Kamran Məmmədli: “Onlayn alış-veriş edənlərin sayının artması istər-istəməz mağazaların satışına mənfi təsir göstərir”
Müasir dövrdə internetin imkanları bir sıra sahələrdə özünü əsaslı şəkildə göstərir. Bu cür sahələrin başında isə onlayn ticarət platformaları gəlir. Məlumdur ki, əksər insanlar bir çox məhsulları ənənəvi mağazalar və ticarət obyektlərindən deyil, onlayn alış-veriş saytlarından almağa üstünlük verir.
Alış-veriş həvəskarları son zamanlar Çinə məxsus olan məşhur Temu platformasından istədiklərini alırlar. Onların xarici onlayn platformalara üstünlük verməsinin əsas səbəbi qiymətlərin olduqca ucuz olmasıdır. Lakin bu tendensiya ənənəvi və pərakəndə ticarətlə məşğul olan sahibkarların etirazına səbəb olur. Maraqlıdır, yerli bazar onlayn platformalarla rəqabət apara bilirmi?
Iqtisadçı Kamran Məmmədli baki-xeber.com-a şərhində bildirdi ki, onlayn alış-veriş edənlərin sayının artması istər-istəməz mağazaların satışına mənfi təsir göstərir: "Ənənəvi ticarətlə məşğul olan insanlar əgər rəqabətə tab gətirə bilmirlərsə, o zaman onlayn ticarətin imkanlarından faydalanmalıdır. Etiraf edək ki, onlayn satış platformalarında təqdim olunan məhsullar ənənəvi mağazalarla müqayisədə olduqca ucuz və sərfəlidir. Alıcı üçün isə məhz bu önəmlidir. Ancaq onu da deyim ki, ənənəvi ticarətin də öz üstünlükləri var. İnsanlar aldığı məhsulu geyinir, görür, toxunur, baxır və nəzərdən keçirdikdən sonra alır. Bir digər səbəb isə onlayn ticarətdə problemlərin olmasıdır – çatdırılmada yaranan problemlər, geri qaytarma hallarının çox olması kimi problemlər. Bütün bunlar məhsulu görmədiyin üçün yaşanan çətinliklərdir. Nəticə etibarı ilə, onlayn ticarət ənənəvi ticarəti sıxışdırsa da, tam sıradan çıxara bilməz”.
Günel CƏLİLOVA
