Vüqar Bayramov: "Əvvəllər bu belə deyildi və həmin vəsaitlərin çoxu büdcəyə daxil olmurdu"
Gələn ilin dövlət büdcəsində Naxçıvan Muxtar Respublikasının büdcəsinə verilməsi nəzərdə tutulan dotasiyanın həcmi dəyişib.
Belə ki, Milli Məclisin birinci və ikinci oxunuşda qəbul etdiyi "Azərbaycan Respublikasının 2025-ci il dövlət büdcəsi haqqında" qanun layihəsinə əsasən, dövlət büdcəsində Naxçıvan Muxtar Respublikasının büdcəsinə 320 milyon 529 min manat dotasiya (transfertin yuxarı həddi) nəzərdə tutulmuşdu. Üçüncü oxunuşda isə parlamentə təqdim edilən layihəyə əsasən, bu məqsədlə 285 milyon 713 min manat ayrılacaq.
Göründüyü kimi, Naxçıvana ayrılacaq dotasiyanın həcmi 35 milyondan çox azaldılıb. Nəzərə alsaq ki, Naxçıvanın blokadadan çıxması ilə bağlı dəyişən bir şey yoxdur, o zaman dotasiyanın azaldılmasına əsas var idimi?
"Dotasiyanın məbləğinin azaldılması Naxçıvanın özündə daha çox dəyərin yaradılması ilə bağlıdır"
Sözügedən məsələyə aydınlıq gətirən Milli Məclisin İqtisadi siyasət, sənaye və sahibkarlıq komitəsinin, Əmək və sosial siyasət komitəsinin üzvü, millət vəkili Vüqar Bayramov "Bakı-Xəbər"ə açıqlamasında bunu belə əsaslandırdı: "Dotasiyanın məbləğinin azaldılması Naxçıvanın özündə daha çox dəyərin yaradılması ilə bağlıdır. Nəzərə almaq lazımdır ki, son illər Naxçıvanda aparılan struktur islahatları Muxtar Respublikada daxili mənbələrdən daha çox vəsaitin büdcəyə daxil olmasına imkan yaradıb. Əvvəllər bu belə deyildi və həmin vəsaitlərin çoxu büdcəyə daxil olmurdu. Ona görə də indi vəsaitlərin səmərəli xərclənməsi, şəffaflığın gücləndirilməsi də dövlət büdcəsindən dotasiyaya tələbi praktik olaraq hər il azaldılır. O baxımdan bir tərəfdən Naxçıvan Muxtar Respublikasının öz daxili gəlirlərinin artması, xüsusən də sahibkarlığın inkişafı, eləcə də xarici və yerli sərmayənin cəlb edilməsi üçün imkanların genişlənməsi, digər tərəfdən isə həm dövlət büdcəsindən ayrılan, həm yerli səviyyədə xərclənən vəsaitlərin istifadəsinə nəzarətin güclənməsi öz səmərəsini verir. Bütün bunlar və görülən işlər praktik olaraq Naxçıvan dövlət büdcəsinin strukturunu dəyişib. Naxçıvanda son illər yerli gəlirlərin mərhələli şəkildə payının artması dotasiyaya tələbin azalmasında özünü göstərir. Ona görə də dövlət büdcəsindən Naxçıvan Muxtar Respublikası büdcəsinə dotasiyanın həcminin azaldılması birbaşa orada həyata keçirilən struktur islahatları, Naxçıvanın maliyyə imkanlarının genişlənməsi, eyni zamanda orada şəffaflığın güclənməsi ilə əlaqədardır".
Vidadi ORDAHALLI
