Fikrət Yusifov: “İndiki qeyri-müəyyən durumda Rəşt-Astara dəmir yolunun taleyindən danışmaq tezdir”
“Şimal-Cənub” Beynəlxalq Nəqliyyat Dəhlizinin bir hissəsi olan Rəşt-Astara dəmir yolu layihəsinin praktiki icrasına 2026-cı il aprelin 1-də başlanacağı gözlənilirdi. Ancaq ABŞ-ın fevralın 28-də İrana qarşı müharibəyə bağlaması buna imkan vermədi. Müharibə səbəbindən Rəşt-Astara dəmir yolunun tikintisi ilə bağlı proses dayanmışdı. Artıq tərəflər arasında atəşkəs əldə edilib.
Maraqlıdır, Pakistanda keçirilən danışıqlar gözləntiləri doğrultsa, İranın Rəşt-Astara dəmir yolunun tikintisinə marağı artacaqmı? Rusiya ilə bu yöndə birgə praktiki fəaliyyətə start veriləcəkmi? Yoxsa Tehran müharibənin vurduğu iqtisadi zərərləri əsas gətirərək bu layihəyə diqqət yetirməyəcək? Nə gözlənilir? Baş verənlər sözügedən dəmir yolu layihəsinin yubanmasına nə kimi təsir göstərə bilər?
Sözügedən məsələyə aydınlıq gətirən sabiq maliyyə naziri, professor Fikrət Yusifov baki-xeber.com-a açıqlamasında bildirdi ki, İran ətrafında baş verən hadisələrin indiki qeyri-müəyyən durumunda Rəşt-Astara dəmir yolunun taleyindən danışmaq tezdir: “Çünki ABŞ-İsrail cütlüyünün İrana qarşı başlatdığı müharibədə iki həftəlik atəşkəs razılığının əldə olunması, bu müharibənin bitməsi və ya tezliklə bitəcəyi anlamına gələ bilməz. Vəziyyət olduqca ciddidir, atəşkəs barədə əldə olunmuş razılıq isə yetərincə kövrəkdir. Razılaşmanın birinci günü İsrailin Livanın cənubunda yüzlərlə insan itkisinə səbəb olmuş hücumları bu dediklərimizi bir daha təsdiq edir. Təbi ki, biz qonşu dövlət olan İranda sivil bir hakimiyyətin olmasını istəyirik. Çox yaxşı olardı ki, İrandakı indiki hakimiyyət özünün region üçün təhlükə yaradan ambisiyalarından əl çəksin. Buna cavab olaraq Qərb də İran üzərindən bütün sanksiyaları götürsün. Belə olarsa, o halda İranla tək barəsində danışdığımız dəmir yolu layihəsi ilə deyil, region ölkələrinin maraqlarını təmin edən çoxsaylı layihələri reallaşdırmaq mümkün olar. Biz də Azərbaycan olaraq bunu istəyirik. Ancaq nə yazıq ki, İranda hakimiyyəti faktiki olaraq yönləndirən və dini fanatizmə bulaşmış SEPAH kimi bir hərbi birləşmə bu baxışlardan çox uzaqdadır. Bu müharibə hələ bitməyib. ABŞ-İsrail cütlüyünün Hörmüz boğazını İrana təhvil verib müharibə meydanından çəkiləcəyini də düşünmək sadəlövlük olardı. Ona görə də hesab edirəm ki, tərəflər arasında böyük müharibə hələ qabaqdadır. Və bu müharibədə mütləq gerçək qalib olacaqdır. Yalnız bundan sonra İranla bağlı layihələr ətrafında real danışmaq mümkün olacaqdır. O cümlədən, Rəşt-Astara dəmir yolunun tikintisi sürətləndirilə bilər. İndi isə bu, real görünmür”.
Vidadi ORDAHALLI
