Əkrəm Həsənov: “Mənfəətin aşağı düşməsinin səbəbi bank gəlirinin azalması ilə bağlıdır”
Bu ilin əvvəlindən başlayaraq, Azərbaycan banklarının mənfəətləri azalıb. Belə ki, 2025-ci ilin yanvar-may aylarında banklar 430,7 mln. manat xalis mənfəət əldə edib.
Bu, ötən ilin eyni dövrünə nisbətən 17,1 faiz azdır. Sektorun əməliyyat mənfəəti isə 3,3 faiz azalaraq 708,2 mln. manat təşkil edib. Azalma rəqəmlərdən aydın şəkildə görünür. Bəs səbəblər nədir?
“Kredit ödənişinin geri qaytarılmaması bankın gəlirini aşağı salır, bununla yanaşı...”
Bank sahəsi üzrə ekspert Əkrəm Həsənov “Bakı-Xəbər”ə açıqlamasında qeyd etdi ki, mənfəətin aşağı düşməsinin səbəbi bank gəlirinin azalması ilə bağlıdır: “Məlumat üçün deyim ki, bankın əsas gəliri kreditlərdən gələn gəlirdir. Bununla yanaşı, pul köçürmə, valyuta mübadiləsi, vəsaitlərin nağdlaşdırılması kimi xidmətlər də bankın gəlir mənbəyi hesab olunur. Dediyim kimi, bankın əsas gəlir mənbəyi verilən kreditlərdən gələn faizlərdir. Problemli kreditlərin həcmi artdıqca, bankın mənfəəti də azalır. Məlum məsələdir ki, son zamanlar insanlar götürdüyü kreditin aylıq ödənişini etməkdə çətinlik çəkir. Kredit ödənişinin geri qaytarılmaması bankın gəlirini aşağı salır. Bununla yanaşı, bankın xərcləri də az deyil. Belə ki, işçilərin əmək haqları, bankın saxlanması, inzibati xərclər və s. vəsait tələb edir. Bank sektorunda orta əməkhaqqı son bir ildə 12-15 faiz artıb. Bu da əməliyyat xərclərinin artmasına və mənfəətin azalmasına təsir edən əsas amillərdəndir”.
Həmsöhbətimiz onu da əlavə etdi ki, böyük bankların gəliri azalmayıb, olduğu kimi qalıb. Ancaq bu bankların xərcləri artıb: “Məlumat üçün deyim ki, Mərkəzi Bank böyük banklar üçün ehtiyat normasını artırıb. Bu da xərcləri artırır. Hazırda banklar informasiya təhlükəsizliyini qorumağa çalışır. Buna görə də banklar kiber qorunmağa daha çox vəsait ayırır. Məlumdur ki, son illər bank kartlarından oğurlanan vəsaitlərin həcmi yüksəkdir. Bu halın artması bankları məcbur edir ki, informasiya təhlükəsizliyini qorusun. Ancaq bu xidmət yalnız böyük banklarda müşahidə olunur. Kiçik banklarda isə gəlir azalmaqda davam edir. Bu da inhisarlaşma ilə bağlıdır”.
Günel CƏLİLOVA
