Əyyub Kərimli: “Azərbaycan məhsulları, enerjisi Avropa bazarlarına İtaliya üzərindən daha da rahat daxil ola...”
İtaliya Nazirlər Şurasının sədri Ciorcia Meloni Prezident İlham Əliyev ilə mətbuata bəyanatlar zamanı bildirib ki, Avropa ilə əlaqələrdə Azərbaycan üçün imtiyazlı keçid qapısı rolunu oynamağa hazırıq:“İtaliyaya qaz və neftin ixracı Ukraynaya qarşı Rusiyanın təcavüzkar müharibəsi başladıqdan sonra şərəflə təmsil etdiyim ölkənin enerji təhlükəsizliyində müəyyənedici amil rolunu oynayır. Bu əlaqələrin möhkəmləndirilməsi barədə aydın şəkildə söhbət apardıq. Biz nəinki təchizat həcmləri, xüsusilə bütün sahələr üzrə sənaye tərəfdaşlığının keyfiyyəti üzərində çalışmalıyıq. Bilirik ki, enerji və bağlantılar eyni medalın iki üzüdür. İstərdik ki, Azərbaycan Avropa ilə Asiya arasında fundamental qovşaq rolunu möhkəmləndirsin. İtaliya bu baxımdan Avropa bazarına imtiyazlı giriş qapısı rolunu hər zaman oynamağa hazırdır”.
Meloni imtiyazlı keçid qapısı deyəndə nəyi nəzərdə tutdu?
İqtisadi və Sosial Araşdırmalara Yardım İctimai Birliyinin sədri, iqtisadçı-ekspert Eyyub Kərimli baki-xeber.com-a bildirdi ki, İtaliya ölkəmizin əsas ticarət tərəfdaşlarından biridir, birinci ticarət və ixracat tərəfdaşıdır. “İtaliyanın ticarət qapısı adlandıranda nəyi nəzərdə tuturuq? İtaliya Avropanın Cənubunda yerləşən, Aralıq dənizi vasitəsilə Yaxın Şərq, Qafqaz və Şimali Afrika ilə bağlanan əsas logistika mərkəzlərindən biridir. Bu baxımdan, İtaliyanın baş nazirinin bu məsələni vurğulaması o deməkdir ki, Azərbaycan məhsulları, enerjisi Avropa bazarlarına İtaliya üzərindən daha da rahat daxil ola, digər tərəfdən, İtaliyanın logistika limanı və enerji infrastrukturu baxımından beynəlxalq rolunu gücləndirə bilər.
Ölkəmiz Avropaya qaz ixrac edən əsas ölkələrdən biridir. Əsas də Cənub Qaz Dəhlizi vasitəsilə bu həyata keçirilir. Bu kontektdən İtaliya Azərbaycan qazının Avropaya giriş nöqtəsindədir və bu da o anlama gəlir ki, həmin funksiya, rol daha da genişləndirilə bilər. Yəni İtaliya Azərbaycan qazının digər ölkələrə ötürülməsində mühüm rola malikdir”.
Ə.Kərimli qeyd etdi ki, digər tərəfdən, bu həm də ticarət və investisiya üstünlükləri yaradır. “Belə ki, İtaliya Azərbaycan şirkətləri üçün Avropa bazarına çıxışa xüsusi dəstək verə, birgə layihələri, investisiya platformalarını və sənaye əməkdaşlığını genişləndirə bilər. Həmçinin İtaliya Azərbaycana daha liberal və açıq rejim tətbiq etməyə hazırdır. Bu həm də siyasi-diplomatik dəstək anlamına gələ bilər. İtaliya Avropa İttifaqı daxilində Azərbaycanla əməkdaşlığı dəstəkləyən ölkə kimi çıxış edir, ölkələrimizin siyasi əlaqələri yüksək səviyyədədir. Bu eyni zamanda Orta Dəhlizin tranzit potensialını artırır. Çünki Azərbaycanla Avropa arasında tranzit rolunu artırır, Orta Dəhlizin imkanlarını genişləndirir. Burada da İtaliya Çinə, Mərkəzi Asiyaya çıxış imkanları əldə edir və bu da Asiya, Qafqaz, Avropa xəttində Azərbaycan İtaliya tandemi geniş qurula bilər. Buna imkan yaranar. Əlbəttə ki, Meloninin bəyan etdiyi imtiyazlı keçid qapısı həm geniş enerji, giriş nöqtəsi, ticarət və logistika, siyasi dəstək platforması, həmçinin də Avropa bazarına yumşaldıcı giriş rejimi kimi qiymətləndirilə bilər”-deyə Ə.Kərimli bildirdi.
İradə SARIYEVA
