Bank sektorunun restrukturizasiyası çərçivəsində dollarda götürülən kreditlərlə əlaqədar olaraq Azərbaycan banklarına yardım göstərilməsi məsələsinə baxıla bilər. Trend-in məlumatına görə, bunu Azərbaycan Mərkəzi Bankının sədri Elman Rüstəmov dollarla kreditlərin köhnə məzənnə [1,05 AZN/USD] üzrə qaytarılması imkanları barədə sualı cavablandırarkən deyib.
E.Rüstəmov bildirib: "Ümumilikdə mövqeyimiz belədir ki, bu, maliyyə intizamını poza bilər. Gələcəkdə insanlarda elə təəssürat yarana bilər ki, onlar kredit götürə və onları qaytarmaya bilər. Lakin çox güman ki, bank sektorunun restrukturizasiyası çərçivəsində, yardım proqram çərçivəsində baxacağıq ki, banklara necə kömək edək ki, onlar bunun öhdəsindən gələ bilsinlər. Yəqin ki, bu məsələni banklar və ekspertlərlə müzakirə edəcəyik".
Elman Rüstəmov "APA-Economics"ə açıqlamasında deyib ki, "AGBank" ASC və "DəmirBank" ASC konsolidasiya olunacaq. E. Rüstəmov qeyd edib ki, artıq hər iki bank arasında konsolidasiya ilə bağlı ilkin protokol imzalanıb.
"Bu addım Azərbaycanın bank sektorunun sağlamlaşdırılması istiqamətində atılan addımlardan biridir", - deyə AMB sədri bildirib.
Yaxın perspektivdə hansısa bankın lisenziyasının ləğv olunması ilə bağlı suala cavab verən E. Rüstəmov bildirib ki, bu proses davam edəcək.
Mərkəzi Bankının sədri bildirib ki, əhalinin Azərbaycanın sağlam banklarındakı əmanətləri tam sığortalanacaq.
Onun sözlərinə görə, bu yaxınlarda Milli Məclis bütün əmanətlərin tam sığortalanması haqqında qanun qəbul edib: "Qanunu artıq imzalamağa hazırlayırlar. İri sağlam banklardakı əmanətlər artım perspektivi ilə 100 faiz sığortalanacaq. Lakin sirr deyil ki, bank sistemində bəzi zəif və perspektivsiz banklar var, onların sektordakı payı çox azdır. Tərəfimizdən aparılmış təhlil göstərdi ki, belə banklardakı əmanətlərin 98 faizi əmanətlərin sığortalanması üzrə mövcud qaydalarla əhatə olunur".
E.Rüstəmov bağlanan banklar mövzusuna toxunaraq qeyd edib ki, onların əmanətlərinin təqribən 100 faizi sığortalanır: "Biz artıq "Gəncəbank"da əmanətlərin qaytarılması prosesinə başlamışıq və qısa müddət ərzində elə etməliyik ki, əmanətçilər pullarını götürə bilsinlər".
E.Rüstəmov əlavə edib ki, planlaşdırılan digər tədbirlər sırasında bank sektorunun gücləndirilməsi, onun sabitliyi və dayanıqlılığının artırılması var: "Mərkəzi Bank tədbirlər planı hazırlayır. Bu məqsədlə Dünya Bankı və Beynəlxalq Valyuta Fondunun ekspertlərini dəvət etmişik ki, sektor daha da sağlam və dayanıqlı olsun".
