Rəsul Cahangirli: “Naxçıvanın iqtisadi inkişafı ilə yanaşı, logistik və tranzit əhəmiyyəti artacaq”
Türkiyənin nəqliyyat və infrastruktur naziri Abdulkadir Uraloğlu Qars-İğdır-Dilucu dəmir yolunun (Naxçıvan ilə sərhəd) tikintisinin başlanma tarixini açıqlayıb.
O bildirib ki, yeni nəqliyyat layihəsinin icrasına başlanılması mərasimi avqustun 22-nə planlaşdırılıb.
“Yeni yol Cənubi Qafqazda iqtisadi əməkdaşlığa mühüm töhfə verəcək, Zəngəzur dəhlizinin açılması ilə isə Pekindən Londona qədər geniş məkanda yük axınlarının səmərəliliyi artacaq”, - deyə türkiyəli nazir vurğulayıb.
Abdulkadir Uraloğlu xatırladıb ki, Türkiyə hökuməti Naxçıvanla sərhədə qədər 224 kilometrlik dəmir yolu layihəsinə 2,4 milyard avro məbləğində xarici maliyyə cəlb edib. “Yeni yol 5,5 milyon sərnişin və 15 milyon ton yük daşımaq üçün nəzərdə tutulub. Yolboyu beş tunel, 10 körpü və s. tikintisi planlaşdırılır. Bütün bunlar həm də Şərqi Anadolu iqtisadiyyatı üçün güclü stimul olacaq”, - deyə nazir diqqətə çatdırıb.
“Bu, Türkiyənin Zəngəzur dəhlizinin reallaşması istiqamətində növbəti praktiki addımıdır”
Sözügedən məsələni “Bakı-Xəbər”ə şərh edən ekspert Rəsul Cahangirlinin fikrincə, bu, Türkiyənin Zəngəzur dəhlizinin reallaşması istiqamətində növbəti praktiki addımıdır: “Bu xətt sayəsində Türkiyə ilə Azərbaycan arasında fasiləsiz yeni dəmir yolu əlaqəsi yaradılacaq. Çünki bu yol digər yollarla müqayisədə ən qısa yoldur. Bu dəmir yolu paralel olaraq həm iqtisadi inkişafa, həm də turizmin inkişafına öz xüsusi töhfəsini verəcək. Xüsusən də Naxçıvanın blokadadan çıxmasına, orada iqtisadi fəallığın, sərmayə qoyuluşlarının artmasına, yeni imkanların yaranmasına töhfə verəcək. Naxçıvanın iqtisadi inkişafı ilə yanaşı, logistik və tranzit əhəmiyyəti artacaq. Bütün bunlarla yanaşı, bu dəmir yolu Trans-Xəzər və Şimal-Cənub dəhlizlərini əlaqələndirəcək, Avrasiyanın təchizat və logistika şəbəkələrini möhkəmləndirəcək. Zəngəzur dəhlizinin işə düşməsi ilə Pekindən Londona qədər uzanan Şərq-Qərb xətti daha səmərəli olacaq. Orta Dəhlizin dəmir yolu və avtomobil yolu ilə yükdaşıma gücü əhəmiyyətli dərəcədə artacaq. Qars-İğdır-Aralık-Dilucu dəmir yolu xətti Zəngəzur dəhlizinin əsas komponenti olacaq. Cənubi Qafqazda iqtisadi əməkdaşlığı dərinləşdirəcək. Nəzərə almaq lazımdır ki, dəmir yolu hazır olandan sonra təkcə Çindən, Orta Asiyadan Avropaya və əks istiqamətdə tranzit yüklər daşınmayacaq. Eyni zamanda İran da bu dəmir yolunun imkanlarından istifadə edəcək. Culfa vasitəsilə İrəvana yüklər daşınacaq, Qara dənizə çıxış əldə edəcək. Təsadüfi deyil ki, İran prezidenti Pezeşkiyanın Ermənistana səfərindən sonra Tehranın Zəngəzur dəhlizinə münasibətdə mövqeyinin yumşalması müşahidə edilir. Əvvəlki sərt ritorika yoxdur. O baxımdan hesab edirəm ki, qarşılıqlı iqtisadi mənfəət siyasi müstəvidə əlaqələrə müsbət təsir edəcək”.
Vidadi ORDAHALLI
