Həmsöhbətimiz vurğuladı ki, ölkəmizin bu yarışmada axırıncı olması heç də yaxşı hal deyil: “Danılmaz faktdır ki, müsabiqədə iştirak üçün dövlət büdcəsində kifayət qədər vəsait xərclənir. Ölkə rəhbərliyi və Mədəniyyət Nazirliyi maraqlıdır ki, Azərbaycan "Avroviziya” beynəlxalq müsabiqəsində qalib olsun. Təəssüflər olsun ki, bu yarışmaya Mədəniyyət Nazirliyinin təsiri sıfırdır. Kulturoloqlar dəvət edilmir, mütəxəssislərin rəyi nəzərə alınmır”.
Kulturoloq onu da əlavə etdi ki, ölkəmizdə peşəkar musiqi ilə məşğul olan kifayət qədər gənc var: “Onların potensialından istifadə edilməlidir. Həmçinin, "Avroviziya” beynəlxalq müsabiqəsində Azərbaycanın atributlarından geniş istifadə edilməlidir. Biz Avropaya, dünyaya muğamı sevdirmişik. Avropa əsl kişi, əsl qadın müğənnilərə, istedadlara həsrətdir. O yarışmaya bu tip insanları göndərmək lazımdır. Başa düşürəm ki, musiqidə, pop ifa edilən zaman müxtəlif şou göstərilə bilər. Yaxşı olar ki, biz bu sahədə yenilik edək. Yeniliklərlə Avropanın diqqətini cəlb edə bilərik. Kiməsə qəribə gələ bilər, ancaq mən əminəm ki, Elza Seyidcahan o yarışmaya qatılsa orda maraqlı yeniliklər edər. Ola bilər ki, Elza xanım birinci yer tutmasın, ancaq onun performansı avropalıların yaddaşında qalacaq. Beynəlxalq yarışlarda səhnə performansı önəmlidir. Xatırladım ki, illər öncə "Avroviziya” yarışmasında Nigar-Eldar cütlüyü qalib gəlmişdi. Həmin qalibiyyətdə səhnə performansı, mahnı seçimi ilə yanaşı, kişi-qadın dueti diqqəti cəlb etdi. Belə ki, Avropanın kişi-qadın duetinə ehtiyacı var, ailə dəyərləri görmək istəyir. Bu tip layihələrdə milli dəyərləri göstərmək lazımdır”.
Günel CƏLİLOVA
