Natiq Cəfərli: “Danışıqlar aparıb qərarlar qəbul etmək üçün bu cür forumların keçirilməsi çox önəmlidir”
İtaliya Nazirlər Şurasının sədri Ciorcia Meloni Prezident İlham Əliyev ilə mətbuata bəyanatlar zamanı deyib ki, Bakıda Azərbaycan-İtaliya biznes-forumunun təşkili planlaşdırılır. “Biz 2026-cı ilin ikinci yarısında burada, Bakıda biznes-forum təşkil etməyi planlaşdırmışıq ki, siyasi əməkdaşlığımızı müəssisələrimiz, işçilərimiz üçün konkret fürsətlərə çevirək”, - o deyib.
C.Meloni qarşılıqlı sərmayə yatırımlarından da bəhs edib: “Cənab Prezident, söhbətlərimizdə qeyd etdiyimiz kimi, təsdiqləyə bilərəm ki, strateji planların, inkişaf planlarının, 360 dərəcəlik müasirləşmədə nəinki ikitərəfli qaydada, o cümlədən üçüncü ölkələrdə birgə işin icrasında çox böyük marağı olan çoxsaylı İtaliya müəssisələri var. Çünki energetika əməkdaşlığımızın yeganə sahəsi deyil. Bir çox digər sahələr var”.
Meloni Azərbaycanla iqtisadi-ticarət əlaqələrinə niyə bu qədər önəm verir?
İqtisadçı Natiq Cəfərli baki-xeber.com-a bildirdi ki, İtaliya Azərbaycanın 20 ildən artıqdır, ən vacib xarici tərəfdaşıdır. “İtaliya üçün Azərbaycan ən vacib enerji təchizatçısıdır. Yəni bu əlaqələr uzun illərdir formalaşıb. Bu əlaqələrin formalaşması, dayanıqlı şəkildə inkişaf etməsi hər iki ölkənin marağına uyğundur. Azərbaycanın İtaliyada investisiyaları var. Azərbaycan İtaliyaya 3 milyard dollara yaxın investisiya qoyub”. N.Cəfərli qeyd etdi ki, əks istiqamətdə investisiyalar var və 150-yə yaxın İtaliya şirkəti Azərbaycanda çalışır: “Yəni əlaqələrin potensialı var. Bu potensialı inkişaf etdirmək məqsədilə yeni layihələr üzrə danışıqlar aparıb qərarlar qəbul etmək üçün bu cür forumların keçirilməsi çox önəmlidir. Bu forumlar keçiriləcəksə çox güman ki, yeni layihələrlə bağlı yeni imzalanma mərasimləri olacaq”.
İradə SARIYEVA
