ABŞ və İsrailin İrana hücumları nəticəsində yaranan neft və qaz böhranı fonunda Rusiya aprel ayında neft gəlirlərini ikiqat artıraraq 9 milyard dollara çatdıracaq. Bu barədə Reuters öz hesablamalarına əsasən məlumat verir.
Hesablamalar göstərir ki, dünyanın ikinci ən böyük neft ixracatçısı olan Rusiya, neft treyderlərinin fikrincə, müasir tarixin ən ağır enerji böhranına səbəb olan İranla müharibədən böyük gəlir əldə edib. Agentliyin hesablamalarına görə, Rusiyanın neft hasilatı vergisi aprel ayında mart ayında 327 milyard rubldan (4,2 milyard dollar) təxminən 700 milyard rubla (9 milyard dollar) qədər artacaq. Gəlirlər 2025-ci ilin aprel ayı ilə müqayisədə təxminən 10% artıb. Rusiya 2026-cı il üçün mineral hasilatı vergiləri üzrə 7,9 trilyon rubl (101 milyon dollar) büdcə ayırıb. Rusiya neft və qaz sənayesinin əsas gəlir mənbəyi istehsalıdır. Xam neftə ixrac vergisi daha geniş vergi siyasətinin bir hissəsi olaraq 2024-cü ildən etibarən ləğv edilib. Kreml əvvəllər qlobal enerji böhranı fonunda müxtəlif ölkələrdən Rusiya enerji ehtiyatlarını almaq üçün çoxlu sayda sorğu aldığını bildirmişdi. ABŞ və İsrailin 28 fevralda hava hücumlarından sonra İran dünya neftinin və mayeləşdirilmiş təbii qazın beşdə birinin keçdiyi Hörmüz boğazını faktiki olaraq bağladı və bu da Brent markalı xam neftin fyuçerslərinin bir barel üçün 100 dolları keçməsinə səbəb oldu. ABŞ və İran arasında iki həftəlik atəşkəs elan edilməsi fonunda neft qiymətləri bir qədər aşağı düşdü.
İradə SARIYEVA
