Natiq Cəfərli: “Kriptovalyutalar perspektivi olmayan, spekulyativ bir sahədir”
Azərbaycanda kriptovalyutalardan istifadə yaxın gələcəkdə mümkün ola bilər. Mərkəzi Bank xüsusi tənzimləmə rejiminin ilk mərhələsi üzrə sınaq dövrlərinin başa çatdığını açıqlayıb.
Millət vəkili Vüqar Bayramov sosial şəbəkə hesabında yazaraq bildirib ki, sınaq müddətində dörd innovativ məhsul qiymətləndirilib: “Onlardan ikisi uğurlu hesab olunaraq dəstəklənib və bunlar kriptovalyuta əməliyyatlarının təhlükəsiz və şəffaf şəkildə həyata keçirilməsini hədəfləyir. Layihələr arasında “m10” tətbiqinin “Binance” platformasına inteqrasiyası vasitəsilə istifadəçilər cüzdanlarına mədaxil və məxaric edə biləcək, həmçinin “kriptobroker platforması” virtual aktivlərin alışı, satışı və saxlanılması üçün imkanlar yaradacaq. Sınaqlar normativ-hüquqi bazanın formalaşdırılmasına və təkmilləşdirilməsinə xidmət edir”.
Qeyd edək ki, kriptovalyuta virtual pul vahidi olduğundan, əsas etibarilə dünyada fəaliyyət göstərən kriptovalyuta birjaları, mübadilə servisləri vasitəsilə əldə edilir. Yəni ölkələrin mərkəzi bankları vasitəsilə tədavül vasitəsi kimi rəsmi ödəniş aləti deyil. Bu virtual pullara sahib olmaq üçün müxtəlif şirkət və birjaların, mübadilə servislərinin müvafiq sistemlərində qeydiyyatdan keçmək lazımdır. Sistemdə qeydiyyatdan keçdikdən sonra virtual aləmin üzvünə çevrilən istənilən şəxs özünün kart hesabındakı məbləğə uyğun olaraq istənilən həcmdə kriptovalyuta ala, əməliyyatlar apara bilər.
Maraqlıdır, Azərbaycan kriptovalyutaların istifadəsinə hazırdırmı? Kriptovalyuta Azərbaycanda hansı risqlər yaradır?
“Kriptovalyutada qiymətlərin qalxıb-azalması spekulyativ faktorlarla sıx bağlıdır və həddindən artıq qeyri-sabitdir”
Iqtisadçı-ekspert Natiq Cəfərli “Bakı-Xəbər”ə açıqlamasında qeyd etdi ki, kriptovalyuta bazarı olduqca risqlidir: “Hazırda kriptovalyutalarla bağlı ölkəmizdə qanunvericilik bazası kifayət qədər zəifdir. Bu, bir tərəfdən sahəyə marağı artırsa da, digər tərəfdən, investorlar və istifadəçilər üçün risqlərə səbəb ola bilər. Kriptovalyutaların əsas üstünlüyü onların anonimliyidir. Anonimliyi aradan qaldırılsa, bu sahə nəzarət altına alınsa, o zaman kriptovalyutaların əsas dəyəri itəcək və onlar artıq cəlbedici ödəniş vasitəsi olmayacaq”.
Həmsöhbətimiz hesab edir ki, kriptovalyutalar perspektivi olmayan, spekulyativ bir sahədir. Burada qiymətlərin qalxıb-azalması spekulyativ faktorlarla sıx bağlıdır və həddindən artıq qeyri-sabitdir: “ABŞ Prezidenti Donald Tramp və onun komandası kriptovalyutalara müsbət yanaşır deyə, bu münasibət dünya bazarında qiymətlərin yüksəlməsinə təsir edir. Bu səbəbdən də ABŞ və digər iri bazarların siyasətindəki dəyişikliklər kriptovalyuta qiymətlərində kəskin dalğalanmalara səbəb ola bilir. Sabah ABŞ-nin kriptovalyutaya münasibəti dəyişsə, qlobal qiymətlər sürətlə düşə bilər. Onu da deyim ki, kriptovalyutalara olan marağın artması eyni zamanda onların vergidən yayınma və digər qanunsuz əməliyyatlarda istifadə edilməsinə şərait yaradır”.
Günel CƏLİLOVA
