Eldəniz Əmirov: “Bu istiqamətlər arasında birmənalı olaraq yüksək texnologiyaların istiqamətini qeyd edə bilərik”
Prezident İlham Əliyev Çinin Sinxua agentliyinə müsahibəsində deyib ki, Çinlə getdikcə artan iqtisadi-ticari əməkdaşlığa baxmayaraq, hələ də reallaşdırılmayan böyük potensial mövcuddur: “Azərbaycan ilə Çin arasında əmtəə dövriyyəsinin həcmi 2024-cü ildə əvvəlki illə müqayisədə 20,7 faiz artıb və 3,744 milyard dollar təşkil edib.
Bəli, həqiqətən Çin Azərbaycanın 4-cü ən böyük ticarət tərəfdaşına çevrilib, onun xarici ticarət dövriyyəmizdə payı 7,9 faiz olub, həmçinin idxal üzrə də lider mövqeyinə çıxıb və bu göstərici 17,69 faizə çatıb. İki ölkə arasında getdikcə artan iqtisadi-ticari əməkdaşlığa baxmayaraq, hələ də reallaşdırılmayan böyük potensial mövcuddur”.
Maraqlıdır, Prezident Çinlə iqtisadi əlaqələr mövzusunda “reallaşdırılmayan böyük potensial mövcuddur” deyərkən hansı sahələri nəzərdə tutur? Söhbət hansı sahələrdən gedə bilər?
“Eyni zamanda Çinlə birlikdə sənaye müəssisələri açıla bilər, istehsal sahələri yaradıla bilər”
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı-ekspert Eldəniz Əmirov buna bir neçə prizmadan yanaşdı: “Bilirsiniz, cənab Prezidentin də qeyd etdiyi kimi, iki ölkə arasında olan mövcud potensial bugünkü reallıqdan daha yuxarı səviyyədədir. Düzdür, ötən 2023-cü illə müqayisədə, 2024-cü ildə ticarət dövriyyəmiz 20,7 faiz artaraq 3,7 milyard dollardan artıq olsa da, potensial daha yuxarıdır. Bizim bu potensialı artıra biləcəyimiz bir neçə istiqamət var. Bu istiqamətlər arasında birmənalı olaraq yüksək texnologiyaların istiqamətini qeyd edə bilərik. Orta Dəhlizin yaratdığı fürsətlərdən maksimum yararlana bilərik. Eyni zamanda Azərbaycan Orta Dəhliz üzərində strateji və əsas ölkə olaraq ciddi dəhliz infrastrukturu qurub. Ələt Azad İqtisadi Zonası birbaşa dəhliz infrastrukturu olmasa da, dəhlizin potensialını artırmağa, effektivlik göstəricilərini yüksəltməyə imkan verən bir iqtisadi zonadır. Məhz Çin bu zonanın inkişaf etdirilməsində müstəsna rol oynaya bilər. Çinin Qafqazda daha da genişlənməsinə bu zona əlavə fürsət verə bilər. Hesab edirəm ki, Azərbaycan da təbii olaraq bu fürsətdən yararlana bilər. Ona görə də Çin investorlarının Ələt Azad İqtisadi Zonasında fəaliyyətinin daha da dəstəklənməsi mümkündür. Eyni zamanda Çinlə birlikdə sənaye müəssisələri açıla bilər, istehsal sahələri yaradıla bilər. Deməyim odur ki, Çin zatən getdikcə təkcə satış bazarlarını deyil, eyni zamanda öz istehsal sahələrini quracağı əraziləri belə genişləndirir. Bu baxımdan Azərbaycan Çin üçün strateji, etibarlı tərəfdaşdır. Çox böyük ehtimal ki, cənab Prezident məhz bu məsələləri nəzərdə tutur. Başqa bir tərəfdən bizim turizm potensialımız var. İki ölkə arasında turizm potensialı reallığı əks etdirmir. Birbaşa uçuşların sayını artırmaq olar. Artıq iki ölkə arasında viza rejimi də qarşılıqlı olaraq ləğv edildi”.
Vidadi ORDAHALLI
