Vasif Talıbovun dövründə qəbul edilmiş ləğv edilən qərarların mətni cəmiyyət üçun əlçatan olmalıdır
Bu günlərdə Naxçıvan Muxtar Respublikası Nazirlər Kabinetinin 2020-ci il tarixli bir sıra qərarları ləğv edilib. Bununla bağlı muxtar respublikanın Baş naziri Ceyhun Cəlilov qərar imzalayıb.
Qərarların əksəriyyəti pandemiya ilə bağlıdır, ola bilsin, artıq öz əhəmiyyətini itirib.
Amma ləğv edilən qərarlar içərisində "Naxçıvan Muxtar Respublikasında əlavə dəyər vergisindən azad olunan kənd təsərrüfatı texnikalarının ehtiyat hissələrinin Siyahısı”nın təsdiq edilməsi haqqında” Naxçıvan Muxtar Respublikası Nazirlər Kabinetinin 2020-ci il 4 aprel tarixli 67 nömrəli Qərarı da yer alır.
Yəni bu o deməkdirmi ki, artıq Naxçıvan Muxtar Respublikasında əlavə dəyər vergisindən azad olunan güzəştli kənd təsərrüfatı texnikalarının ehtiyat hissələrinə ehtiyac yoxdur?
Əvvala onu qeyd etmək yerinə düşərdi ki, ləğv edilən həmin qərarların hamısının mətni Naxçıvan Muxtar Respublikasının Nazirlər Kabinetinin internet resurslarından silinib. Ona görə də təhlilçilərin bu qərarların mətni ilə tanış olmaq, onun ləğv edilmə səbəblərini araşdırmaq və digər hüquqi-normativ aktlarla müqayisə etmək imkanları yoxdur. Bu təcrübə vətəndaş cəmiyyətinin hüquqlarının pozulmasi kimi də dəyərləndirilə bilər. Çünki ləğv edilən qərarın mətni hər bir vətəndaş üçün əlçatan olmalıdı ki, onlar hökumətin bu qərarı ləğv etməsi barədə qəbul etdiyi qərarın səmərəliliyini ölçə bilsin. Ləğv edilən qərarın mətni ortada yoxdursa, cəmiyyət onu dəyərləndirə bilmirsə, hökumətin ləğvetmə ilə bağlı qərarına necə qiymət verə bilər? Hazırda cəmiyyətdə belə bir fikir formalaşib ki, bu qərarlar yalnız Vasif Talıbovun dövründə qəbul edildiyinə görə ləğv edilib.
Düzdür, qərarların başlıqlarından görünür ki, onların əksəriyyəti koronavirus pandemiyasi ilə bağlıdır. Ona görə də ən yaxşı halda belə ehtimal etmək olar ki, artıq ölkədə pandemiya mövcud deyil, bu səbəbdən də haqqında söhbət açılan qərarlar ləğv edilib. Amma bu o qədər də etibarlı əsas deyil. Çünki pandemiya qurtarsa da, ölkədə karantin rejimi hələ də davam edir, ölkənin quru sərhədləri bağlıdir, Nazirlər Kabinetinin qərarına əsasən bir çox istisnalar nəzərə alınmaqla karantin rejimi hələ də qüvvədədir. Karantin rejimi qüvvədədirsə, cəmiyyətdə güzəştlər nəzərdə tutan qərarlar da qüvvədə qalmalıdır.
O ki qaldı daha çox cəmiyyətin marağına səbəb olan ləğv edilmiş "Naxçıvan Muxtar Respublikasında əlavə dəyər vergisindən azad olunan kənd təsərrüfatı texnikalarının ehtiyat hissələrinin Siyahısı”nın təsdiq edilməsi haqqında” Naxçıvan Muxtar Respublikası Nazirlər Kabinetinin 2020-ci il 4 aprel tarixli 67 nömrəli Qərara, buna münasibət bir qədər fərqlidir.
Əslində qərarın başlığını oxuyanda adamda sual yaranır ki, kənd təsərrüfatının zəif inkişaf etdiyi, ildən-ilə tənəzzülə uğradığı ölkədə nəyə gôrə bu qərar ləğv edilib. Qərarın mətinini əldə edə bilməsək də, onun qəbul edilməsi tarixçəsi diqqətli oxucuların yadındadır. Belə ki, ölkədə kənd təsərrüfatı texnikası və onun ehtiyat hissələrinin ƏDV-dən azad edilməsini nəzərdə vahid qərar mövcuddur. Lakin həmin dövrdə Naxçıvan Muxtar Respublikasına rəhbərlik edən Vasif Talıbov həmin siyahıya əlavələr edərək öz nəzarətində olan şirkətlərə lazım olan texnika və onların ehtiyat hissələrinin də ƏDV-dən kənarda qalmasını təmin etmişdi. Məsələn, tütün kənd təsərrüfatı məhsulu olsa da, tütündən siqaret istehsal edən fabrik-zavodun ehtiyat hissələri aqrar texnika sayılmır. Həmin siyahıya məhz pandemiyadan sui-istifadə edərək, bu tip texnika və onun ehtiyat hissələrinin adı əlavə edilmişdi. Yəqin ki, buna görə qərar ləğv edilərək ədalətsiz rəqabətin qarşısı alınıb.
Dəniz NƏSİRLİ
