Rəsmiyyə Sabir: “Bu prosesin mühüm nəticələrindən biri də sənayenin inkişafı hesabına yeni məşğulluq imkanlarının yaradılması və əmək bazarında iqtisadi fəallığın artırılması olacaq”
“Yeni bir güclü sənaye istiqaməti yaradılacaq. Beş min, bəlkə də daha çox yeni iş yeri yaradılacaq. İşğaldan azad edilmiş Qarabağın və Şərqi Zəngəzurun inkişafı, orada məşğulluğun artırılması daha da sürətlə gedəcək”.
Bunu Prezident İlham Əliyev “Azərbaycan Respublikasında 2027-2030-cu illərdə dağ-mədən (metal filizləri) və metallurgiya sənayesinin inkişafına dair Dövlət Proqramı”na həsr olunmuş müşavirədə deyib.
5 min yeni işi yeri yaradılacaq və layihələrin ölkəyə gözlənilən illik müsbət maliyyə təsiri 1 milyard manatdan daha çox olacaq.
Bu rəqəmlər Azərbaycanda dağ-mədən və metallurgiya sənayesinin inkişafına dair yeni Dövlət Proqramı çərçivəsində nəzərdə tutulan hədəfləri əks etdirir.
AR Elm və Təhsil Nazirliyi İqtisadiyyat İnstitutunun “İnklüziv sosial inkişaf” şöbəsinin müdiri, iqtisad elmləri doktoru, professor Rəsmiyyə Sabir (Abdullayeva) baki-xeber.com-a bildirib ki, Azərbaycanın zəngin mineral-xammal resursları dağ-mədən və metallurgiya sənayesinin inkişafı üçün geniş imkanlar yaradır. “Bu baxımdan “Azərbaycan Respublikasında 2027-2030-cu illərdə dağ-mədən (metal filizləri) və metallurgiya sənayesinin inkişafına dair Dövlət Proqramı” mühüm əhəmiyyət daşıyır”.
Ekspertin fikrincə, Dövlət Proqramının əsas məqsədi mövcud potensialın səmərəli reallaşdırılması, sənaye müəssisələrinin fəaliyyətinin təkmilləşdirilməsi, müasir texnologiyaların tətbiqi və istehsal imkanlarının genişləndirilməsi istiqamətində kompleks tədbirlərin həyata keçirilməsidir. “Bu prosesin mühüm nəticələrindən biri də sənayenin inkişafı hesabına yeni məşğulluq imkanlarının yaradılması və əmək bazarında iqtisadi fəallığın artırılması olacaq.
Professor vurğulayıb ki, 2030-cu ilədək dağ-mədən və metallurgiya sektorunun ümumi daxili məhsula töhfəsinin 700 milyon manatdan 1,8 milyard manata, illik ixrac potensialının isə 1,3 milyard manatdan 2025-ci ilin orta dünya qiymətləri əsasında 3,4 milyard manata çatdırılması nəzərdə tutulur. 2027-2030-cu illərdə bu hədəflərə nail olmaq üçün ümumilikdə 5,3 milyard manat investisiyanın yatırılması planlaşdırılır. Layihələrin ölkəyə gözlənilən illik müsbət maliyyə təsirinin 1 milyard manatdan çox olacağı proqnozlaşdırılır.
Rəsmiyyə Sabirin sözlərinə görə, bu investisiyaların və yeni layihələrin reallaşdırılması məşğulluq baxımından da əhəmiyyətli nəticələr yarada bilər. Yeni müəssisələrin yaradılması və mövcud istehsal sahələrinin genişləndirilməsi birbaşa iş yerlərinin açılması ilə yanaşı, xidmət, logistika, nəqliyyat və digər əlaqəli sahələrdə də əlavə məşğulluq imkanlarının formalaşmasına şərait yarada bilər. Proqram çərçivəsində 5 mindən çox daimi iş yerinin yaradılmasının nəzərdə tutulması bu baxımdan mühüm göstəricidir.
Ekspertin fikrincə, Dövlət Proqramının həyata keçirilməsi yalnız sənaye istehsalının genişləndirilməsinə deyil, həm də regionlarda məşğulluğun artırılmasına və iqtisadi fəallığın yüksəldilməsinə töhfə verə bilər. “Dağ-mədən və metallurgiya müəssisələrinin regionlarda fəaliyyətinin genişləndirilməsi yerli əhali üçün yeni iş imkanlarının yaranmasına, gəlir mənbələrinin artmasına və əmək bazarında fəallığın yüksəlməsinə şərait yarada bilər”.
Professor qeyd edib ki, xüsusilə işğaldan azad edilmiş Qarabağ və Şərqi Zəngəzur iqtisadi rayonlarının inkişafı kontekstində sənaye layihələrinin və yeni istehsal sahələrinin yaradılması məşğulluğun təmin olunması baxımından əhəmiyyətlidir. “Bu ərazilərdə iqtisadi fəaliyyətin genişlənməsi yeni iş yerlərinin yaradılması ilə yanaşı, əmək ehtiyatlarının regionda daha səmərəli istifadəsinə və əhalinin dayanıqlı gəlir imkanlarının formalaşmasına xidmət edə bilər”.
R.Sabir (Abdullayeva) vurğulayıb ki, dağ-mədən və metallurgiya sənayesinin inkişafı əmək bazarına yalnız kəmiyyət baxımından deyil, keyfiyyət baxımından da təsir göstərəcək. “Müasir texnologiyaların tətbiqi yüksək ixtisaslı mühəndislərə, geoloqlara, texniki mütəxəssislərə və digər peşəkar kadrlara tələbatı artıracaq. Bu baxımdan müvafiq ixtisaslar üzrə kadr hazırlığının gücləndirilməsi, peşə və ali təhsil müəssisələri ilə sənaye sektoru arasında əməkdaşlığın genişləndirilməsi, həmçinin mütəxəssislərin müasir texnologiyalar üzrə bilik və bacarıqlarının artırılması mühüm əhəmiyyət daşıyır”.
Ekspertin fikrincə, yeni sənaye layihələri əmək bazarında tələb olunan peşə və bacarıqların strukturuna da təsir göstərə bilər. “Bu səbəbdən kadr hazırlığının sənayenin gələcək ehtiyaclarına uyğunlaşdırılması, gənclərin və əmək bazarına yeni daxil olan şəxslərin müasir peşələrə istiqamətləndirilməsi məşğulluq siyasətinin mühüm istiqamətlərindən biri kimi nəzərdən keçirilməlidir”-deyə R.Sabir (Abdullayeva) bildirib.
İradə SARIYEVA
