"Rusiya respublikaya tədarük edilən qazın qiymətini artırmaq qərarına gələrsə, Ermənistan Kollektiv Təhlükəsizlik Müqaviləsi Təşkilatı (KTMT) və Avrasiya İqtisadi İttifaqından (Aİİ) çıxacaq". Bu barədə Ermənistan parlamentinin spikeri Alen Simonyan jurnalistlər üçün keçirilən brifinqdə bəyan edib: "Bu cür danışıqlar, məsələn, Ermənistan mallarının idxalı və ya qaz qiymətləri ilə bağlı danışıqlar yeni xəbər deyil. Deməliyəm ki, əgər onlar belə bir qərar qəbul etsələr, Ermənistan öz qərarını verəcək və birdəfəlik KTMT və Aİİ-dən çıxacaq. Amma düşünmürəm ki, məsələ bu nöqtəyə gəlib çatar, çünki bilirəm ki, iki ölkə liderləri arasında çox yaxşı və effektiv söhbət baş tutub".
Lakin o da faktdır ki, neft məhsullarından sonra Ermənistan Azərbaycandan təbii qaz da almaq istəyir. Ekspertlər ilk növbədə maye qaz alışını mümkün hesab edir. Yeri gəlmişkən qeyd edək ki, Ermənistan Rusiyadan da mayeləşdirilmiş qaz idxalını Azərbaycan ərazisindən dəmir yolu ilə idxal etməyi planlaşdırır. İqtisadiyyat Nazirliyinin mətbuat katibi Lilit Şaboyanın sözlərinə görə, İranda baş verən hadisələr səbəbindən hazırda bu ölkədən idxal mümkün deyil, Rusiyadan isə hava şəraiti səbəbindən Yuxarı Lars keçid məntəqəsinin bağlanması çətinlik yaradır: "Rusiya mayeləşdirilmiş qazının Azərbaycan ərazisindən dəmir yolu ilə Ermənistana çatdırılması məsələsi müzakirə olunur".
Hələlik qazın idxal edilməsinin vaxtı və hansı şirkət və ya şirkətlər tərəfindən yerinə yetiriləcəyi müəyyən edilməyib. Bununla yanaşı, ölkənin iqtisadiyyat naziri Gevorq Papoyan bildirib ki, Ermənistana Azərbaycan mənşəli bəzi mallar, o cümlədən benzin və dizel yanacağı daxil olur, eləcə də Azərbaycan ərazisindən müntəzəm olaraq yüklərin tranziti həyata keçirilir: Ermənistana Azərbaycan mənşəli 1-2 mal daxil olur: benzin, dizel yanacağı və demək olar ki, hər gün Azərbaycan üzərindən nə isə daxil olur. Məsələn, supermarket şəbəkələrindən biri, "Nor Zovk", Azərbaycan ərazisindən manna yarmasının idxalı üçün müraciət edib, digər bir təşkilat Rusiya kömürünün idxalı üçün müraciət edib, üçüncüsü taxıl üçün, dördüncüsü gübrə üçün. Bu, artıq çox geniş yayılmış bir hala çevrilib. Mən artıq nə qədər malın daşınmalı olduğunun hesabını itirmişəm". Papoyan həmçinin Ermənistanın Azərbaycana ixrac edə biləcəyi məhsulların mövcudluğu ilə bağlı suala da müsbət cavab verib: "Belə məhsul var, folqa ilə bağlı konkret sorğu olub və Azərbaycan tərəfi folqa üçün konkret qiymət istəyib, bizim istehsalçımız isə onu təqdim edib. Başqa sözlə, onlar dedilər: bizi filan qalınlıqda folqa maraqlandırır, onu hansı həcmdə, hansı müddətə və hansı qiymətə təklif edə biləcəyinizi deyə bilərsinizmi? Bizim istehsalçımız həcmi, qiyməti təqdim etdi, biz hələ ki cavab almamışıq".
Tahir TAĞIYEV
