Xalid Kərimli: “Bu güzəştlər Naxçıvan üçün böyük stimul olacaq”
İqtisadiyyat naziri Mikayıl Cabbarov Milli Məclisin İqtisadi siyasət, sənaye və sahibkarlıq komitəsində "2026-cı il dövlət büdcəsi haqqında" qanun layihəsinin müzakirəsi zamanı Naxçıvanla bağlı önəmli bir məqama toxunub.
M.Cabbarov bildirib ki, vergi islahatlarının davamı olaraq, iqtisadi artımın və şaxələnmənin dəstəklənməsi, şəffaflığın artırılması məqsədilə Vergi Məcəlləsinə dəyişikliklər layihəsi Milli Məclisin müzakirəsinə təqdim edilib: "Layihədə bir sıra stimullaşdırıcı mexanizmlər nəzərdə tutulur. Belə ki, investisiya mühitinin və sahibkarlığın təşviqi məqsədilə Naxçıvan Muxtar Respublikasında fəaliyyət göstərən sahibkarlıq subyektlərinə işğaldan azad edilmiş ərazilər üçün tətbiq edilən eyni vergi güzəştlərinin verilməsi təklif olunur”.
Maraqlıdır, sözügedən güzəştlər Naxçıvanın sosial-iqtisadi inkişafına necə təsir göstərə bilər?
“...İşgüzar fəallığın artması, yeni iş yerlərinin açılmasına müsbət təsir edə bilər”
Sözügedən məsələyə aydınlıq gətirən iqtisadçı-ekspert Xalid Kərimli “Bakı-Xəbər”ə açıqlamasında bildirdi ki, bu, Naxçıvan üçün ciddi təşviq olacaq: “Sözügedən məsələ Milli Məclisdə müzakirə edilir və çox güman ki, qəbul olunacaq. Söhbət 10 illik güzəştlərdən gedir. Orada bir sıra vergi güzəştləri var. Ona görə də işğaldan azad edilmiş ərazilər üçün tətbiq edilən eyni vergi güzəştləri Naxçıvana tətbiq edilsə, bu, orada iqtisadi inkişaf üçün ciddi təşviq olacaq. Məsələ ondadır ki, 10 il ərzində Qarabağ və Şərqi Zəngəzur sadələşmiş, əmlak, mənfəət və torpaq vergilərindən azad edilib. Yəni orada 10 il müddətinə həmin ərazilərdə istifadə edilən xammal və materiallar əlavə dəyər vergisindən azad edilib. Həmçinin, 10 il ərzində həmin yerlərdə çalışan şirkətlərin sahibkarları dividend vergisindən azad ediliblər. Hesab edirəm ki, bu güzəştlər Naxçıvan üçün böyük stimul olacaq. Çünki sözügedən güzəştlər Naxçıvanda biznes mühitinin yaxşılaşması ilə yanaşı, həm də sahibkarları ora investisiya yatırmağa təşviq edəcək. Bunun sayəsində işgüzar fəallığın artması Naxçıvanda yeni iş yerlərinin açılmasına müsbət təsir edə bilər. Qarabağ və Şərqi Zəngəzura tətbiq edilən güzəştlərin müddəti 10 ildir. Naxçıvana tətbiq ediləcək güzəştlərin müddətinin nə qədər olacağı hələ bəlli deyil. Ancaq hər halda sözügedən güzəştlərin müddəti 10 il olacaq. Çünki Naxçıvanın Azərbaycanla birbaşa quru əlaqəsinin olmaması səbəbindən belə bir güzəştə ehtiyac var. Uzun illər Naxçıvanın blokada şəraitində olması sahibkarlığın inkişafına mənfi təsir edib. Bu səbəbdən sahibkarlar sərmayə qoymaqda maraqlı deyildilər. Ona görə də belə güzəştlər sahibkarları investisiya qoymağa həvəsləndirəcək”.
Vidadi ORDAHALLI
