Azərbaycan Yazıçılar Birliyinin (AYB) "Natavan" klubunda tanımış şair, jurnalist-publisist, bir neçə kitab müəllifi, "Qarabağa aparan yol" qəzetinin baş redaktoru Əli Mahmuda həsr olunmuş "Əli Mahmud və onun" Qarabağa aparan yolu" kitabının təqdimatı keçirildi. Kitabın müəllifi tanımış publisist, Prezident mükafatçısı Fariz Çobanoğludur. Təqdimat mərasimini AYB katibi Rəşad Məcid açdı. O, bildirdi ki, bu tədbirin təşkilində və keçirilməsində ürəklə iştirak edib. Ə. Mahmudun imzasını xalq yazıçısı Anarın ötən əsrin 80-ci illərində yazdığı "Qarabağ şikəstəsi"dən tanıdığını deyən R. Məcid qeyd etdi ki, bu yazının böyük bir hissəsi Ə. Mahmuda həsr olunub."
Sonrakı illərdə Əli müəllimlə tez-tez görüşürdük. Çox söhbətlər etmişik". Ə. Mahmudun "Şuşa" qəzetində fəaliyyətindən, 1988- ci ildə başlayan siyasi proseslərdə iştirakından, mübarizəsindən danışan R. Məcid qeyd etdi ki, onun həm də jurnalistikamızda özünəməxsus rolu var. Ə. Mahmudun Çingiz Aytmatovla müsahibəsini, Heydər Əliyev və İlham Əliyevlə bağlı kitablarını vurğulayan R. Məcid dedi ki, onun çoxlu kitabları var. "Qarabağa aparan yol" qəzetindən də danışan natiq qeyd etdi ki, bu qəzet ruhumuzun diri qalmasında böyük rol oynayıb. R. Məcid vurğuladı ki, Əli Mahmudun və Vasif Quliyevin Əməkdar jurnalist fəxri adı verilməsi üçün müraciət edilib:"Onların Əməkdar jurnalist olmaması məyusedicidir. Amma müraciət edilib". Tədbirin aparıcısı "Kredo" qəzetinin baş redaktoru Əlirza Xələfli bildirdi ki, Əli Mahmud yaradıcılıqda öz izini qoyan, öz xüsusi dəst-xətti olan qələm adamıdır. Yazıçı-dramaturq Elçin Hüseynbəyli Ə. Mahmudun yaradıcılığından, xidmətlərindən danışdı və bildirdi ki, Ə. Mahmud Əməkdar jurnalist fəxri adını haqq edən qələm adamdır. Şair İbrahim İlyaslı da çıxışında bildirdi ki, Ə. Mahmud imzası mətbuatda tanınan və dəyər verilən imzadır. O kitabı ərsəyə gətirdiyi üçün müəllif Fairz Çobanoğluna təşəkkür etdi və dedi ki, bu ciddi bir zəhmətin nəticəsidir və ləyaqətli insana həsr olunub. Aqşin Paşayev, şair Adil Cəmil, AYB üzvü, polkovnik Rahib Qarayev, "Təzadlar" qəzetinin baş redaktoru Asif Mərzli və başqaları çıxış etdi. Kitabın redaktoru, professor Minaxanım Təkləli - Nuriyev Ə. Mahmudun səmimi, təmkinli, dostcanlı, həssas olduğunu bildirdi və bunu nümunə hesab etdiyini qeyd etdi. Kitabın ərsəyə gəlməsi prosesindən danışan professor bildirdi ki, Ə. Mahmud bu kitaba çox həssaslıqla, məsuliyyətlə yanaşırdı:"Bu kitabda təsirli nöqtələr çoxdur". Tanınmış yazar Vasif Quliyev Ə. Mahmudla tanışlığından danışdı və bildirdi ki, onunla eyni dövrdə mətbuata gəlib, 1971-ci ilə jurnalistka fəaliyyətinə başlayıblar. Ayb-nin mətbuat xidmətinin rəhbəri, şair, publisistik Xəyal Rza danışdı və bildirdi ki, Ə. Mahmudu uşaqlıqdan tanıyır. Şair Əyyub Şırlanlı, Ağacəfır Həsənli, Əlövsət Məhərrəmli, Məhərrəm Gülmalıyev, nəvəsi Turan, qəzetin əməkdaşı Təranə Əlizadə, şair Dayandur Sevgin, Nərman Fərman da çıxış edərək Ə. Mahmudun yaradıcılıq yolundan, şəxsi keyfiyyətindən danışdılar. Sonda Əli Mahmud çıxış edərək bildirdi ki, onun süfrəsi halal süfrədir, onun içində saflıq var və bu görüş o saflığın bəhrəsidir. Ə. Mahmud qonaqlara təşəkkürünü bildirdi. İradə SARIYEVA
