Siyavuş Kərimi: "Artıq on ildir ki, bu işlə məşğuluq. on ildir bu studiya qurulacağı günü gözləyir"
Azərbaycanda yüksək tələblərə cavab verən səsyazma studiyalarının olmaması nəticəsində ölkənin sənət adamları, müğənnilər, şou-biznesçilər xarici ölkələrə üz tutur və mahnılarını orada yazdırırlar, bu da ölkədən mədəni biznes adı altında külli miqdarda vəsaitin çıxarılması deməkdir. Məlum olduğu kimi, bu günlərdə Bakıda keçirilən Musiqi Forumunda Azərbaycan Milli Konservatoriyasının rektoru Siyavuş Kərimi bu problemi dilə gətirib ki, ölkəmizdə bir dənə də olsun normal, peşəkar musiqi studiyası yoxdur.
"Biz dəfələrlə nazirliyə müraciət etmişik bu məsələdə nəsə bir hərəkət olunsun, amma hələ ki, bir şey yoxdur"
Milli Konservatoriyanın rektoru Siyavuş Kərimi ilə əlaqə saxlayıb Azərbaycanda peşəkar səviyyəli studiyanın yaradılmamasının səbəblərinə aydınlıq gətirməsini istədik.
- Siyavuş müəllim, hansı səbəbdən Azərbaycan himni İngiltərədə yazılıb, özü də çox baha qimyətə. 200 min funt sterlinqə?
- Ən yaxşı studiyalar İngiltərədədir və himnimiz də orada yazılıb. Burada nə var ki? Çox yüksək səviyyədə yazılıb.
- Biz niyə o studiyaları qura bilmirik? Kim və nə mane olur?
- Biz o studiyanı qurmaq istəyirik, artıq binanın da tikintisini aparmışıq. Amma bizim o studiyanı yaratmağımız üçün vəsait lazımdır. Bu studiya elə Milli Konservatoriyanın binasındadır.
- Bu işə nə vaxtdan başlamısınız?
- Artıq on ildir ki, bu işlə məşğuluq. on ildir bu studiya qurulacağı günü gözləyir.
- Mədəniyyət Nazirliyi, eləcə də Elm və Təhsil Nazirliyi sizə dəstək vermirmi?
- Milli Konservatoriya Mədəniyyət Nazirliyinin tabeliyində deyil, Elm və Təhsil Nazirliyinə baxır. Biz dəfələrlə nazirliyə müraciət etmişik bu məsələdə nəsə bir hərəkət olunsun, amma hələ ki, bir şey yoxdur. Müraciətimizə cavab verməyib.
- Bu cür studiyaların olması bizə bir sıra üstünlüklər də qazandıra bilər ki, region ölkələri bizə müraciət edər. Bu fikirlə razılaşmaq olar?
- Bəli, Azərbaycanda yüksək standartlara cavab verən səsyazma studiyaları qurularsa ölkəyə vəsait gələ bilər. Azərbaycana belə studiyalar lazımdır, özü də bir deyil, bir neçə dənə olmalıdır. Dünya səviyyəli, keyfiyyətli studiyaların olması vacibdir.
- Bu gün Bakıda çoxlu səsyazma studiyaları var, onların keyfiyyəti normal deyil ki?
- Hərə evində bir kompüter qoyub "studiyam var" deyə bilər. Studiyalar var. Amma biz istəyirik ki, bu studiyalar dövlət səviyyəsində olsun. Bu çox möhtəşəm bir studiya olsun. Bir də ki, bu gün ümumiyyətlə səs rejissorları yoxdur. Onların təcrübə keçməsi üçün məkanlar olmalıdır, amma o məkanlar yoxdur. Bu studiya olmalıdır ki, biz orada o səs rejissorlarını da peşəkar səviyyədə yetişdirək. Həmçinin də kinoya, radioya, konsertlərə. teatra, televiziyalara səs rejissorları lazımdır. Forumda çıxış edirdim, xırıltı gəlirdi, çünki o adam səsi bilmir. Bax, belədir vəziyyət.
- Demək istəyirsiz ki, səs rejissorluğu sahəsində qeyri-peşəkarlar çoxdur?
- Qeyri-peşəkarlar kifayət qədərdir, amma demək olar ki, peşəkar yoxdur.
- Bizim müğənnilər də yəqin bu səbəbdən xaricə üz tuturlar?
- Bəli. Bizim studiyamız olsaydı himnimizi burada nota köçürərdik...Hesab edirəm ki, öz musiqimizi öz studiyamızda yazmağımız daha yaxşı olar. Sabah erməni götürüb bunların hamısını öz musiqisi kimi verəcək...Onsuz da bunlar edirlər. Bizim mədəniyyətimizin təbliğatı olmalıdır. Bunun da təbliğatı olmalıdır. Ən gözəl müdafiə təbliğatdır.
İradə SARIYEVA
