Məlum olduğu kimi, "Lotu Quli" ləqəbli azərbaycanlı kriminal avtoritet Antalyada birlikdə şam etdiyi şəxs tərəfindən öldürülüb. Məlumatlara görə, N.Səlifovu güllə ilə başından vuran şəxs Xan ləqəbli yaxın adamı olub. Xan “Quli”nin ətrafında xeyli müddət olub və ona yaxınlığı ilə seçilib. Quli xəstəxanaya çatdırılsa da, həyatını xilas etmək mümkün olmayıb.
Maraqlı məqam isə 2016-cı ildə elə Türkiyədə qətlə yetirilmiş digər kriminal avtoritet Rövşən Lənkəranski ilə “Lotu Quli”nin ölüm günündəki oxşarlıqdır. R. Lənkəranski 2016-il avqustun 18-də gecə qətlə yetirilib. “Lotu Quli” isə bir gün fərqlə 2020-ci il avqustun 19-da gecə saatlarında öldürülüb. Bu saat fərqini qatilin öz işini görməsi üçün uyğun zaman tapması ilə izah edirlər. Qeyd edək ki, məhz bu tarixdə və eyni ölkədə azərbaycan əsilli başqa bir kriminal avtoritet də güllələnib.
19 avqust 2013-cü ildə Türkiyədə qanuni oğru Əlibaba Həmidov (Qoca Yasamalski) qətlə yetirilib. Maraqlıdır ki, "Qoca"nın ölümündə Rövşən Lənkəranski, Rövşənin ölümündə "Quli" təqsirləndirilirdi. Qeyd edək ki, son qətlə yetirilən 1972-ci il təvəllüdlü Nadir Səlifov Gürcüstanda doğulub. O, 2005-2017-ci illərdə Azərbaycanda həbsdə olub. Həbsdən azad olunduqdan sonra Türkiyəyə gedib. 2018-ci ildə Türkiyədən deportasiya edilsə də, sonradan qaçaq yollarla yenidən Türkiyəyə qayıdıb. İlkin versiyalar qətlin kriminal klanlar arasında gedən müharibə nəticəsində qisasçılıq zəminində baş verdiyini söyləməyə imkan verir. Bu versiyanın həqiqətə yaxın olduğunu nəzərə alıb, kriminal qruplar arasında müharibənin tarixinə bir qədər ekskurs etmək yerinə düşər.
"Quli" çox gənc yaşlarında həbs edilib və 22 il məhbəsdə qalıb. Bütün əlaqələrini, var-dövlətini türmədə ola-ola yaradıb. İçəridə olsa da, əli çox uzun olub. Bütün bu baş verənlər vaxtilə yersiz atılıan bir əl-qol hərəkətinin üstündə yaşanır.
2000-ci ilin əvvələrində "Quli" ilə məşhur "oğru" "Sabirabadlı Hikmət" arasında 13-cü "zon"da mübahisə yaranır. Həmin vaxt nisbətən cavan olan Quli Hikmətə əl qaldırır. Bu hərəkət "zon"da birmənalı qarşılanmır, ancaq Hikmət qarşıdurmanın yaranmasına icazə vermir. "Sroku" az olan Hikmət həmin hadisədən bir neçə gün sonra azadlığa çıxır. Sonra bir neçə nüfuzlu azərbaycanlı "oğru"nun adından "zonlara" "Quli"nin "oğru" adından məhrum edilməsilə bağlı "proqon" (yazılı xəbər) göndərilir. Quli isə "oğru" olduğunu iddia edir və beləliklə Azərbaycandakı cinayətkar aləm iki yerə parçalanır. Ən maarqlısı budur ki, həmin “proqona” imzasını qoyan bütün azərbaycan əsilli “oğrular” sonradan bir-bir qətlə yetirilib. Bu da iki qrup arasındakı mübarizənin amansız mərhələyə qədəm qoyduğundan xəbər verir.
Bundan sonra tanınmış kriminal avtoritet "Naxçıvanlı Nuruş" "Quli" ilə "krıtıy türmədə" üz-üzə gəlir və deyilənə görə, həmin qarşılaşmada "Nuruş" "Quliyə" əl qaldırır. Bir neçə aydan sonra qapalı türmədə cəza çəkən "Nuruş"un yanına görüşə gələnlərin olduğu bildirilir. Görüş otağında bir neçə idmançı "Nuruş"un üstünə tökülüşür və onun bir neçə qabırğasını sındırırlar. Bunu edən "Razinski Samir" olur. Hamı anlayır ki, bu hadisənin sifarişini "Quli" verib. Üstündən bir müddət keçəndən sonra "Razinski Samir" tamamilə başqa motiv zəminində öldürülür. Üstəlik, o da yaxın dostlarından biri tərəfindən, yaranmış mübahisə zəminində qətlə yetirilir.
Biz istərdik ki, bu qətlin törədilməsi ilə bağlı başqa bir əsaslı versiyanı da nəzərdən keçirək. Görünən budur ki, İstanbulda öz yaxın adamı tərəfindən güllələnən "Lotu Quli"yə süi-qəsdin hansı zəmində baş verdiyi ilə bağlı müxtəlif versiyalar səslənir. Hələlik üstündə daha çox dayanılan versiya bu qətlin qisas zəminində baş verməsidir. İddia olunur ki, bu işdə 4 il əvvəl İstanbulda qətlə yetirilən digər "qanuni oğru" "Rövşən Lənkaranski"nin mənsub olduğu kriminal klanın əli var. Ancaq nədənsə, "Quli"nin tamamilə başqa bir motiv əsasında öldürülə biləcəyi versiyasına heç kim toxunmur.
"Quli"ni öldürən "Xan" gəncdir. "Oğru" aləminin qanunları ilə yaşayan bu şəxslərin çoxu "idealist" olur. Əksəriyyətinin ən böyük arzusu kriminal aləmin ierarxiyasında ən yüksək pillə sayılan "oğru" adını qazanmaqdır. Buna görə ən ağır "projarkalardan" (əzablardan) keçirlər, hətta həbsxana illərini belə açıq "zon"da yox, qapalı həbsaxanalarda keçirməli olurlar. Bu tip adamlar istənilən bir xoş olmayan rəftara görə özlərindən çıxıb, qeyri-adekvat addımlar ata bilər. Belə tipologiyaya tam uyğun gələn gənclərdən biri də "Quli"nin qatili "Xan" olub. Deyilənə görə, "Quli" son vaxtlar həddindən artıq dozada spirtli içki qəbul edirmiş. Etimal etmək olar ki, "oğru" kefinin yaxşı olduğu vəziyyətdə "Xan"ın xətrinə dəyən hansısa sözü deyib və qatil gənc bunu özünə sığışdıra bilməyib, nəticədə "Quli"ni öldürməklə qisasını almaq fikirinə düşüb. Bu versiyanı əsaslı və inandırıcı edə biləcək bir hadisəyə diqqətinizi yönəltmək istəyirik. Başqa bir "qanuni oğrunun" başına gələn bənzər hadisə Bakıdakı "zon"lardan birində yaşanıb. 2008-ci ildə "Yunus Bakinski" ləqəbli "oğru"ya da sui-qəsd olub. Həmin ilin oktyabr ayının 15-də Ədliyyə Nazirliyi Penitensiar Xidmətin 1 saylı "zon"unda cəza çəkən 1982-ci il təvəllüdlü Vəfadar Mirzəyev yatmış Yunus Nəzərova balta ilə zərbə endirib. Bu şəxs də "oğru"nun yaxınına buraxdığı etibarlı adamı olub. Sırf təsadüf nəticəsində "Yunus Bakinski" sağ qalıb. Vəfadar Mirzəyev bu addımı Yunusun onu bir neçə dəfə təhqir etdiyinə görə atdığını bildirmişdi. Hadisələr arasındakı sinxronluğa fikir verin. Hər iki situasiyada sui-qəsd olunan adam "oğru"dur. Bunu edənlər isə avtoritetlərin ən yaxınlarına buraxdıqları gənclərdi. Hər iki "oğru"ya sui-qəsd edilən an həmin adamlar 26 yaşında olub. Hər halda, bu versiya ətrafında da düşünmək üçün ciddi əsaslar mövcuddur.
İstənilən halda, kriminal aləmdəki bu cür ölümlərin əsl səbəbi müəmma olaraq qalır. Çünki əksər hallarda canlı şahidlər ortadan götürülür. Götürülməyəndə isə hadisənin iştirakçıları daha çox susmağa və ya istinaqı əsl motivə yox, başqa istiqamətə yönəltməyə müvəffəq olurlar.
Məhəmmədəli QƏRİBLİ
